କେନ୍ଦ୍ରାପଡା, ୧୬ ଏପ୍ରିଲ୍ (ହି.ସ.)- ମହିଳା ସଶକ୍ତିକରଣ ଯୋଜନା, ଲକ୍ଷପତି ଦିଦି ଉଦ୍ୟମ ଏବଂ ମହିଳାଙ୍କ ଉନ୍ନୟନ ପାଇଁ ବିଭିନ୍ନ ସରକାରୀ କାର୍ଯ୍ୟକ୍ରମ ଉପରେ ଏକ ସଚେତନତା ଶିବିର ସହ “ନାରୀ ଶକ୍ତି ବନ୍ଦନ ପଦଯାତ୍ରା” ଆଜି କେନ୍ଦ୍ରାପଡା ଜିଲ୍ଲା ପ୍ରଶାସନ ଓ ମିଶନ ଶକ୍ତି ବିଭାଗର ସହଯୋଗରେ ସଫଳତାର ସହ ଆୟୋଜିତ ହୋଇଥିଲା। ଏହି କାର୍ଯ୍ୟକ୍ରମରେ ୨,୦୦୦ ରୁ ଅଧିକ ମହିଳା ସ୍ୱୟଂସହାୟକ ଗୋଷ୍ଠୀ ସଦସ୍ୟା, ଜିଲ୍ଲା ସ୍ତରୀୟ ସଂଘ ପ୍ରତିନିଧିମାନେ, କମ୍ୟୁନିଟି ସପୋର୍ଟ ଷ୍ଟାଫ ଓ ଜିଲ୍ଲାର ମହିଳା ସକ୍ରିୟ କର୍ମୀମାନେ ଉତ୍ସାହର ସହ ଯୋଗଦେଇଥିଲେ। ଏହି ବିଶାଳ ଉପସ୍ଥିତି ମହିଳାଙ୍କ ଅଧିକାର ଓ ସଶକ୍ତିକରଣ ପ୍ରତି ସମୁହିକ ପ୍ରତିବଦ୍ଧତାକୁ ପ୍ରକାଶ କରିଥିଲା। ଏହାର ଅଂଶ ଭାବେ ଏକ ପଦଯାତ୍ରା ଆୟୋଜନ କରାଯାଇଥିଲା, ଯାହା ସହରର ପ୍ରମୁଖ ଅଞ୍ଚଳ ପରିକ୍ରମା କରିଥିଲା। ଏହି ପଦଯାତ୍ରା ନୂତନ ବସ୍ ଷ୍ଟାଣ୍ଡ, କେନ୍ଦ୍ରାପଡା ଠାରୁ ଆରମ୍ଭ ହୋଇ ତିନିମୁହାଣି ଛକରେ ସମାପ୍ତ ହୋଇଥିଲା। ଏହା ଲିଙ୍ଗ ସମତା, ମହିଳାଙ୍କ ଅଧିକାର ଓ ସମାଜର ସମସ୍ତ ସ୍ତରରେ ମହିଳା ସଶକ୍ତିକରଣର ଗୁରୁତ୍ୱ ବିଷୟରେ ସଚେତନତା ସୃଷ୍ଟିରେ ଏକ ପ୍ରଭାବଶାଳୀ ମାଧ୍ୟମ ରୂପେ କାର୍ଯ୍ୟ କରିଥିଲା।
ଜିଲ୍ଲା ପ୍ରଶାସନର କର୍ମକର୍ତ୍ତାମାନେ, ଜିଲ୍ଲା ସମାଜ କଲ୍ୟାଣ ଅଧିକାରୀ, କେନ୍ଦ୍ରାପଡା, ସମସ୍ତ ବ୍ଲକ ର ଶିଶୁ ବିକାଶ ପ୍ରକଳ୍ପ ଅଧିକାରୀ, ମିଶନ ଶକ୍ତି ଓ ଓଡିଶା ଜୀବିକା ମିଶନ କର୍ମଚାରୀମାନେ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିବାରେ ସକ୍ରିୟ ସହଯୋଗ ଯୋଗାଇଥିଲେ। ଏହି ପଦକ୍ଷେପ ମାଧ୍ୟମରେ ଗ୍ରାମ ଏବଂ ସହର ସ୍ତରରେ ସଚେତନତା ବୃଦ୍ଧି ସହ ମହିଳାଙ୍କ ସାମାଜିକ ଓ ଆର୍ଥିକ ସଶକ୍ତିକରଣକୁ ଆଗେଇ ନେବାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରାଯାଇଛି।
ହିନ୍ଦୁସ୍ଥାନ ସମାଚାର / ରବି
