ରାୟପୁର, ୨୮ ମଇ (ହି.ସ.)- ଛତିଶଗଡ଼ରେ ପ୍ରବଳ ଗରମ ଏବଂ ଗ୍ରୀଷ୍ମ ପ୍ରବାହ ଯୋଗୁୁଁଁ ଅନେକ ଅଂଚଳରେ ମୟୂର ଏବଂ ବାଦୁଡ଼ି ସମେତ ଅନେକ ବନ୍ୟଜନ୍ତୁଙ୍କ ମୃତ୍ୟୁ ଘଟିଛି । ଦୁଇ ଦିନ ପୂର୍ବରୁ, ଖୈରାଗଡ଼ ଜିଲ୍ଲାର ଦଲ୍ଲିଖୋଲି-ଲଛନା ଜଙ୍ଗଲରେ ମୟୂର ଏବଂ ପାମ୍ ସିଭେଟ ସମେତ ଅନେକ ବନ୍ୟଜନ୍ତୁ ମୃତ ଅବସ୍ଥାରେ ମିଳିଥିଲେ ।

ଖୈରାଗଡ଼ ଡିଏଫଓ ପଙ୍କଜ ରାଜପୁତ ଗୁରୁବାର ଦିନ ଲଛନା ଏବଂ ଦଲ୍ଲିଖୋଲି ଜଙ୍ଗଲରେ ବନ୍ୟଜନ୍ତୁଙ୍କ ମୃତ୍ୟୁ ଉପରେ ଏକ ସରକାରୀ ବିବୃତି ଜାରି କରି କହିଛନ୍ତି ଯେ, ପଶୁ ଚିକିତ୍ସକଙ୍କ ପ୍ରାଥମିକ ଯାଂଚ୍ ଆଧାରରେ ସନ୍ଦେହ କରାଯାଉଛି ଯେ ଅତ୍ୟଧିକ ଉତାପ ଏବଂ ହିଟ୍ ଷ୍ଟ୍ରୋକ(ଲୁ) କାରଣରୁ ଏହି ପଶୁ ପକ୍ଷୀଙ୍କ ମୃତ୍ୟୁ ଘଟିଛି । ମୃତ୍ୟୁର ସଠିକ୍ କାରଣ ଜାଣିବା ପାଇଁ ମୃତ ଜୀବମାନଙ୍କ ଭିସେରା ନମୁନା ଏବଂ ସେହି ଅଂଚଳର ଜଳ ଛିଦ୍ରରୁ ପାଣିର ନମୁନା ପରୀକ୍ଷା ପାଇଁ ପରୀକ୍ଷାଗାରକୁ ପଠାଯାଇଛି ।

ଡିଏଫଓ ଆଜି ସ୍ପଷ୍ଟ କରିଛନ୍ତି ଯେ, ଜଙ୍ଗଲରେ ମୟୂର, ସିଭେଟ ଏବଂ ଅନ୍ୟ କେତେକ ବନ୍ୟ ପକ୍ଷୀଙ୍କ ସମେତ ପ୍ରାୟ ୧୦ଟି ବନ୍ୟଜନ୍ତୁ ମୃତ ଅବସ୍ଥାରେ ଦେଖିବାକୁ ମିଳିଛି । ପରୀକ୍ଷାଗାରରୁ ଫରେନସିକ୍ ରିପୋର୍ଟ ଆସିବା ପରେ ହିଁ ମୃତ୍ୟୁର ଚୂଡ଼ାନ୍ତ ଏବଂ ଆନୁଷ୍ଠାନିକ ନିଶ୍ଚିତତା କରାଯିବ ବୋଲି ସେ କହିଛନ୍ତି । ବିଳାସପୁରର କାନନ ପେଣ୍ଡାରୀର ପଶୁ ଚିକିତ୍ସକମାନଙ୍କର ଏକ ସ୍ୱତନ୍ତ୍ର ଦଳ ମୃତ ପଶୁ ଏବଂ ପକ୍ଷୀମାନଙ୍କର ଶବ ବ୍ୟବଚ୍ଛେଦ କରିଛନ୍ତି । ସମଗ୍ର ପ୍ରକ୍ରିୟାର ଭିଡିଓଗ୍ରାଫି ଏବଂ ଫଟୋ ଉଠାଯାଇଛି । ମୃତ୍ୟୁର ସଠିକ୍ କାରଣ ଜାଣିବା ପାଇଁ ଭିସେରା ନମୁନା ଏବଂ ପାଣିର ନମୁନା ଫରେନସିକ୍ ପରୀକ୍ଷା ପାଇଁ ପଠାଯାଇଛି, ଯାହାର ରିପୋର୍ଟ ଏପର୍ଯ୍ୟନ୍ତ ଆସିନାହିଁ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ