ନାସିକ୍, ୧୧ ମଇ (ହି.ସ.): ମହାରାଷ୍ଟ୍ରର ନାସିକ୍ ରେ ବହୁରାଷ୍ଟ୍ରୀୟ କମ୍ପାନୀ ଟିସିଏସ୍ ସହିତ ଜଡିତ ଧର୍ମାନ୍ତରୀକରଣ ଏବଂ ଯୌନ ଶୋଷଣ ମାମଲାରେ ପଳାତକ ଅଭିଯୁକ୍ତ ନିଦା ଖାନଙ୍କୁ ଏକ କୋର୍ଟ ୧୪ ଦିନିଆ ନ୍ୟାୟିକ ହାଜତକୁ ପଠାଇ ଦେଇଛନ୍ତି। ନାସିକ୍ ରୋଡ୍ କୋର୍ଟରେ ହାଜର କରାଯିବା ପରେ କୋର୍ଟ ଏହି ରାୟ ଦେଇଛନ୍ତି, ଯାହା ପରେ ତାଙ୍କୁ ନାସିକ୍ ରୋଡ୍ କେନ୍ଦ୍ରୀୟ କାରାଗାରକୁ ପଠାଯିବ।

ମାମଲାର ତଦନ୍ତ କରୁଥିବା ସ୍ୱତନ୍ତ୍ର ତଦନ୍ତ ଦଳ (ଏସ୍ଆଇଟି) ନିଦା ଖାନଙ୍କ ବୟାନ ଆଧାରରେ ଅନ୍ୟ ଅଭିଯୁକ୍ତମାନଙ୍କୁ ମୁହାଁମୁହିଁ ପଚରାଉଚରା ପାଇଁ ପ୍ରସ୍ତୁତି ଆରମ୍ଭ କରିଛି। ମୁଖ୍ୟ ଅଭିଯୁକ୍ତ ଦାନିଶ୍ ଶେଖ୍ ଏବଂ ତୌସିଫ୍ ଅତରଙ୍କୁ ମଧ୍ୟ ଅଟକ ରଖି ଏକତ୍ର ପଚରାଉଚରା କରାଯିବ। ତଦନ୍ତକାରୀ ସଂସ୍ଥାଗୁଡ଼ିକ ସନ୍ଦେହ କରୁଛନ୍ତି ଯେ ଏହି ମାମଲାର ଆନ୍ତଃରାଜ୍ୟ କିମ୍ବା ଆନ୍ତର୍ଜାତୀୟ ସମ୍ପର୍କ ଥାଇପାରେ, ଯାହା ତଦନ୍ତ ପରେ ନିଶ୍ଚିତ ହେବ।

ଦେଓଲାଲି କ୍ୟାମ୍ପ ଏବଂ ମୁମ୍ବାଇ ନାକା ପୋଲିସ ଷ୍ଟେସନରେ ଦାୟର ଅଭିଯୋଗ ପରେ ମାର୍ଚ୍ଚ ମାସରେ ତଦନ୍ତ ଆରମ୍ଭ ହୋଇଥିଲା। ସେହି ସମୟରେ କିଛି ଅଭିଯୁକ୍ତଙ୍କୁ ଗିରଫ କରାଯାଇଥିଲା, କିନ୍ତୁ ନିଦା ଖାନ ଫେରାର ଥିଲେ। ଏହି ସମୟରେ, ମୁମ୍ବାଇ ନାକା ପୋଲିସ ମାମଲାରେ ଅପରାଧିକ ଷଡ଼ଯନ୍ତ୍ର ଏବଂ ଧାର୍ମିକ ଭାବନାକୁ ଆଘାତ ଦେବାର ଅତିରିକ୍ତ ଅଭିଯୋଗ ଯୋଡିଛି। ନିଦା ଖାନଙ୍କଠାରୁ ଜବତ ହୋଇଥିବା ୧୭୧ ଡିଜିଟାଲ୍ ଲିଙ୍କ ଏବଂ ତାଙ୍କ ଆର୍ôଥକ କାରବାରର ବୈଷୟିକ ଯାଂଚ ଚାଲିଛି। ଏସଆଇଟି ତାଙ୍କ ହାଜତକୁ ବୃଦ୍ଧି କରିବାକୁ ଆବେଦନ କରିଥିଲା, କିନ୍ତୁ କୋର୍ଟ ତାଙ୍କୁ ନ୍ୟାୟିକ ହାଜତକୁ ପଠାଇ ଦେଇଥିଲେ।

ପୋଲିସ ତଦନ୍ତ ଅନୁଯାୟୀ, ମାର୍ଚ୍ଚ ୨୬ ତାରିଖରୁ ପଳାତକ ନିଦା ଖାନଙ୍କୁ ଛତ୍ରପତି ସମ୍ଭାଜୀନଗରର ଜଣେ କର୍ପୋରେଟର ଆଶ୍ରୟ ଦେଇଥିଲେ। ପ୍ରାରମ୍ଭରେ, ଫ୍ଲାଟ୍ ଜଣେ ସମ୍ପର୍କୀୟଙ୍କର ବୋଲି ରିପୋର୍ଟ କରାଯାଇଥିଲା, କିନ୍ତୁ ତଦନ୍ତରୁ ଜଣାପଡିଥିଲା ଯେ ନିଦାଙ୍କର ଫ୍ଲାଟ୍ ସହିତ କୌଣସି ସମ୍ପର୍କ ନାହିଁ।

ଏହା ବ୍ୟତୀତ, ଗର୍ଭଧାରଣ ସମୟରେ ନିଦା ଖାନଙ୍କୁ କିଏ ଆର୍ôଥକ ସହାୟତା ଏବଂ ବାସସ୍ଥାନ ଯୋଗାଇଥିଲା ତାହା ନିର୍ଣ୍ଣୟ କରିବା ପାଇଁ ତଦନ୍ତ ଚାଲିଛି।

------------------------

---------------

ହିନ୍ଦୁସ୍ଥାନ ସମାଚାର / ଗଗନ