ଧର୍ମଶାଳା, ୨୭ ମଇ(ହି.ସ.) – ତିବ୍ଦତର ନିର୍ବାସିତ ସରକାରର ନବ ନିର୍ବାଚିତ ସିକ୍ୟୋଙ୍ଗ ରାଷ୍ଟ୍ରପତି ପେମ୍ପା ସେରିଙ୍ଗ ବୁଧବାର ଦ୍ୱିତୀୟ ଥର ପାଇଁ ସର୍ବୋଚ୍ଚ ତିବ୍ଦତୀୟ ଧର୍ମଗୁରୁ ଦଲାଇ ଲାମାଙ୍କ ଉପସ୍ଥିତିରେ ପଦବୀ ଏବଂ ଗୋପନୀୟତାର ଶପଥ ଗ୍ରହଣ କରିଛନ୍ତି।

ପେମ୍ପା ସେରିଙ୍ଗ କ୍ରମାଗତ ଦ୍ୱିତୀୟ ଥର ପାଇଁ ଏହି ପଦବୀକୁ ନିର୍ବାଚିତ ହୋଇଛନ୍ତି। ଏହି ଶପଥ ଗ୍ରହଣ ସମାରୋହ ମ୍ୟାକଲିଓଡ଼ଗଞ୍ଜର ମୁଖ୍ୟ ବୌଦ୍ଧ ମଠ ଚୁଗଲଖାଙ୍ଗ ଅର୍ଥାତ୍ ଦଲାଇ ଲାମା ମନ୍ଦିରରେ ଅନୁଷ୍ଠିତ ହୋଇଥିଲା। ଚତୁର୍ଦ୍ଦଶ ତିବ୍ଦତୀୟ ଆଧ୍ୟାତ୍ମିକ ନେତା ଦଲାଇ ଲାମା ମଧ୍ୟ ଏହି ଅବସରରେ ଉପସ୍ଥିତ ଥିଲେ। ଶପଥ ଗ୍ରହଣ ସମାରୋହ ପୂର୍ବରୁ ପେମ୍ପା ସେରିଙ୍ଗ ଦଲାଇ ଲାମାଙ୍କ ଆଶୀର୍ବାଦ ଲୋଡ଼ିଥିଲେ। କେନ୍ଦ୍ରୀୟ ତିବ୍ଦତୀୟ ପ୍ରଶାସନ(ସିଟିଏ) ଦ୍ୱାରା ଆୟୋଜିତ ଏହି ସମାରୋହ ତିବ୍ଦତୀୟ ଗଣତାନ୍ତ୍ରିକ ବ୍ୟବସ୍ଥା ପାଇଁ ଏକ ଗୁରୁତ୍ୱପୂର୍ଣ୍ଣ ଅବସର ଥିଲା। ଏହି କାର୍ଯ୍ୟକ୍ରମରେ ବିଭିନ୍ନ ମାନ୍ୟଗଣ୍ୟ ବ୍ୟକ୍ତି, ଅଧିକାରୀ, ବିଭିନ୍ନ ବିଦେଶୀ ପ୍ରତିନିଧି ଏବଂ ବହୁ ସଂଖ୍ୟକ ସାଧାରଣ ତିବ୍ଦତୀୟ ଯୋଗ ଦେଇଥିଲେ।

ସିକ୍ୟୋଙ୍ଗ ଶପଥ ଗ୍ରହଣ କରିବା ପରେ ତାଙ୍କ ଭାଷଣରେ ପେମ୍ପା ସେରିଙ୍ଗ କହିଥିଲେ ଯେ ତିବ୍ଦତୀୟ ଜାତୀୟ ପରିଚୟକୁ ଦୁର୍ବଳ କରିବା ପାଇଁ ଚୀନ୍ ସରକାରଙ୍କ ବ୍ୟବସ୍ଥିତ ପ୍ରୟାସ ସତ୍ୱେ ଚୀନ୍ ସେମାନଙ୍କ ମାତୃଭୂମି ପ୍ରତି ତିବ୍ଦତୀୟ ଲୋକଙ୍କ ଅତୁଟ ବନ୍ଧନକୁ ଦୁର୍ବଳ କରିପାରିବ ନାହିଁ। ସେ କହିଥିଲେ ଯେ ସଭ୍ୟତାର ପ୍ରାରମ୍ଭ ପରଠାରୁ ତିବ୍ଦତୀୟ ଲୋକମାନେ ଗଭୀର ଆଧ୍ୟାତ୍ମିକ ଏବଂ ସାଂସ୍କୃତିକ ବନ୍ଧନର ଶକ୍ତିରେ 'ତୁଷାର ଭୂମି'(ତିବ୍ଦତ)ର ପ୍ରକୃତ ରକ୍ଷକ ହୋଇ ରହିଛନ୍ତି। ତେଣୁ ଆମେ ତିବ୍ଦତରେ ରହୁଥିବା ତିବ୍ଦତୀୟମାନଙ୍କୁ ଅନୁରୋଧ କରୁଛୁ ଯେ ସେମାନେ ସେମାନଙ୍କ ପିଲାମାନଙ୍କ ମଧ୍ୟରେ ତିବ୍ଦତୀୟ ଭାଷା, ଧର୍ମ ଏବଂ ସଂସ୍କୃତି ଉପରେ ଆଧାରିତ ଦୃଢ଼ ପରିଚୟର ଭାବନା ବିକଶିତ କରି ପାରିବାରିକ ସ୍ତରରେ ଆରମ୍ଭ କରନ୍ତୁ।

ହିନ୍ଦୁସ୍ଥାନ ସମାଚାର/ବୀଣାପାଣି

.......................................

ହିନ୍ଦୁସ୍ଥାନ ସମାଚାର / ବୀଣାପାଣି