ବାରାଣସୀ, ଜୁଲାଇ ୧୬ (ହି.ସ.) - ସ୍ୱାମୀ ଏବଂ ଦୁଇ ପୁଅଙ୍କୁ ହରାଇବା ପରେ ସାଂସାରିକ ଜୀବନରେ ମୋହଭଙ୍ଗ ଦେଇଥିବା ତାମିଲନାଡୁର ଜଣେ ୮୦ ବର୍ଷ ବୟସ୍କା ମହିଳା ଶ୍ରୀ କାଶୀ ବିଶ୍ୱନାଥ ମନ୍ଦିରକୁ ଧାର୍ମିକ ଏବଂ ଜନକଲ୍ୟାଣ କାର୍ଯ୍ୟ ପାଇଁ ଗୁପ୍ତ ଭାବେ ୩ କୋଟି ଟଙ୍କା ଦାନ କରିଛନ୍ତି। ମହିଳାଙ୍କ ଇଚ୍ଛାକୁ ସମ୍ମାନ ଜଣାଇ ମନ୍ଦିର ପ୍ରଶାସନ ତାଙ୍କ ପରିଚୟକୁ ଗୋପନ ରଖିଛି।

ମନ୍ଦିର ପ୍ରଶାସନ ଅନୁଯାୟୀ, ମହିଳା ଜଣକ ତାଙ୍କ ଦୁଇ ମୃତ ପୁଅଙ୍କ ସ୍ମୃତିରେ ଦୁଇ କୋଟି ଟଙ୍କା ଏବଂ ମନ୍ଦିରର ଅନ୍ନକ୍ଷେତ୍ର ପାଇଁ ଏକ କୋଟି ଟଙ୍କାର ଚେକ୍ ମନ୍ଦିର ଟ୍ରଷ୍ଟକୁ ହସ୍ତାନ୍ତର କରିଥିଲେ। ଏହା ମନ୍ଦିରକୁ ଏପର୍ଯ୍ୟନ୍ତ ସବୁଠାରୁ ବଡ ବ୍ୟକ୍ତିଗତ ଦାନ ବୋଲି ବିଶ୍ୱାସ କରାଯାଏ । ଏହାପୂର୍ବରୁ ଅମ୍ବାନୀ ପରିବାର ମନ୍ଦିରକୁ ୨.୫୦ କୋଟି ଟଙ୍କା ଦାନ କରିଥିଲେ।

ମହିଳା ଜଣକ ବାରାଣସୀ ଡିଭିଜନର କମିଶନର ଏସ୍. ରାଜଲିଙ୍ଗମଙ୍କୁ ଏକ ଇ-ମେଲ ମାଧ୍ୟମରେ ମନ୍ଦିରକୁ ଦାନ କରିବାକୁ ଇଚ୍ଛା ପ୍ରକାଶ କରିଥିଲେ ଏବଂ ତାଙ୍କୁ ବ୍ୟକ୍ତିଗତ ଭାବେ ଭେଟିବାକୁ ଅନୁରୋଧ କରିଥିଲେ। ଏହାପରେ ଅଧିକାରୀମାନେ ସେମାନଙ୍କ ସହ ଯୋଗାଯୋଗ ସ୍ଥାପନ କରିଥିଲେ। ତାଙ୍କ ପରିଚୟକୁ ଆରମ୍ଭରୁ ଗୋପନୀୟ ରଖିବାକୁ ମହିଳା ଅନୁରୋଧ କରିଥିଲେ।

ମହିଳା ଜଣକ ତାଙ୍କ ମ୍ୟାନେଜରଙ୍କ ସହ ଜୁଲାଇ ୧୨ ତାରିଖରେ ଡିଭିଜନାଲ କମିଶନରଙ୍କୁ ଭେଟିଥିଲେ ଏବଂ ପ୍ରତ୍ୟେକଙ୍କୁ ୩ କୋଟି ଟଙ୍କାର ଦୁଇଟି ଚେକ୍ ପ୍ରଦାନ କରିଥିଲେ। ଏହା ବ୍ୟତୀତ ସେ ୫ ଲକ୍ଷ ଟଙ୍କାର ପାଂଚଟି ଭିନ୍ନ ଭିନ୍ନ ଚେକ୍ ମଧ୍ୟ ଦେଇଥିଲେ। ଏହି ରାଶି ସହିତ ପ୍ରତିବର୍ଷ ଶ୍ରୀ କାଶୀ ବିଶ୍ୱନାଥ ମନ୍ଦିରରେ ରୁଦ୍ରଭିଷେକ କରାଯାଉ ବୋଲି କାମନା କରିଥିଲେ। ଦାନର ଆନୁଷ୍ଠାନିକତା ଶେଷ କରିବା ପରେ ମହିଳା ଜଣକ ଶ୍ରୀ କାଶୀ ବିଶ୍ୱନାଥ ମନ୍ଦିରରେ ପୂଜାର୍ଚ୍ଚନା କରିଥିଲେ ଏବଂ ବିନା କୌଣସି ପ୍ରଚାରରେ ବାରାଣସୀରୁ ଫେରିଥିଲେ।

ହିନ୍ଦୁସ୍ଥାନ ସମାଚାର / ଭାନୁ ଚରଣ