ନୂଆଦିଲ୍ଲୀ, ୨୧ ଜୁଲାଇ (ହି.ସ.) ପ୍ରଧାନମନ୍ତ୍ରୀ ଆବାସ ନିକଟରେ ପ୍ରଦର୍ଶନ କରୁଥିବା କଂଗ୍ରେସ ନେତା ରାହୁଲ ଗାନ୍ଧୀଙ୍କ ସହ ଭେଟିବା ପରେ କେନ୍ଦ୍ରୀୟ ମନ୍ତ୍ରୀ ଡଃ ଜିତେନ୍ଦ୍ର ସିଂହ ଅଭିଯୋଗ କରିଛନ୍ତି ଯେ ବିରୋଧୀ ଦଳର ନେତା ନିଜ କଥାରୁ ଓହରି ଯାଇଛନ୍ତି। ସେ ପୂର୍ବରୁ କହିଥିଲେ ଯେ ସଂସଦରେ ନୀଟ୍ ଉପରେ ଆଲୋଚନାର ଦାବି ଗ୍ରହଣ କରାଗଲେ ସେ ପ୍ରଦର୍ଶନ ସମାପ୍ତ କରିଦେବେ, କିନ୍ତୁ ଏହି କଥା ମାନି ନିଆଯିବା ପରେ ମଧ୍ୟ ସେ ପ୍ରଦର୍ଶନ ବନ୍ଦ କରିନଥିଲେ।
ସିଂହ କହିଛନ୍ତି ଯେ ସରକାର ‘ନୀଟ୍’ ଏବଂ ଏହା ସହିତ ଜଡିତ ସମସ୍ତ ବିଷୟ ଉପରେ ସଂସଦରେ ଆଲୋଚନା ପାଇଁ ପ୍ରସ୍ତୁତ ଅଛନ୍ତି। ଏହାର ବିପରୀତ କଂଗ୍ରେସ ପାର୍ଟି ଆଜି ପର୍ଯ୍ୟନ୍ତ ଏହି ଗୁରୁତର ବିଷୟ ଉପରେ ନିୟମ ଅନୁସାରେ ଔପଚାରିକ ଆଲୋଚନା ପାଇଁ କୌଣସି ନୋଟିସ ଦେଇନାହିଁ। ରାହୁଲ ଗାନ୍ଧୀଙ୍କ ବ୍ୟବହାର ଗଣତନ୍ତ୍ରର ନୀତି ସହ ମେଳ ଖାଉନାହିଁ।
କେନ୍ଦ୍ରୀୟ ମନ୍ତ୍ରୀ କହିଛନ୍ତି ଯେ କଂଗ୍ରେସ ନେତା ଅଚାନକ ଅକବର ରୋଡ୍ ନିକଟରେ ନିଜ ସମର୍ଥକମାନଙ୍କ ସହ ଧାରଣାରେ ବସିଥିଲେ। ସରକାର ତାଙ୍କୁ ଏବଂ କେନ୍ଦ୍ରୀୟ ଗୃହ ସଚିବ ଗୋବିନ୍ଦ ମୋହନଙ୍କୁ ବରିଷ୍ଠ ନେତାମାନଙ୍କ ସହ ଆଲୋଚନା ପାଇଁ ପଠାଇଥିଲା। ରାହୁଲ ଗାନ୍ଧୀ ପ୍ରଥମେ ସଂସଦରେ ନୀଟ୍ ଏବଂ ଏହା ସହ ଜଡିତ ସମସ୍ତ ବିଷୟ ଉପରେ ଆଲୋଚନାର ଦାବି କରିଥିଲେ ଏବଂ ତୁରନ୍ତ ଧାରଣା ସମାପ୍ତ କରିବାକୁ ଆଶ୍ୱାସନ ଦେଇଥିଲେ।
ତାଙ୍କ କଥା ମାନି ନିଆଯିବା ପରେ ସେ କହିଥିଲେ ଯେ ସେ ଏତିକିରେ ମାନିବେ ନାହିଁ ଏବଂ କେନ୍ଦ୍ରୀୟ ଶିକ୍ଷା ମନ୍ତ୍ରୀଙ୍କ ଇସ୍ତଫା ଦାବି କରିଥିଲେ। ସିଂହ କହିଛନ୍ତି, “ତାଙ୍କ ପରି ବରିଷ୍ଠ ନେତାଙ୍କ ପାଇଁ ଏତେ ଶୀଘ୍ର ନିଜ କଥାରୁ ଓହରିଯିବା ଶୋଭା ଦିଏ ନାହିଁ, ତେଣୁ ସେ କହିଲେ ଯେ ଏହା ତାଙ୍କ ଇଚ୍ଛା। ଯେତେବେଳେ ଗୃହ ସଚିବ ବୁଝାଇବାକୁ ଚେଷ୍ଟା କଲେ ଯେ ଏହି ସ୍ଥାନ ଧାରଣା ପାଇଁ ଉପଯୁକ୍ତ ନୁହେଁ, ସେତେବେଳେ ତାଙ୍କ ଉତର ଥିଲା ଯେ ଏହା ମଧ୍ୟ ତାଙ୍କ ଇଚ୍ଛା, ସେ ଯେଉଁଠି ବସିବେ।
---------------
---------------
ହିନ୍ଦୁସ୍ଥାନ ସମାଚାର / ଗଗନ