କୋଲକାତା, ମେ 23 (ହି.ସ) ଆମେରିକାର ବୈଦେଶିକ ସଚିବ ମାର୍କୋ ରୁବିଓ ଶନିବାର ସକାଳେ ତାଙ୍କ ପତ୍ନୀଙ୍କ ସହ କୋଲକାତା ପହଞ୍ଚିଛନ୍ତି। ନେତାଜୀ ସୁଭାଷ ଚନ୍ଦ୍ର ବୋଷ ଅନ୍ତର୍ଜାତୀୟ ବିମାନ ବନ୍ଦରରେ ପହଞ୍ଚିବା ପରେ ସେ ସିଧା ତଲତାଲାସ୍ଥିତ ମଦର (ଟେରେସା) ହାଉସକୁ ଯାଇଥିଲେ। ଅପରାହ୍ନରେ ସେ ଦିଲ୍ଲୀ ଅଭିମୁଖେ ଯାତ୍ରା କରିବାର କାର୍ଯ୍ୟକ୍ରମ ରହିଛି, ଯେଉଁଠାରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିବେ।

ଭାରତରେ ଆମେରିକାର ରାଷ୍ଟ୍ରଦୂତ ସାର୍ଜିଓ ଗୋରେ ନିଶ୍ଚିତ କରିଛନ୍ତି ଯେ ରୁବିଓ କୋଲକାତାରେ ପହଞ୍ଚିବେ। ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଏକ ବୈଠକ ବ୍ୟତୀତ ବାଣିଜ୍ୟ, ପ୍ରଯୁକ୍ତିବିଦ୍ୟା, ପ୍ରତିରକ୍ଷା ଏବଂ କ୍ୱାଡ୍ ଭଳି ପ୍ରସଙ୍ଗରେ ଅନେକ ପର୍ଯ୍ୟାୟ ଆଲୋଚନା ହେବ ବୋଲି ସେମାନେ କହିଛନ୍ତି।

ପଶ୍ଚିମ ଏସିଆରେ ଚାଲିଥିବା ଉତ୍ତେଜନା ଏବଂ ଆମେରିକା-ଇରାନ ସଂଘର୍ଷ ମଧ୍ୟରେ ଏହି ଗସ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ଭାରତ କଥାବାର୍ତ୍ତା ମାଧ୍ୟମରେ ଏହି ଅଞ୍ଚଳରେ ଶାନ୍ତି ପାଇଁ ନିରନ୍ତର ସମର୍ଥନ କରିଆସିଛି। ଏଥି ସହିତ, ହରମୁଜ ଷ୍ଟ୍ରେଟ୍ ଦେଇ ମାଲବାହୀ ଜାହାଜଗୁଡ଼ିକର ନିରବଚ୍ଛିନ୍ନ ଗତିବିଧି ସୁନିଶ୍ଚିତ କରିବାର ଆବଶ୍ୟକତା ଉପରେ ମଧ୍ୟ ନୂଆଦିଲ୍ଲୀ ଗୁରୁତ୍ୱାରୋପ କରିଛି।

କୋଲକାତା ଯିବା ପୂର୍ବରୁ ମାର୍କୋ ରୁବିଓ କହିଥିଲେ ଯେ ଭାରତ ହେଉଛି ଆମେରିକାର ଅତି ଘନିଷ୍ଠ ବନ୍ଧୁ ଏବଂ ସେ ଭାରତୀୟ ମନ୍ତ୍ରୀ ଏବଂ କ୍ୱାଡ୍ ଦେଶଗୁଡ଼ିକର ପ୍ରତିନିଧିମାନଙ୍କୁ ଭେଟିବାକୁ ଅପେକ୍ଷା କରିଛନ୍ତି।

ରୁବିଓ ତାଙ୍କ ଭାରତ ଗସ୍ତର ଶେଷ ଦିନରେ 26 ମେ, ରେ କ୍ୱାଡ୍ ବୈଠକରେ ମଧ୍ୟ ଯୋଗଦେବେ। ଏହି ବୈଠକରେ ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର, ଅଷ୍ଟ୍ରେଲିଆର ବୈଦେଶିକ ମନ୍ତ୍ରୀ ପେନି ୱଙ୍ଗ୍ ଏବଂ ଜାପାନର ବୈଦେଶିକ ମନ୍ତ୍ରୀ ମୋତେଗି ତୋସିମିତ୍ସୁ ମଧ୍ୟ ଯୋଗଦେବେ।

ହିନ୍ଦୁସ୍ଥାନ ସମାଚାର / ସ୍ୱାଗତିକା