ନୂଆଦିଲ୍ଲୀ, ୨୫ ଜୁଲାଇ (ହି.ସ.)- ସୋସିଆଲ୍ ମିଡିଆ ଅଭିଯାନ 'କକରୋଚ୍ ଜନତା ପାର୍ଟି' (ସିଜେପି) ଲୋକମାନଙ୍କୁ ଜନ୍ତର-ମନ୍ତରକୁ ଯିବାରୁ ରୋକା ନଯିବାକୁ ନେଇ ଏକ ବିବୃତି ଜାରି କରିଛି, ଯେଉଁଥିରେ ଦିଲ୍ଲୀ ପୁଲିସ କମିଶନରଙ୍କ ହସ୍ତକ୍ଷେପ ଦାବି କରାଯାଇଛି।

ସିଜେପି ଶନିବାର 'ଏକ୍ସ'ରେ ବିବୃତି ଜାରି କରି ଜନ୍ତର-ମନ୍ତର ଆଖପାଖରେ ପୁଲିସ ଦ୍ୱାରା ସୃଷ୍ଟି କରାଯାଉଥିବା କଥିତ ଭୟ ଏବଂ ଘେରାବନ୍ଦିର ପରିବେଶର କଡ଼ା ନିନ୍ଦା କରିଛି। ସେମାନଙ୍କ ଅଭିଯୋଗ ଅନୁସାରେ, “ଗତ ଏକ ମାସରୁ ଅଧିକ ସମୟ ଧରି ହଜାର ହଜାର ଛାତ୍ର, ଅଭିଭାବକ, ଶିକ୍ଷକ ଏବଂ ନାଗରିକ ଜନ୍ତର-ମନ୍ତରରେ ଶାନ୍ତିପୂର୍ଣ୍ଣ ଭାବେ ବିରୋଧ ପ୍ରଦର୍ଶନ କରୁଛନ୍ତି। ଗଣତାନ୍ତ୍ରିକ ବିରୋଧ ପ୍ରଦର୍ଶନକୁ ସହଯୋଗ କରିବା ପରିବର୍ତେ ଦିଲ୍ଲୀ ପୁଲିସ ବେଆଇନ ଭାବେ ନାଗରିକମାନଙ୍କୁ ଅଟକ ରଖୁଛି ଏବଂ ଡରାଉଛି-ଧମକାଉଛି। ପ୍ରଦର୍ଶନକାରୀମାନଙ୍କ ପାଖକୁ ଖାଦ୍ୟ ନେଉଥିବା ସ୍ୱେଚ୍ଛାସେବକମାନଙ୍କୁ ଅଟକାଯାଉଛି। ପିଇବା ପାଣି, ଔଷଧ, ସଫେଇ ସାମଗ୍ରୀ ଏବଂ ଅନ୍ୟାନ୍ୟ ଆବଶ୍ୟକୀୟ ସାମଗ୍ରୀ ପହଂଚାଇବାରେ ବାଧା ସୃଷ୍ଟି କରାଯାଉଛି। ଏହି ପରିସ୍ଥିତି ଜନ୍ତର-ମନ୍ତରକୁ ଘେରାବନ୍ଦି କରିବା ସଦୃଶ।

ନିଜ ବିବୃତିରେ ସିଜେପି ସର୍ବୋଚ୍ଚ ନ୍ୟାୟାଳୟଙ୍କ ରାୟକୁ ଉଦାହରଣ ଦେଇ କହିଛି ଯେ ଶାନ୍ତିପୂର୍ଣ୍ଣ ବିରୋଧ ପ୍ରଦର୍ଶନ ଭାରତର ସାମ୍ବିଧାନିକ ଗଣତନ୍ତ୍ରର ଏକ ଅବିଚ୍ଛେଦ୍ୟ ଅଂଶ। ଜନ୍ତର-ମନ୍ତର କୌଣସି ସାମରିକ କ୍ଷେତ୍ର କିମ୍ବା କାରାଗାର ନୁହେଁ, ବରଂ ଗଣତନ୍ତ୍ରରେ ନିର୍ଦ୍ଧାରିତ ବିରୋଧ ପ୍ରଦର୍ଶନର ସ୍ଥାନ। ପୁଲିସର କାମ ହେଉଛି ଶାନ୍ତିପୂର୍ଣ୍ଣ ସମାବେଶକୁ ସୁବ୍ୟବସ୍ଥିତ କରିବା, ଭୟ, ଭୋକ ଏବଂ ବିଚ୍ଛିନ୍ନତା ଜରିଆରେ ସେଗୁଡ଼ିକୁ ଦମନ କରିବା ନୁହେଁ।

ସିଜେପି ଦିଲ୍ଲୀ ପୁଲିସ କମିଶନରଙ୍କୁ ଦାବି କରିଛି ଯେ ସେ ତୁରନ୍ତ ଅଧିକାରୀମାନଙ୍କୁ ନିର୍ଦ୍ଦେଶ ଜାରି କରନ୍ତୁ ଯେପରି ନାଗରିକମାନଙ୍କୁ ଜନ୍ତର-ମନ୍ତରକୁ ଯିବାରୁ ରୋକିବା ଏବଂ ଡରାଇବା-ଧମକାଇବା ତୁରନ୍ତ ବନ୍ଦ ହେଉ। ଖାଦ୍ୟ, ପିଇବା ପାଣି, ଔଷଧ ଏବଂ ଚିକିତ୍ସା ସହାୟତା ଯୋଗାଣରେ ଲଗାଯାଇଥିବା ବାଧା ହଟାଯାଉ। ସ୍ୱେଚ୍ଛାସେବକ, ପରିଜନ, ଓକିଲ, ସାମ୍ବାଦିକ ଏବଂ ଚିକିତ୍ସା କର୍ମଚାରୀଙ୍କୁ ବିନା କୌଣସି ବାଧାରେ ପ୍ରଦର୍ଶନ ସ୍ଥଳକୁ ଯିବାକୁ ଅନୁମତି ଦିଆଯାଉ ଏବଂ ସମ୍ବିଧାନର ମୂଳ ଭାବନାକୁ ସମ୍ମାନ ଦେଇ ଅସହମତି ପ୍ରକାଶ କରିବାର ମୌଳିକ ଅଧିକାରର ସୁରକ୍ଷା କରାଯାଉ।

-----------------

---------------

ହିନ୍ଦୁସ୍ଥାନ ସମାଚାର / ଗଗନ