ୱାଶିଂଟନ, 22 ମାର୍ଚ୍ଚ (ହି.ସ.)- ଆମେରିକା-ଇସ୍ରାଇଲ୍ ଓ ଇରାନ ମଧ୍ୟରେ ୨୮ ଫେବ୍ରୁଆରୀରୁ
ଆରମ୍ଭ ହୋଇଥିବା ଯୁଦ୍ଧର କୌଣସି ଅନ୍ତ ଦେଖାଯାଉ ନାହିଁ। ଆମେରିକାର ରାଷ୍ଟ୍ରପତି ଡୋନାଲ୍ଡ
ଟ୍ରମ୍ପ ଧମକ ଦେଇଛନ୍ତି ଯେ, ଯଦି ୪୮ ଘଣ୍ଟା
ମଧ୍ୟରେ ହର୍ମୁଜ୍ ଜଳଡମରୁମଧ୍ୟ ଖୋଲା ନହୋଇ, ତେବେ ଇରାନର ସମସ୍ତ ପରମାଣୁ ଶକ୍ତି କେନ୍ଦ୍ର (ପାୱାର ପ୍ଲାଣ୍ଟ)
ସମ୍ପୂର୍ଣ୍ଣ ଧ୍ୱଂସ କରାଯିବ।
ସିବିଏସ୍ ନ୍ୟୁଜ୍ ଓ ଅଲ୍ ଜଜିରାର ରିପୋର୍ଟ ଅନୁସାରେ, ରାଷ୍ଟ୍ରପତି
ଟ୍ରମ୍ପ ଶନିବାର ରାତିରେ ନିଜ ଟ୍ରୁଥ୍ ସୋସିଆଲ୍ରେ ଲେଖିଥିଲେ, “ଯଦି ଇରାନ ଏହି
ସମୟରୁ ୪୮ ଘଣ୍ଟା ମଧ୍ୟରେ କୌଣସି ଆଡ଼ମ୍ବର ବିନା ହର୍ମୁଜ୍ ଜଳଡମରୁମଧ୍ୟକୁ ପୂରାପୂରି ଖୋଲିବନି, ତେବେ
ଯୁକ୍ତରାଷ୍ଟ୍ର ତାଙ୍କର ବିଭିନ୍ନ ପରମାଣୁ ଶକ୍ତି କେନ୍ଦ୍ର ଉପରେ ଆକ୍ରମଣ କରି ସେଗୁଡ଼ିକୁ
ସମ୍ପୂର୍ଣ୍ଣ ଧ୍ୱଂସ କରିଦେବ। ଏହାର ଆରମ୍ଭ ଇରାନର ସବୁଠାରୁ ବଡ଼ ପାୱାର ପ୍ଲାଣ୍ଟରୁ କରାଯିବ।”
ଇରାନର ସବୁଠାରୁ ବଡ଼ ପାୱାର ପ୍ଲାଣ୍ଟ ‘ବୁଶେହର ପରମାଣୁ ଶକ୍ତି
କେନ୍ଦ୍ର’ ଅଟେ। ଏହା ଦକ୍ଷିଣ-ପଶ୍ଚିମ ଇରାନରେ ପାରସିକ ଉପସାଗରର କୂଳରେ ଅବସ୍ଥିତ। ଏହା ଇରାନର
ଏକମାତ୍ର ବାଣିଜ୍ୟିକ ପରମାଣୁ ଶକ୍ତି କେନ୍ଦ୍ର। ତିନି ସପ୍ତାହ ପୂର୍ବରୁ ଯୁଦ୍ଧ ଆରମ୍ଭ ହେବା
ପରଠାରୁ, ଇରାନର ସେନା
ହର୍ମୁଜ୍ ଜଳଡମରୁମଧ୍ୟକୁ ଜାହାଜ ଚଳାଚଳ ପାଇଁ ପ୍ରାୟ ସମ୍ପୂର୍ଣ୍ଣ ଭାବେ ବନ୍ଦ କରିରଖିଛି। ଏହି
ଗୁରୁତ୍ୱପୂର୍ଣ୍ଣ ଜଳପଥ ଦ୍ୱାରା ସାରା ବିଶ୍ୱର ପ୍ରାୟ ୨୦ ପ୍ରତିଶତ ତେଲ ଆପୂର୍ତ୍ତି ହୁଏ। ଏହା
ବନ୍ଦ ହେବାରୁ ଗ୍ୟାସ ଦାମରେ ଭାରି ବୃଦ୍ଧି ହୋଇଛି। ଟ୍ରମ୍ପଙ୍କ ଏହି ଧମକ ସେତିକିବେଳେ ଆସିଛି, ଯେତେବେଳେ
ଶୁକ୍ରବାର ଟ୍ରେଜାରୀ ବିଭାଗ ଘୋଷଣା କରିଥିଲା ଯେ ସମୁଦ୍ରରେ ଇରାନୀ ତେଲ ଉପରେ ଲାଗିଥିବା
ପ୍ରତିବନ୍ଧକ ହଟାଯାଉଛି, ଯାହାଦ୍ୱାରା ଦାମ
କମାଇବାର ଚେଷ୍ଟା କରାଯାଇପାରିବ ।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
23 Mar 2026