ମିରଟ, ୨୪ ଫେବୃଆରୀ (ହି.ସ.)- ଉତର ପ୍ରଦେଶର ମିରଟ ଜିଲ୍ଲାର ଲିସାଡି ଗେଟ୍ ଥାନା ଅଂଚଳର କିଦୱାଇ ନଗର ଅଂଚଳରେ ସୋମବାର ବିଳମ୍ବିତ ରାତିରେ ଏକ ଘରେ ଅଗ୍ନିକାଣ୍ଡ ଘଟି ୫ ଜଣ ଶିଶୁଙ୍କ ସମେତ ମୋଟ୍ ୬ ଜଣଙ୍କର ମୃତ୍ୟୁ ହୋଇଛି । ମଙ୍ଗଳବାର ଦିନ ସମସ୍ତଙ୍କୁ ମୁସଲିମ ରୀତିନୀତି ଅନୁଯାୟୀ ଅନ୍ତିମ ସଂସ୍କାର କରାଯାଇଥିଲା ।

ପ୍ରାଥମିକ ତଦନ୍ତରୁ ଜଣାପଡିଛି ଯେ, ଅଗ୍ନିକାଣ୍ଡ ସର୍ଟସର୍କିଟ ଯୋଗୁଁ ହୋଇଥିଲା । ଜିଲ୍ଲା ମାଜିଷ୍ଟ୍ରେଟ୍ ଡଃ. ବିକେ ସିଂହ କହିଛନ୍ତି ଯେ, କପଡ଼ା ବ୍ୟବସାୟୀ ଇକବାଲ ଅହମ୍ମଦଙ୍କ ତିନି ମହଲା ବିଶିଷ୍ଟ ଘର ଇସଲାମାବାଦର କିଦୱାଇ ନଗରର ଷ୍ଟ୍ରିଟ୍ ନମ୍ବର ୩ ରେ ଅବସ୍ଥିତ । ତାଙ୍କର ଦୁଇ ପୁଅ ଅସୀମ ଏବଂ ଫାରୁକ ସେଠାରେ ଏକ ମିଳିତ ପରିବାର ଭାବରେ ରୁହନ୍ତି । ସୋମବାର ରାତିରେ ଇକବାଲ ତାଙ୍କ ପୁଅମାନଙ୍କ ସହିତ ତରାବିହର ନମାଜ ପାଠ କରିବାକୁ ମସଜିଦକୁ ଯାଇଥିଲେ । ଏହି ସମୟରେ ହଠାତ୍ ଘରେ ନିଆଁ ଲାଗିଯାଇଥିଲା । ସେ କହିଛନ୍ତି ଯେ, ପରିବାର କିଛି ବୁଝିବା ପୂର୍ବରୁ ସମଗ୍ର ଘର ନିଆଁରେ ପୋଡ଼ି ଯାଇଥିଲା ।

ପଡ଼ୋଶୀମାନେ ଇକବାଲ ଏବଂ ଅଗ୍ନିଶମ ବାହିନୀକୁ ଘଟଣା ବିଷୟରେ ସୂଚନା ଦେଇଥିଲେ । ପୋଲିସ ଅଗ୍ନିଶମ ବାହିନୀ ସହିତ ଘଟଣାସ୍ଥଳରେ ପହଂଚିଥିଲା, କିନ୍ତୁ ସଂକୀର୍ଣ୍ଣ ରାସ୍ତା ଯୋଗୁଁ ଗାଡିଗୁଡ଼ିକ ଆଗକୁ ଯିବାକୁ ବାଧା ଦେଇଥିଲା । ପୋଲିସ ପଡ଼ୋଶୀଙ୍କ ଛାତ ବ୍ୟବହାର କରି ନିଆଁ ଲିଭାଇ ଆହତମାନଙ୍କୁ ଡାକ୍ତରଖାନାକୁ ପଠାଇଥିଲା । ଘଟଣା ବିଷୟରେ ସୂଚନା ପାଇ ଜିଲ୍ଲା ମାଜିଷ୍ଟ୍ରେଟ୍ ଡକ୍ଟର ବିକେ ସିଂହ, ବରିଷ୍ଠ ପୋଲିସ ଅଧୀକ୍ଷକ ଅବିନାଶ ପାଣ୍ଡେ, ପୋଲିସ ଉପ-ନିରୀକ୍ଷକ କଳାନିଧି ନୈଥାନି ଏବଂ ସହର ପୋଲିସ ଅଧୀକ୍ଷକ ଆୟୁଷ ବିକ୍ରମ ସିଂହ ପୋଲିସ ବାହିନୀ ସହିତ ଘଟଣାସ୍ଥଳରେ ପହଂଚିଥିଲେ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ