ପାଟନା, ୨୪ ଫେବୃଆରୀ (ହି.ସ.)- ଝାଡ଼ଖଣ୍ଡର ରାଜଧାନୀ ରାଂଚିରୁ ଦିଲ୍ଲୀ ଯାଉଥିବା ରେଡବର୍ଡ ଏୟାରୱେଜର ଏକ ଏୟାର ଆମ୍ବୁଲାନ୍ସ ସୋମବାର ସନ୍ଧ୍ୟାରେ ଚତରା ଜିଲ୍ଲାରେ ଦୁର୍ଘଟଣାଗ୍ରସ୍ତ ହୋଇଛି । ଏହି ମର୍ମନ୍ତୁଦ ବିମାନ ଦୁର୍ଘଟଣାରେ ୭ ଜଣଙ୍କ ମୃତ୍ୟୁ ଘଟିଛି । ମୃତକଙ୍କ ମଧ୍ୟରେ ରହିଛନ୍ତି ବିହାରର ଆନାସ୍ଥେସିଆ ବିଶେଷଜ୍ଞ ଡାକ୍ତର ବିକାଶ କୁମାର ଗୁପ୍ତା ।

ବିହାରର ଔରଙ୍ଗାବାଦ ଜିଲ୍ଲାର ମଦନପୁର ଥାନା ଅଂଚଳର ମେନକା ଗ୍ରାମର ବାସିନ୍ଦା ବଜରଙ୍ଗୀ ପ୍ରସାଦଙ୍କ ପୁଅ ଡାକ୍ତର ବିକାଶ କୁମାର ଗୁପ୍ତା ବହୁ ବର୍ଷ ଧରି ରାଂଚିରେ ରହୁଥିଲେ । ସେ ରାଂଚି ସଦର ହସ୍ପିଟାଲରେ ଆନାସ୍ଥେସିଆ ବିଶେଷଜ୍ଞ ଭାବରେ କାର୍ଯ୍ୟ କରୁଥିଲେ । ତାଙ୍କ ପତ୍ନୀ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ (ଏସବିଆଇ) ର କଚହରି ଶାଖାରେ କାମ କରନ୍ତି । ସେମାନଙ୍କର ଏକ ଆଠ ବର୍ଷର ପୁଅ ଅଛି ।

ଡାକ୍ତର ଗୁପ୍ତା ଜରୁରୀକାଳୀନ ଚିକିତ୍ସା ନିଷ୍କାସନ କାର୍ଯ୍ୟରେ ସକ୍ରିୟ ଭୂମିକା ଗ୍ରହଣ କରିଥିଲେ । ତାଙ୍କ ଅକାଳ ମୃତ୍ୟୁ ଚିକିତ୍ସା ଜଗତକୁ ଗଭୀର ଦୁଃଖ ଦେଇଛି । ଡାକ୍ତର ବିକାଶଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ତାଙ୍କ ଗାଁରେ ମଧ୍ୟ ଶୋକର ଛାୟା ଖେଳିଯାଇଛି । ରାଂଚିର ଡାକ୍ତର ଏବଂ ପ୍ରଶାସନିକ ଅଧିକାରୀମାନେ ମଧ୍ୟ ଗଭୀର ଦୁଃଖ ପ୍ରକାଶ କରିଛନ୍ତି ।

କୁହାଯାଉଛି ଯେ, ଦୁର୍ଘଟଣାର ମାତ୍ର ଗୋଟିଏ ଦିନ ପୂର୍ବରୁ ସେ ଜଣେ ସେନା ସୈନିକଙ୍କୁ ସୁରକ୍ଷିତ ଭାବରେ ଏୟାରଲିଫ୍ଟ କରିଥିଲେ । ଏପରି ଜଣେ ଜୀବନ ରକ୍ଷାକାରୀ ଡାକ୍ତରଙ୍କ ଅକାଳ ବିୟୋଗ ସମସ୍ତଙ୍କୁ ଚକିତ କରିଛି । ଏହା ତାଙ୍କ ସ୍ତ୍ରୀ ଏବଂ ଛୋଟ ପୁଅ ପାଇଁ ଏକ ବହୁତ କଷ୍ଟକର ସମୟ । ରୋଗୀଙ୍କ ଜୀବନ ବଂଚାଇବା ପାଇଁ ବାହାରିଥିବା ଡାକ୍ତରଙ୍କ ଶେଷ ଉଡ଼ାଣ ଏବେ ଏକ ଯନ୍ତ୍ରଣାଦାୟକ ସ୍ମୃତି ପାଲଟିଛି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ