ବଲାଙ୍ଗିର, ୧୬ ମାର୍ଚ୍ଚ (ହି.ସ.)- ବଲାଙ୍ଗିର ଜିଲ୍ଲା ପାଇଁ ଏକ ଗୌରବମୟ ମୁହୂର୍ତ୍ତ ସୃଷ୍ଟି ହୋଇଥିଲା, ଯେତେବେଳେ ପ୍ରସିଦ୍ଧ ସାମାଜିକ ସଂଗଠନ ସହଯୋଗ ଫାଉଣ୍ଡେସନ୍ କୁ ସମ୍ବଲପୁରରେ ଆୟୋଜିତ ପ୍ରାନ୍ତୀୟ ଅଧିବେଶନ ଶିଖର ୨୦୨୬ ରେ ଗତକାଲି ସମ୍ମାନିତ କରାଯାଇଥିଲା। ଏହି କାର୍ଯ୍ୟକ୍ରମ ଓଡିଶା ପ୍ରାଦେଶିକ ମାରୱାଡ଼ି ସମ୍ମେଳନ ଦ୍ୱାରା ଆୟୋଜିତ ହୋଇଥିଲା। ଗତ ଛଅ ବର୍ଷ ଧରି ସମାଜ କଲ୍ୟାଣ ଓ ମାନବ ସେବା କ୍ଷେତ୍ରରେ ନିରନ୍ତର ଓ ଉଲ୍ଲେଖନୀୟ କାର୍ଯ୍ୟ ପାଇଁ ସହଯୋଗ ଫାଉଣ୍ଡେସନକୁ ଏହି ସମ୍ମାନ ପ୍ରଦାନ କରାଯାଇ ଆସୁଅଛି। ଏହି ଭବ୍ୟ ସଭାରେ ରାଜ୍ୟର ବିଭିନ୍ନ ସ୍ଥାନରୁ ଅନେକ ପ୍ରମୁଖ ଅତିଥି ଓ ସାମାଜିକ କର୍ମୀମାନେ ଉପସ୍ଥିତ ଥିଲେ। ଭାରତ ସରକାରଙ୍କ କେନ୍ଦ୍ରୀୟ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟ ଅତିଥି ଭାବେ କାର୍ଯ୍ୟକ୍ରମର ଶୋଭା ବଢ଼ାଇଥିଲେ ଏବଂ ବରଗଡ଼ ଲୋକସଭା ସାଂସଦ ପ୍ରଦୀପ ପୁରୋହିତ ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ। ସେମାନେ ତାଙ୍କ ଉଦବୋଧନରେ ସମାଜର କଲ୍ୟାଣ ପାଇଁ ନିରନ୍ତର କାମ କରୁଥିବା ସ୍ୱଇଚ୍ଛାସେବୀ ସଂଗଠନମାନଙ୍କ ପ୍ରୟାସକୁ ପ୍ରଶଂସା କରିଥିଲେ ଏବଂ ସମାଜରେ ସେବା, ସହଯୋଗ ଓ ମାନବତାର ମୂଲ୍ୟବୋଧକୁ ମଜବୁତ କରିବାରେ ଏହିପରି ସଂଗଠନମାନଙ୍କ ଭୂମିକା ଅତ୍ୟନ୍ତ ମହତ୍ୱପୂର୍ଣ୍ଣ ବୋଲି କହିଥିଲେ।

ଏହି ଅବସରରେ ସମ୍ମେଳନର ନେତୃତ୍ୱରେ ମଧ୍ୟ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଘଟିଥିଲା। ପୂର୍ବତନ ସଭାପତି ଦିନେଶ ଅଗ୍ରୱାଲ ଔପଚାରିକ ଭାବେ ନୂତନ ନିର୍ବାଚିତ ସଭାପତି ସୁଭାଷ ଅଗ୍ରୱାଲଙ୍କୁ ସଭାପତି ପଦର ଦାୟିତ୍ୱ ହସ୍ତାନ୍ତର କରିଥିଲେ, ଯାହା ସଂଗଠନର ନେତୃତ୍ୱରେ ଏକ ନୂତନ ଅଧ୍ୟାୟର ଆରମ୍ଭ ସୂଚିତ କରିଥିଲା। ଏହି ଧାରାବାହିକ ସେବା କାର୍ଯ୍ୟକଳାପ ମାଧ୍ୟମରେ ସହଯୋଗ ଫାଉଣ୍ଡେସନ୍ ବଲାଙ୍ଗିର ଓ ପାଶ୍ୱର୍ବତୀ ଅଞ୍ଚଳର ହଜାର ହଜାର ଲୋକଙ୍କ ଜୀବନରେ ସକାରାତ୍ମକ ପରିବର୍ତ୍ତନ ଆଣିପାରିଛି। ସଂଗଠନର ସଦସ୍ୟ ଓ ସ୍ୱଇଚ୍ଛାସେବକମାନେ ସଦା ସମର୍ପଣ, କରୁଣା ଓ ସେବାଭାବନା ସହିତ ସମାଜର ମଙ୍ଗଳ ପାଇଁ କାମ କରୁଛନ୍ତି।

ପ୍ରାନ୍ତୀୟ ଅଧିବେଶନ ଶିଖର ୨୦୨୬ ରେ ମିଳିଥିବା ଏହି ସମ୍ମାନ ସହଯୋଗ ଫାଉଣ୍ଡେସନ୍ ର ମାନବ ସେବା ପ୍ରତି ଅତୁଟ ପ୍ରତିବଦ୍ଧତାର ପ୍ରତୀକ। ଏହି ସମ୍ମାନ ସଂଗଠନର ସଫଳତାକୁ ସ୍ୱୀକାର କରିବା ସହିତ ତାଙ୍କ ସଦସ୍ୟମାନଙ୍କୁ ଆଗାମୀ ଦିନରେ ଆହୁରି ବ୍ୟାପକ ଭାବରେ ସମାଜ ସେବା କରିବାକୁ ପ୍ରେରଣା ଦେଇଛି। “ମାନବ ସେବା ହେଉଛି ସର୍ବୋଚ୍ଚ ସେବା” ଏହି ମୂଳମନ୍ତ୍ରକୁ ଆଦର୍ଶ କରି ସହଯୋଗ ଫାଉଣ୍ଡେସନ୍ ଆଗାମୀ ଦିନରେ ମଧ୍ୟ ଏକ ସହାନୁଭୂତିଶୀଳ, ସହଯୋଗୀ ଓ ସମାନତାମୂଳକ ସମାଜ ଗଠନ ପାଇଁ ପ୍ରତିବଦ୍ଧ ରହିବ।

ହିନ୍ଦୁସ୍ଥାନ ସମାଚାର / ଗୋପବନ୍ଧୁ