କୋଲକାତା, ୦୮ ମଇ(ହି.ସ.) – ପଶ୍ଚିମବଙ୍ଗରେ ପ୍ରଥମ ଭାରତୀୟ ଜନତା ପାର୍ଟି(ବିଜେପି) ସରକାରର ଶପଥ ଗ୍ରହଣ ସମାରୋହ ସମୟରେ କୋଲକାତାର ବ୍ରିଗେଡ୍ ଗ୍ରାଉଣ୍ଡରେ ଏକ ଭାବପ୍ରବଣ ଏବଂ ଐତିହାସିକ ଦୃଶ୍ୟ ଦେଖିବାକୁ ମିଳିଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଂଚରେ ୯୭ବର୍ଷ ବୟସ୍କ ବରିଷ୍ଠ ବିଜେପି କର୍ମୀ ମାଖନ ଲାଲ ସରକାରଙ୍କ ପାଦ ଛୁଇଁ ତାଙ୍କ ଆଶୀର୍ବାଦ ଲୋଡିଥିଲେ। ଏହି ଦୃଶ୍ୟ ଉତ୍ସବରେ ଉପସ୍ଥିତ ଲୋକଙ୍କ ଦୃଷ୍ଟି ଆକର୍ଷଣ କରିଥିଲା।

ମାଖନଲାଲ ସରକାର ଭାରତୀୟ ଜନସଂଘର ପ୍ରତିଷ୍ଠାତା ଥିଲେ, ଡ. ଶ୍ୟାମା ପ୍ରସାଦ ମୁଖାର୍ଜୀ ତାଙ୍କର ଜଣେ ଘନିଷ୍ଠ ସହଯୋଗୀ ଥିଲେ। ବିଜେପି ନେତାଙ୍କ କହିବା ଅନୁଯାୟୀ, କାଶ୍ମୀର ଆନ୍ଦୋଳନ ସମୟରେ ଶ୍ୟାମା ପ୍ରସାଦ ମୁଖାର୍ଜୀଙ୍କ ଐତିହାସିକ ଗସ୍ତରେ ମାଖନଲାଲ ସରକାର ମଧ୍ୟ ତାଙ୍କ ସହ ଥିଲେ। ଶ୍ୟାମା ପ୍ରସାଦ ମୁଖାର୍ଜୀଙ୍କୁ ଗିରଫ କରାଯାଇଥିଲା ଏବଂ ସେହି ସମୟରେ କାଶ୍ମୀରରେ ତ୍ରିରଙ୍ଗା ଉତୋଳନ ଅଭିଯାନ ପରେ ଜେଲରେ ରହସ୍ୟଜନକ ଭାବରେ ମୃତ୍ୟୁ ବରଣ କରିଥିଲେ। ସେହି ସମୟରେ ମାଖନଲାଲ ସରକାର ମଧ୍ୟ ତାଙ୍କ ସହିତ ଜେଲରେ ଥିଲେ ବୋଲି ସୂଚନା ମିଳିଛି।

ମଂଚରୁ ମାଖନଲାଲ ସରକାରଙ୍କ ପରିଚୟ ଦେଇ ରାଜ୍ୟ ବିଜେପି ସଭାପତି ତଥା ଲୋକସଭା ସାଂସଦ ସୌମିକ୍ ଭଟ୍ଟାଚାର୍ଯ୍ୟ କହିଛନ୍ତି ଯେ ସେ ୧୯୫୨ର କାଶ୍ମୀର ଆନ୍ଦୋଳନରେ ଗିରଫ ହୋଇଥିଲେ ଏବଂ ଶେଷ ଦିନରେ ଶ୍ୟାମା ପ୍ରସାଦ ମୁଖାର୍ଜୀଙ୍କ ଘନିଷ୍ଠ ସହଯୋଗୀ ରହିଥିଲେ।

ଉତର ବଙ୍ଗରେ ଦଳର ସଂଗଠନ ଗଠନ କରିବାରେ ମାଖନଲାଲ ସରକାର ପ୍ରମୁଖ ଭୂମିକା ଗ୍ରହଣ କରିଥିଲେ। ୧୯୮୦ରେ ବିଜେପି ଗଠନ ହେବା ପରେ ତାଙ୍କୁ ପଶ୍ଚିମ ଦିନାଜପୁର, ଜଲପାଇଗୁଡ଼ି ଏବଂ ଦାର୍ଜିଲିଂ ଅଂଚଳର ସାଂଗଠନିକ ଦାୟିତ୍ୱ ଦିଆଯାଇଥିଲା। ଅଳ୍ପ ସମୟ ମଧ୍ୟରେ ସେ ହଜାର ହଜାର ନୂଆ ସଦସ୍ୟଙ୍କୁ ସାମିଲ କରି ଉତର ବଙ୍ଗରେ ବିଜେପି ପାଇଁ ଏକ ଦୃଢ଼ ଆଧାର ନିର୍ମାଣ କରିଥିଲେ। ପରେ, ସେ ସିଲିଗୁଡ଼ି ସାଂଗଠନିକ ଜିଲ୍ଲାର ପ୍ରଥମ ବିଜେପି ସଭାପତି ମଧ୍ୟ ହୋଇଥିଲେ ଏବଂ କ୍ରମାଗତ ସାତ ବର୍ଷ ଧରି ଏହି ପଦବୀରେ ରହିଥିଲେ।

ହିନ୍ଦୁସ୍ଥାନ ସମାଚାର/ବୀଣାପାଣି

.......................................

ହିନ୍ଦୁସ୍ଥାନ ସମାଚାର / ବୀଣାପାଣି