ନାମଚି, ୨୨ ଜୁଲାଇ (ହି.ସ.)- ଦକ୍ଷିଣ ସିକ୍କିମର ନାମଚି ଜିଲ୍ଲା ଅନ୍ତର୍ଗତ ସମରଦୁଙ୍ଗ, ଝୋଲୁଙ୍ଗେ ସ୍ଥିତ ଏନଏଚପିସି ତୀସ୍ତା ପର୍ଯ୍ୟାୟ-୬ ଜଳବିଦ୍ୟୁତ ପ୍ରକଳ୍ପର ସୁରଙ୍ଗରେ ଖୋଜ ଏବଂ ଉଦ୍ଧାର ଅଭିଯାନ ବୁଧବାର ସକାଳରୁ ପୁଣି ଆରମ୍ଭ କରାଯାଇଛି। ସୁରଙ୍ଗ ଭିତରେ ବହୁ ପରିମାଣର କାଦୁଅ ଏବଂ ପାଣି ଜମା ହୋଇଥିବାରୁ କିଛି ସମୟ ପାଇଁ ଉଦ୍ଧାର ଅଭିଯାନ ବନ୍ଦ କରିବାକୁ ପଡ଼ିଥିଲା।
ମଙ୍ଗଳବାର ସୁଦ୍ଧା ସୁରଙ୍ଗରୁ ୧୨ ଜଣଙ୍କ ମୃତଦେହ ଉଦ୍ଧାର କରାଯାଇଛି। ତେବେ, ସୁରଙ୍ଗ ଭିତରେ ପ୍ରତିକୂଳ ପରିସ୍ଥିତି ଥିବାରୁ ଉଦ୍ଧାରକାରୀ ଦଳ ଅଭିଯାନକୁ ଆଗକୁ ଜାରି ରଖିପାରିନଥିଲେ। ଆଜି ଭୋରରୁ ଜାତୀୟ ବିପର୍ଯ୍ୟୟ ପ୍ରତିକ୍ରିୟା ବଳ (ଏନଡିଆରଏଫ୍) ଏବଂ ଆସାନସୋଲ ଉଦ୍ଧାରକାରୀ ଦଳର ସଦସ୍ୟମାନେ ସମ୍ପୂର୍ଣ୍ଣ ପ୍ରତିବଦ୍ଧତା ସହ ପୁଣି ଉଦ୍ଧାର ଅଭିଯାନରେ ନିୟୋଜିତ ହୋଇଛନ୍ତି। ବର୍କ୍ଷମାନ ସୁରଙ୍ଗରେ ଜମିଥିବା ପାଣିକୁ ପମ୍ପ ମାଧ୍ୟମରେ ବାହାର କରାଯାଉଛି। ପାଣି ସମ୍ପୂର୍ଣ୍ଣ ବାହାର କରାଯିବା ପରେ ଏବଂ ସ୍ଥାନକୁ ସୁରକ୍ଷିତ ବୋଲି ଘୋଷଣା କରାଯିବା ପରେ ଅବଶିଷ୍ଟ ମୃତଦେହଗୁଡ଼ିକର ସନ୍ଧାନ ଏବଂ ସେଗୁଡ଼ିକୁ ବାହାର କରିବାର ଅଭିଯାନ ଆଗକୁ ବଢ଼ାଯିବ।
ଏହି ମଧ୍ୟରେ, ଉଦ୍ଧାର କାର୍ଯ୍ୟରେ ନିୟୋଜିତ ସୁରକ୍ଷାକର୍ମୀ ଏବଂ ରିଲିଫ୍ କର୍ମୀମାନଙ୍କୁ ଆବଶ୍ୟକ ପଡ଼ିଲେ ତୁରନ୍ତ ଚିକିତ୍ସା ସହାୟତା ଉପଲବ୍ଧ କରାଇବା ପାଇଁ ଘଟଣାସ୍ଥଳରେ ଚିକିତ୍ସକମାନଙ୍କ ଦଳ ଏବଂ ଆମ୍ବୁଲାନ୍ସ ମୁତୟନ କରାଯାଇଛି। କୌଣସି ଗୁରୁତର ଚିକିତ୍ସାଜନିତ ଜରୁରୀ ପରିସ୍ଥିତିରେ ସମ୍ବନ୍ଧିତ କର୍ମୀମାନଙ୍କୁ ବିଶେଷଜ୍ଞ ଚିକିତ୍ସା ପାଇଁ ରଙ୍ଗପୋ ହସ୍ପିଟାଲକୁ ପଠାଯିବ।
------------------
---------------
ହିନ୍ଦୁସ୍ଥାନ ସମାଚାର / ଗଗନ