ନୂଆଦିଲ୍ଲୀ, ୧୮ ଜୁଲାଇ (ହି.ସ.)। ଭାରତୀୟ ମହିଳା ହକି ଦଳର ଅଧିନାୟିକା ସଲିମା ଟେଟେ କହିଛନ୍ତି ଯେ ୨୦୨୬ ଏଫଆଇଏଚ୍ ମହିଳା ହକି ବିଶ୍ୱକପ୍ରେ ଦଳର ଲକ୍ଷ୍ୟ କେବଳ ଭଲ ପ୍ରଦର୍ଶନ କରିବା ନୁହେଁ, ବରଂ ଫାଇନାଲରେ ପହଞ୍ଚି ଇତିହାସ ରଚିବା। ସେ କହିଛନ୍ତି ଯେ ଏଫଆଇଏଚ୍ ନେସନ୍ସ କପ୍ ଜିତିବା ପରେ ଦଳର ଆତ୍ମବିଶ୍ୱାସ ଯଥେଷ୍ଟ ବୃଦ୍ଧି ପାଇଛି ଏବଂ ସମସ୍ତ ଖେଳାଳି ବିଶ୍ୱର ଶ୍ରେଷ୍ଠ ଦଳଗୁଡ଼ିକୁ ଚ୍ୟାଲେଞ୍ଜ କରିବାକୁ ପ୍ରସ୍ତୁତ।୧୫ ରୁ ୩୦ ଅଗଷ୍ଟ ପର୍ଯ୍ୟନ୍ତ ବେଲଜିୟମ ଏବଂ ନେଦରଲ୍ୟାଣ୍ଡରେ ଅନୁଷ୍ଠିତ ହେବାକୁ ଥିବା ମହିଳା ହକି ବିଶ୍ୱକପ୍ ପାଇଁ ଭାରତକୁ ଚୀନ୍, ଦକ୍ଷିଣ ଆଫ୍ରିକା ଏବଂ ଇଂଲଣ୍ଡ ସହିତ ପୁଲ୍ ଡିରେ ସ୍ଥାନିତ କରାଯାଇଛି। ଭାରତ ଅଗଷ୍ଟ ୧୬ ରେ ଚୀନ୍ ବିପକ୍ଷରେ ତା’ର ଅଭିଯାନ ଆରମ୍ଭ କରିବ।ସଲିମା ବିଶ୍ୱକପ୍ରେ ପ୍ରଥମ ଥର ପାଇଁ ଭାରତୀୟ ଦଳର ଅଧିନାୟକ ହେବେ।ବିଶ୍ୱକପରେ ପ୍ରଥମ ଥର ପାଇଁ ଭାରତୀୟ ଦଳର ଅଧିନାୟକ ହେବାକୁ ଥିବା ସଲିମା ହକି ଇଣ୍ଡିଆ ସହିତ ଏକ ସାକ୍ଷାତକାରରେ କହିଛନ୍ତି, ଏହା ମୋ ପାଇଁ ଏକ ଅତ୍ୟନ୍ତ ସ୍ୱତନ୍ତ୍ର ଅନୁଭବ। ମୁଁ ଉତ୍ସାହିତ ଏବଂ ଟିକେ ନର୍ଭସ, କାରଣ ଏହା ସବୁଠାରୁ ବଡ଼ ହକି ଟୁର୍ଣ୍ଣାମେଣ୍ଟ ଏବଂ ଭାରତର ଅଧିନାୟକତ୍ୱ ଏକ ବଡ଼ ଦାୟିତ୍ୱ। ପ୍ରତ୍ୟେକ ଖେଳାଳି ବିଶ୍ୱକପରେ ଖେଳିବାର ସ୍ୱପ୍ନ ଦେଖିଥାଏ, ଏବଂ ଦଳର ଅଧିନାୟକତ୍ୱ କରିବାର ସୁଯୋଗ ଏହାକୁ ଆହୁରି ସ୍ୱତନ୍ତ୍ର କରିଥାଏ।ସେ ଆହୁରି କହିଛନ୍ତି, ଗତ ବିଶ୍ୱକପରେ ଆମେ ଭଲ ହକି ଖେଳିଥିଲୁ, କିନ୍ତୁ ଫଳାଫଳ ଆମ ଇଚ୍ଛାରେ ନଥିଲା। ଏଥର, ଆମେ ସମସ୍ତେ ଫାଇନାଲରେ ପହଞ୍ଚିବା ଏବଂ ଆହୁରି ଆଗକୁ ଯିବା ବିଷୟରେ କଥା ହେଉଛୁ। ଏହା ଆମର ମିଳିତ ସ୍ୱପ୍ନ। ମୋର ପ୍ରଥମ ଦାୟିତ୍ୱ ହେଉଛି ଭଲ ପ୍ରଦର୍ଶନ କରିବା ଯାହା ଦ୍ଵାରା ମୁଁ ମୋ ଖେଳ ସହିତ ଦଳକୁ ନେତୃତ୍ୱ ଦେଇପାରିବି। ମୁଁ ବିଶେଷକରି ଯୁବ ଖେଳାଳିମାନଙ୍କୁ ପ୍ରତ୍ୟେକ ପ୍ରକାରେ ସାହାଯ୍ୟ କରିବାକୁ ମଧ୍ୟ ଚାହେଁ।

---------------

ହିନ୍ଦୁସ୍ଥାନ ସମାଚାର / ରଶ୍ମିତା