ନାମଚି, ଜୁଲାଇ 21 (ହି.ସ)। ଦକ୍ଷିଣ ସିକିମର ସମାର୍ଦୁଙ୍ଗରେ ନିର୍ମାଣାଧୀନ ନ୍ୟାସନାଲ ହାଇଡ୍ରୋଇଲେକ୍ଟ୍ରିକ ପାୱାର କର୍ପୋରେସନ୍ ଲିମିଟେଡ୍ (ଏନ୍. ଏଚ୍. ପି. ସି.) ର ତିସ୍ତା ଷ୍ଟେଜ୍-6 ଜଳବିଦ୍ୟୁତ ପ୍ରକଳ୍ପର ଏକ ସୁଡ଼ଙ୍ଗରେ ଫସି ରହିଥିବା ଶ୍ରମିକମାନଙ୍କୁ ଖୋଜିବା ଏବଂ ଉଦ୍ଧାର କାର୍ଯ୍ୟ ଜାରି ରହିଛି। ଇତି ମଧ୍ୟରେ ଆଉ ଦୁଇଟି ମୃତଦେହ ମିଳିଛି। ଏହା ସହିତ ଏହି ଘଟଣାରେ ମୃତ୍ୟୁ ସଂଖ୍ୟା ନଅକୁ ବୃଦ୍ଧି ପାଇଛି। ମୃତ୍ୟୁ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି।

ନାମଚି ଜିଲ୍ଲା ପ୍ରଶାସନ ଅନୁଯାୟୀ, ମୃତ୍ୟୁ ସଂଖ୍ୟା ନଅକୁ ବୃଦ୍ଧି ପାଇଥିବା ବେଳେ ଉକ୍ତ ସ୍ଥାନରେ ରିଲିଫ ଏବଂ ଉଦ୍ଧାର କାର୍ଯ୍ୟ ଜାରି ରହିଛି। ଜାତୀୟ ବିପର୍ଯ୍ୟୟ ପ୍ରଶମନ ବଳ (ଏନ୍. ଡି. ଆର୍. ଏଫ୍.) ଏବଂ ଅନ୍ୟାନ୍ୟ ସମ୍ପୃକ୍ତ ସଂସ୍ଥା ସୁଡ଼ଙ୍ଗ ଭିତରେ ଫସି ରହିଥିବା ଶ୍ରମିକମାନଙ୍କୁ ଉଦ୍ଧାର କରିବାକୁ ଚେଷ୍ଟା କରୁଛନ୍ତି। ଜିଲ୍ଲା ପ୍ରଶାସନର ବରିଷ୍ଠ ଅଧିକାରୀମାନେ ପରିସ୍ଥିତି ଉପରେ ନଜର ରଖିଛନ୍ତି।

ସୋମବାର ଅପରାହ୍ନରେ ନାମଚି ଜିଲ୍ଲାର ସମାର୍ଦୁଙ୍ଗ୍ ଠାରେ ନିର୍ମାଣାଧୀନ ଏନ୍. ଏଚ୍. ପି. ସି. ର ତିସ୍ତା ଷ୍ଟେଜ୍-6 ଜଳବିଦ୍ୟୁତ ପ୍ରକଳ୍ପର ସୁଡ଼ଙ୍ଗରେ ଏକ ବଡ଼ ଦୁର୍ଘଟଣା ଘଟିଥିଲା। ସୁଡ଼ଙ୍ଗ ଭିତରେ କାମ ଚାଲିଥିବା ବେଳେ ଶ୍ରମିକମାନେ ହଠାତ୍ ଏକ ଜୋରରେ ଶବ୍ଦ ଶୁଣିଥିଲେ, ଯାହା ପରେ ସୁଡ଼ଙ୍ଗ ଭିତରେ ଗ୍ୟାସ୍ ଲିକ୍ ଆରମ୍ଭ ହୋଇଥିଲା। ଏହି ଘଟଣା ପରେ ଶ୍ରମିକମାନେ ଭୟଭୀତ ହୋଇ ନିଜ ଜୀବନ ବଞ୍ଚାଇବା ପାଇଁ ସୁଡ଼ଙ୍ଗ ବାହାରକୁ ଦୌଡ଼ିବା ଆରମ୍ଭ କରିଥିଲେ। ଏହି ସମୟରେ କିଛି ଶ୍ରମିକ ବାହାରକୁ ବାହାରିବାରେ ସଫଳ ହୋଇଥିବାବେଳେ ଅନ୍ୟମାନେ ସୁଡ଼ଙ୍ଗ ଭିତରେ ଫସି ରହିଥିଲେ। ଅନେକ ଶ୍ରମିକ ଏବେ ବି ସୁଡ଼ଙ୍ଗ ଭିତରେ ଫସି ରହିଛନ୍ତି।

-------------

ହିନ୍ଦୁସ୍ଥାନ ସମାଚାର / ସ୍ୱାଗତିକା