ପରଜା ଶିଶୁ ମାନଙ୍କ ମଧ୍ୟରେ ସ୍ବଦେଶୀ ଖାଦ୍ୟ ପଦ୍ଧତି ଉପରେ ସଚେତନତା ଜୟପୁର, 15 ଏପ୍ରିଲ୍ (ହି.ସ.)କୋରାପୁଟ ଜିଲ୍ଲାର ପରଜା ଶିଶୁମାନଙ୍କ ମଧ୍ୟରେ ସ୍ୱଦେଶୀ ଖାଦ୍ୟ ପଦ୍ଧତି, ଖାଦ୍ୟ ସୁରକ୍ଷା ଓ ପୋଷଣ ଫଳାଫଳ ସମ୍ବନ୍ଧିତ ସଚେତନତା-ତଥା-ପ୍ରଚାର କାର୍ଯ୍ୟକ୍ରମ ୧୫ ଏପ୍ରିଲ ୨୦୨୬ ତାରିଖରେ ଜୟପୁରସ୍ଥିତ ଏମ୍.ଏସ୍. ସ୍ୱାମୀନାଥନ ଗବେଷଣା ପ୍ରତିଷ୍ଠାନରେ ସଫଳତାର ସହ ଆୟୋଜିତ ହୋଇଯାଇଛି। ଏହି କାର୍ଯ୍ୟକ୍ରମଟି ରମାଦେବୀ ମହିଳା ବିଶ୍ୱବିଦ୍ୟାଳୟ, ଭୁବନେଶ୍ୱର ଦ୍ୱାରା ଭାରତୀୟ ସାମାଜିକ ବିଜ୍ଞାନ ଗବେଷଣା ପରିଷଦ , ନୂଆଦିଲ୍ଲୀ ପ୍ରଯୋଜିତ ଏକ ଗବେଷଣା ପ୍ରକଳ୍ପର ଅଂଶ ଭାବେ ଆୟୋଜିତ ହୋଇଥିଲା।
କାର୍ଯ୍ୟକ୍ରମଟି ଅତିଥି ଓ ଅଂଶଗ୍ରାହୀମାନଙ୍କ ସ୍ୱାଗତ ଅଭିଭାଷଣ ସହ ଆରମ୍ଭ ହେବା ପରେ ସଭାର ବିଷୟବସ୍ତୁର ପରିଚୟ ଦିଆଯାଇଥିଲା। ଏହା ପରେ ପ୍ରକଳ୍ପ ନିର୍ଦ୍ଦେଶକ-ତଥା-ସମନ୍ୱୟକାରୀ ଡା. ସୂର୍ଯ୍ୟମଣି ପାତ୍ରଙ୍କ ଦ୍ୱାରା ଗବେଷଣା ଫଳାଫଳ ଉପରେ ବିସ୍ତୃତ ବିବରଣୀ ପ୍ରଦାନ କରାଯାଇଥିଲା। ଏହି ଫଳାଫଳ ଆଦିବାସୀ ସମ୍ପ୍ରଦାୟ ମଧ୍ୟରେ ଶିଶୁ ପୋଷଣ ଓ ଖାଦ୍ୟ ସୁରକ୍ଷା ସୁଧାରଣରେ ସ୍ୱଦେଶୀ ଖାଦ୍ୟ ପଦ୍ଧତିର ମୁଖ୍ୟ ଭୂମିକାକୁ ଉଦ୍ଭାସିତ କରିଥିଲା।
ମୁଖ୍ୟ ଅତିଥି ଜୟପୁରର ଉପଜିଲ୍ଲାପାଳ-ତଥା-ଉପ-ଜିଲ୍ଲା ମାଜିଷ୍ଟ୍ରେଟ୍, ଶ୍ରୀ ଯଦୁମଣି ନାୟକ ଆଧୁନିକ ଖାଦ୍ୟ ସଂସ୍କୃତିରେ ଧୀରେ ଧୀରେ ଅନ୍ତର୍ଧାନ ହେଉଥିବା ପାରମ୍ପରିକ ମିଲେଟ୍ ଆଧାରିତ ଖାଦ୍ୟ ଓ ପଖାଳ ଭାତର ସ୍ୱାଦ ଓ ଶକ୍ତିକୁ ସ୍ମରଣ କରିଥିଲେ। କୋରାପୁଟର ପୂର୍ବତନ ସିଡିଏମଓ ଡା. ଅରୁଣ କୁମାର ପାଢ଼ୀ, ସମ୍ମାନିତ ଅତିଥି ଭାବେ S ସ୍ୱାସ୍ଥ୍ୟସୂଚକ ବିଷୟରେ ଉଲ୍ଲେଖ କରି ଏହାକୁ ଦମନ କରିବାରେ ପାରମ୍ପରିକ ଖାଦ୍ୟର ଗୁରୁତ୍ୱକୁ ବର୍ଣ୍ଣନା କରିଥିଲେ। ପ୍ରସିଦ୍ଧ ଆଦିବାସୀ ସଂସ୍କୃତି ବିଶେଷଜ୍ଞ ଡା. ରାଜେନ୍ଦ୍ର କୁମାର ପାଢ଼ୀ ବିଶିଷ୍ଟ ଅତିଥି ଭାବେ ଭାବେ ଯୋଗ ଦେଇ ପାରମ୍ପରିକ କୃଷି ଓ ଖାଦ୍ୟ ପଦ୍ଧତି ପଛରେ ଥିବା ବୈଜ୍ଞାନିକ ଆଧାର ଓ ସୁସ୍ଥ ଭବିଷ୍ୟତ ପାଇଁ ଏହାର ପୁନରୁତ୍ଥାନର ଆବଶ୍ୟକତାକୁ ଉଦ୍ଧାର କରିଥିଲେ। ଅନ୍ୟ ଅତିଥିମାନେ ଯଥା ଶ୍ରୀ ଭବାନୀ ଶଙ୍କର ମହାପାତ୍ର, ମୁଖ୍ୟ ଜିଲ୍ଲା କୃଷି ଅଧିକାରୀ, ଜୟପୁର; ଶ୍ରୀମତୀ ସନ୍ଧ୍ୟା ରାଣୀ ପାତ୍ର, କାର୍ଯ୍ୟକ୍ରମ ଅଧିକାରୀ, ଆଇସିଡିଏସ୍, ଜୟପୁର ଓ ଡା. କାର୍ତ୍ତିକ ଚରଣ ଲେଙ୍କା, କୃଷି ବୈଜ୍ଞାନିକ, ଏମ୍.ଏସ୍.ଏସ୍.ଆର୍.ଏଫ୍, ଜୟପୁର ମଧ୍ୟ ସଭାରେ ଉଦ୍ବୋଧନ ଦେଇଥିଲେ। ଏମ୍.ଏସ୍.ଏସ୍.ଆର୍.ଏଫ୍ ଜୟପୁରର ନିର୍ଦ୍ଦେଶକ ଓ କାର୍ଯ୍ୟକ୍ରମର ଅଧ୍ୟକ୍ଷ ଶ୍ରୀ ପ୍ରଶାନ୍ତ କୁମାର ପରିଡା ସଫଳତାର ସହ କାର୍ଯ୍ୟକ୍ରମକୁ ପରିଚାଳନା କରି ପାରମ୍ପରିକ କୃଷି ଓ ଖାଦ୍ୟ ପ୍ରଣାଳୀର ଶକ୍ତି ଓ ଏହାର ପୁନରୁଜ୍ଜୀବନର ଆବଶ୍ୟକତାକୁ ଉଲ୍ଲେଖ କରିଥିଲେ। ଗବେଷଣା ଛାତ୍ରୀ କୁମାରୀ ନମ୍ରତା ବେହେରା ଧନ୍ୟବାଦ ଜ୍ଞାପନ କରି ଏହି ଦିନିଆ କାର୍ଯ୍ୟକ୍ରମର ସମାପନ କରିଥିଲେ।
ଅନ୍ୟ ଉଲ୍ଲେଖନୀୟ କାର୍ଯ୍ୟକ୍ରମମାନଙ୍କ ମଧ୍ୟରେ ଆଦିବାସୀ ପ୍ରତିନିଧି ଶ୍ରୀମତୀ ରାଇମତୀ ଘିଉରିଆ, ଶ୍ରୀମତୀ ଚନ୍ଦ୍ରମା ବାଲିଆ ଓ ଶ୍ରୀ ଲାଇଛନ୍ ମାଝିଙ୍କୁ ସ୍ୱଦେଶୀ ଖାଦ୍ୟ ପ୍ରଚଳନ ସୁରକ୍ଷାରେ ତାଙ୍କର ମୂଲ୍ୟବାନ ଅବଦାନ ପାଇଁ ସମ୍ମାନିତ କରାଯାଇଥିଲା। ପରଜା ଖାଦ୍ୟ ସଂସ୍କୃତି ଉପରେ ଏକ ପୁସ୍ତିକା, ଶିଶୁ ପୋଷଣ ପରାମର୍ଶ ପୁସ୍ତିକା ଓ ମିଲେଟ୍ର ପୋଷଣ ଗୁରୁତ୍ୱ ଉପରେ ଏକ ପ୍ରଚାର ପତ୍ର ଅଂଶଗ୍ରାହୀମାନଙ୍କ ମଧ୍ୟରେ ବଣ୍ଟନ କରାଯାଇଥିଲା। ମିଲେଟ୍ ଆଧାରିତ ପୂରକ ଖାଦ୍ୟ ପ୍ରସ୍ତୁତି ପ୍ରଦର୍ଶନ ଆଦିବାସୀ ମାଆମାନଙ୍କ ମଧ୍ୟରେ ବିଶେଷ ଆକର୍ଷଣ ସୃଷ୍ଟି କରିଥିଲା।
ଏହି କାର୍ଯ୍ୟକ୍ରମରେ ଆଦିବାସୀ ସମ୍ପ୍ରଦାୟର ସଦସ୍ୟ, ବିଭିନ୍ନ ସଂସ୍ଥାର ଛାତ୍ରଛାତ୍ରୀ ଓ ଶିକ୍ଷକମଣ୍ଡଳୀ ଓ ଏମ୍.ଏସ୍.ଏସ୍.ଆର୍.ଏଫ୍ର ବୈଜ୍ଞାନିକମାନଙ୍କ ସକ୍ରିୟ ଅଂଶଗ୍ରହଣ କରିଥିଲେ, ଯାହା ଜ୍ଞାନ ବିନିମୟ ପାଇଁ ଏକ ବିଶିଷ୍ଟ ମଞ୍ଚ ଭାବେ ପରିଣତ ହୋଇଥିଲା।
---------------
ହିନ୍ଦୁସ୍ଥାନ ସମାଚାର / ପିକେପି
15 Apr 2026
