ନୂଆଦିଲ୍ଲୀ, ଜୁଲାଇ 18 (ହି.ସ): ଡାକ ବିଭାଗ (ଇଣ୍ଡିଆ ପୋଷ୍ଟ) ର ଅଫିସିଆଲ୍ ମାସ୍କଟ୍ ଡିଜାଇନ୍ କରିବାକୁ କେନ୍ଦ୍ର ସରକାର ସାରା ଦେଶର ନାଗରିକଙ୍କଠାରୁ ଏଣ୍ଟ୍ରି ଆମନ୍ତ୍ରିତ କରିଛନ୍ତି। ଏଥିପାଇଁ ଇନୋଭେଟ୍ ଇଣ୍ଡିଆ ମାଇଗଭ୍ ପ୍ଲାଟଫର୍ମରେ ଏକ ମାସ୍କଟ୍ ଡିଜାଇନ୍ ପ୍ରତିଯୋଗିତା ଆରମ୍ଭ କରାଯାଇଛି। ଏହି ପଦକ୍ଷେପର ଉଦ୍ଦେଶ୍ୟ ହେଉଛି ବ୍ରାଣ୍ଡ ଆମ୍ବାସାଡର ସୃଷ୍ଟି କରିବା, ଯେଉଁମାନେ ପ୍ରଭାବଶାଳୀ ଢଙ୍ଗରେ ଭାରତୀୟ ଡାକ ବିଭାଗର ବିଶ୍ୱସନୀୟ ସେବା, ଜନସମ୍ପର୍କ ଏବଂ ଡିଜିଟାଲ ନବସୃଜନର ପରିଚୟ ପ୍ରଦାନ କରିପାରିବେ।

କେନ୍ଦ୍ର ଯୋଗାଯୋଗ ମନ୍ତ୍ରଣାଳୟ ଅନୁଯାୟୀ, ଏହି ପ୍ରତିଯୋଗିତା 15 ଜୁଲାଇରୁ 15 ଅଗଷ୍ଟ 2026 ପର୍ଯ୍ୟନ୍ତ ଅନୁଷ୍ଠିତ ହେବ। ଯେକୌଣସି ଭାରତୀୟ ନାଗରିକ ଏଥିରେ ଅଂଶଗ୍ରହଣ କରିପାରିବେ। ଅଂଶଗ୍ରହଣକାରୀମାନଙ୍କୁ ସେମାନଙ୍କର ମୂଳ ମାସ୍କଟ୍ ଡିଜାଇନ୍, ଏହାର ଉପଯୁକ୍ତ ନାମ ଏବଂ ଇନୋଭେଟ୍ ଇଣ୍ଡିଆ ମାଇଗଭ୍ ପୋର୍ଟାଲରେ ଅନଲାଇନ୍ ଏକ ଧାରଣା ନୋଟ୍ ଦାଖଲ କରିବାକୁ ପଡିବ।

ପ୍ରତିଯୋଗିତାରେ ଶ୍ରେଷ୍ଠ ତିନୋଟି ମାସ୍କଟ ଡିଜାଇନ ପାଇଁ ଯଥାକ୍ରମେ 75 ହଜାର, 50 ହଜାର ଏବଂ 25 ହଜାର ଟଙ୍କାର ନଗଦ ପୁରସ୍କାର ସ୍ଥିର କରାଯାଇଛି। ଏଥି ସହିତ ଶ୍ରେଷ୍ଠ ତିନୋଟି ନାମ ପାଇଁ ଯଥାକ୍ରମେ 25 ହଜାର, 15 ହଜାର ଏବଂ 10 ହଜାର ଟଙ୍କାର ପୁରସ୍କାର ପ୍ରଦାନ କରାଯିବ। ସମସ୍ତ ବିଜେତାଙ୍କୁ ପ୍ରମାଣପତ୍ର ମଧ୍ୟ ପ୍ରଦାନ କରାଯିବ। ମାସ୍କଟ୍ ଡିଜାଇନ୍ ଏବଂ ନାମକରଣ ପାଇଁ ବିଭିନ୍ନ ବର୍ଗରେ ପୁରସ୍କାର ଦିଆଯିବ ବୋଲି ମନ୍ତ୍ରଣାଳୟ ସ୍ପଷ୍ଟ କରିଛି।

ଏହି ପ୍ରତିଯୋଗିତା ମାଧ୍ୟମରେ ଚୟନ ହୋଇଥିବା ମାସ୍କଟ ଭାରତୀୟ ଡାକ ବିଭାଗର ଅଫିସିଆଲ୍ ବ୍ରାଣ୍ଡ ଆମ୍ବାସାଡର ହେବେ। ଏହା ପ୍ରଚାର ଅଭିଯାନ, ଡାକ ଟିକଟ, ଜନ ସଚେତନତା କାର୍ଯ୍ୟକ୍ରମ, ପ୍ରଦର୍ଶନୀ, ସୋସିଆଲ ମିଡିଆ ଅଭିଯାନ ଏବଂ ବିଭାଗର ଅନ୍ୟାନ୍ୟ ସରକାରୀ ଗଣମାଧ୍ୟମରେ ବ୍ୟବହୃତ ହେବ।

ଏହି ପ୍ରତିଯୋଗିତାରେ ବ୍ୟାପକ ଭାବେ ଅଂଶଗ୍ରହଣ କରିବା ଲାଗି ଛାତ୍ରଛାତ୍ରୀ, ଡିଜାଇନର୍, କଳାକାର ଏବଂ ସୃଜନଶୀଳ କ୍ଷେତ୍ର ସହ ଜଡ଼ିତ ସମସ୍ତଙ୍କୁ ଡାକ ବିଭାଗ ନିବେଦନ କରିଛି। ବିଭାଗ କହିଛି ଯେ ଏହି ପଦକ୍ଷେପ କେବଳ ଭାରତୀୟ ଡାକ ବିଭାଗର ଏକ ନୂତନ ଦୃଶ୍ୟ ପରିଚୟ ବିକଶିତ କରିବାର ସୁଯୋଗ ନୁହେଁ ବରଂ ଦେଶର ସୃଜନଶୀଳ ପ୍ରତିଭାମାନଙ୍କୁ ଜାତୀୟ ସ୍ତରରେ ନିଜର ପରିଚୟ ସୃଷ୍ଟି କରିବା ପାଇଁ ଏକ ମଞ୍ଚ ମଧ୍ୟ ପ୍ରଦାନ କରିବ।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା