ଇମ୍ଫାଲ୍, ୨୭ ଫେବୃଆରୀ (ହି.ସ.)- ଗତ ୨୪ ଘଂଟା ମଧ୍ୟରେ ମଣିପୁରର ବିଭିନ୍ନ ଅଂଚଳରେ କରାଯାଇଥିବା ଧରପଗଡ଼ ଅଭିଯାନ ସମୟରେ ବିଭିନ୍ନ ଉଗ୍ରବାଦୀ ସଂଗଠନର ଛଅ ଜଣ କ୍ୟାଡରଙ୍କୁ ଗିରଫ କରାଯାଇଛି ।

ଆଜି ମଣିପୁର ପୋଲିସ ମୁଖ୍ୟାଳୟ ଦ୍ୱାରା ଜାରି ଏକ ସରକାରୀ ବିବୃତିରେ କୁହାଯାଇଛି ଯେ, ଗୁରୁବାର ସୁରକ୍ଷା ବଳ ଦ୍ୱାରା କରାଯାଇଥିବା ପ୍ରଥମ ଅଭିଯାନରେ ପିଆରଇପିଏକେ(ପିଆରଓ)ର ଜଣେ ସକ୍ରିୟ କ୍ୟାଡର ଥୋକଚୋମ୍ ରାଜ ସିଂହ (୨୫) ଓରଫ ଇବୁଙ୍ଗୋକୁ ଗିରଫ କରିଥିଲା । ତାଙ୍କୁ ଇମ୍ଫାଲ୍ ପଶ୍ଚିମ ଜିଲ୍ଲାର ଘାରି ଅଂଚଳରୁ ଗିରଫ କରାଯାଇଥିଲା । ତାଙ୍କଠାରୁ ଏକ ମୋବାଇଲ୍ ଫୋନ୍ ଏବଂ ଏକ ଆଧାର କାର୍ଡ ଜବତ କରାଯାଇଥିଲା ।

ଦ୍ୱିତୀୟ ଅପରେସନରେ, ସୁରକ୍ଷା ବାହିନୀ କେସିପି (ପିଏସସି)ର ଜଣେ ସକ୍ରିୟ କ୍ୟାଡର ପୃଥ୍ୱୀରାଜ ମୋଇରଙ୍ଗଥେମ୍ ଓରଫ ୩ବି (୨୬)ଙ୍କୁ ଗିରଫ କରିଥିଲା । ତାକୁ ଇମ୍ଫାଲ୍ ପୂର୍ବ ଜିଲ୍ଲାର ଇରିଲବୁଙ୍ଗ ଥାନା ଅଧୀନ ତା’ର ବାସଭବନରୁ ପୋଲିସ ଗିରଫ କରିଥିଲା ।

ତୃତୀୟ ଅଭିଯାନରେ, ସୁରକ୍ଷା ବାହିନୀ ଇମ୍ଫାଲ ପୂର୍ବ ଜିଲ୍ଲାର ୟୈଙ୍ଗାଙ୍ଗପୋକପି ଥାନା ଅନ୍ତର୍ଗତ ୟୈଙ୍ଗାଙ୍ଗପୋକପି ଅଂଚଳରୁ ଦୁଇ ଆରପିଏଫ/ପିଏଲଏ କ୍ୟାଡରଙ୍କୁ ଗିରଫ କରିଛନ୍ତି । ସେମାନଙ୍କୁ ଥିଙ୍ଗୋମ ମହେନଜିତ ସିଂହ ଓରଫ ଅନାଓ (୨୨) ଏବଂ ନଗାଙ୍ଗବାମ ଡେରିକ ସିଂହ (୨୦) ଭାବରେ ଚିହ୍ନଟ କରାଯାଇଛି । ସେମାନଙ୍କ ନିକଟରୁ ଏକ ନମ୍ବର ୩୬ ହାତ ଗ୍ରେନେଡ, ଏକ ଡେଟୋନେଟର, ବିଭିନ୍ନ କ୍ୟାଲିବରର ୧୦ ରାଉଣ୍ଡ ଜୀବନ୍ତ ଗୁଳି ଏବଂ ଦୁଇଟି ମୋବାଇଲ ଫୋନ୍ ଜବତ କରାଯାଇଛି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ