ନୂଆଦିଲ୍ଲୀ, ଜୁଲାଇ 27 (ହି.ସ): ଲୋକସଭା ବାଚସ୍ପତି ଓମ ବିର୍ଲା, କେନ୍ଦ୍ର ସ୍ୱରାଷ୍ଟ୍ର ଓ ସମବାୟ ମନ୍ତ୍ରୀ ଅମିତ ଶାହା, କେନ୍ଦ୍ର ମନ୍ତ୍ରୀ ଏବଂ ରାଜ୍ୟର ମୁଖ୍ୟମନ୍ତ୍ରୀମାନେ ଦେଶର ପୂର୍ବତନ ରାଷ୍ଟ୍ରପତି, ମହାନ ବୈଜ୍ଞାନିକ ତଥା ଭାରତରତ୍ନ ଡକ୍ଟର ଏପିଜେ ଅବଦୁଲ କଲାମଙ୍କୁ ତାଙ୍କ ମୃତ୍ୟୁ ବାର୍ଷିକୀରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ସମସ୍ତେ ଡ. କଲାମଙ୍କ ବୈଜ୍ଞାନିକ ଅବଦାନ, ସରଳ ଜୀବନ, ରାଷ୍ଟ୍ର ସେବା ଏବଂ ଯୁବ-ପ୍ରେରଣାଦାୟୀ ବ୍ୟକ୍ତିତ୍ୱକୁ ସ୍ମରଣ କରିଥିଲେ ଏବଂ ତାଙ୍କୁ ରାଷ୍ଟ୍ରର ଏକ ଅମୂଲ୍ୟ ରତ୍ନ ଭାବେ ବର୍ଣ୍ଣନା କରିଥିଲେ।

ଲୋକସଭା ବାଚସ୍ପତି ଓମ ବିର୍ଲା କହିଛନ୍ତି ଯେ ଡକ୍ଟର କଲାମ ଏକ ବିକଶିତ, ଆତ୍ମନିର୍ଭରଶୀଳ ଏବଂ ସଶକ୍ତ ଭାରତର ଜଣେ ଦୂରଦୃଷ୍ଟିସମ୍ପନ୍ନ ବ୍ୟକ୍ତି ଥିଲେ। ସେ ସ୍ୱଦେଶୀ କ୍ଷେପଣାସ୍ତ୍ର ଏବଂ ମହାକାଶ କାର୍ଯ୍ୟକ୍ରମକୁ ନୂତନ ଉଚ୍ଚତାକୁ ନେଇଥିଲେ ଏବଂ ଜ୍ଞାନ, ଶୃଙ୍ଖଳା, ସରଳତା ଏବଂ ରାଷ୍ଟ୍ରର ସେବାକୁ ତାଙ୍କ ଜୀବନର ଆଧାରଶିଳା କରିଥିଲେ। ସେ ଡ. କଲାମଙ୍କ ପ୍ରସିଦ୍ଧ ଉକ୍ତି ସ୍ୱପ୍ନ ତାହା ନୁହେଁ ଯାହା ନିଦରେ ଆସେ, ସ୍ୱପ୍ନ ତାହା ଯାହା ଆପଣଙ୍କୁ ଶୋଇବାକୁ ଦିଏ ନାହିଁ ବିଷୟରେ ଉଲ୍ଲେଖ କରିଥିଲେ ଏବଂ କହିଥିଲେ ଯେ ଏହା ଆଜି ମଧ୍ୟ ଯୁବକମାନଙ୍କୁ ସେମାନଙ୍କ ଲକ୍ଷ୍ୟ ପ୍ରତି ଉତ୍ସର୍ଗୀକୃତ ହେବାକୁ ପ୍ରେରଣା ଦେଇଥାଏ।

ଡ. କଲାମଙ୍କୁ ଭାରତର ମହାକାଶ ଏବଂ କ୍ଷେପଣାସ୍ତ୍ର କାର୍ଯ୍ୟକ୍ରମର ଜଣେ ଦୂରଦୃଷ୍ଟିସମ୍ପନ୍ନ ସ୍ଥପତି ଭାବେ ବର୍ଣ୍ଣନା କରି କେନ୍ଦ୍ର ସ୍ୱରାଷ୍ଟ୍ର ଏବଂ ସମବାୟ ମନ୍ତ୍ରୀ ଅମିତ ଶାହା କହିଛନ୍ତି ଯେ ବିଜ୍ଞାନ କ୍ଷେତ୍ରରେ ତାଙ୍କର ଅସାଧାରଣ ସଫଳତା ଭାରତକୁ ଏକ ଶକ୍ତିଶାଳୀ ରଣନୈତିକ ଶକ୍ତିରେ ପରିଣତ କରିବାର ମାର୍ଗ ପ୍ରଶସ୍ତ କରିଛି। ସେ କହିଥିଲେ ଯେ ଜନସାଧାରଣଙ୍କ ରାଷ୍ଟ୍ରପତି ଭାବେ ଡ. କଲାମ ସର୍ବଦା ଦେଶପ୍ରେମୀମାନଙ୍କ ପାଇଁ ଆଦର୍ଶ ହୋଇ ରହିବେ।

ତାଙ୍କୁ 'ପିପୁଲ୍ସ ପ୍ରେସିଡେଣ୍ଟ ,' ମିସାଇଲ୍ ମ୍ୟାନ୍ ଅଫ୍ ଇଣ୍ଡିଆ ଏବଂ 'ବ୍ୟତିକ୍ରମୀ ବୈଜ୍ଞାନିକ ଭାବେ ବର୍ଣ୍ଣନା କରି ପ୍ରତିରକ୍ଷା ମନ୍ତ୍ରୀ ରାଜ୍ନାଥ୍ ସିଂହ କହିଛନ୍ତି ଯେ ଭାରତର ସ୍ୱଦେଶୀ କ୍ଷେପଣାସ୍ତ୍ର ଏବଂ ରଣନୈତିକ ପ୍ରତିରକ୍ଷା କ୍ଷମତାକୁ ସୁଦୃଢ଼ କରିବାରେ ତାଙ୍କର ଭୂମିକା ଐତିହାସିକ। ସେ କହିଥିଲେ ଯେ ତାଙ୍କର ସରଳ ଏବଂ ସଚ୍ଚୋଟ ଜୀବନ ଆଗାମୀ ପିଢ଼ିକୁ ବଡ଼ ସ୍ୱପ୍ନ ଦେଖିବା ଏବଂ ରାଷ୍ଟ୍ରର ସେବା କରିବା ପାଇଁ ପ୍ରେରଣା ଯୋଗାଇବ।

କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନିତିନ ଗଡ଼କରୀ ପୂର୍ବତନ ରାଷ୍ଟ୍ରପତି ତଥା 'ମିସାଇଲ୍ ମ୍ୟାନ୍' ଡ. କଲାମଙ୍କୁ ତାଙ୍କ ମୃତ୍ୟୁ ବାର୍ଷିକୀରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। କେନ୍ଦ୍ର ମନ୍ତ୍ରୀ ଜେ. ପି. ନାଡ୍ଡା କହିଥିଲେ ଯେ ଡ. କଲାମ ସାମରିକ ଏବଂ ଆଣବିକ ପ୍ରତିରୋଧ କ୍ଷେତ୍ରରେ ଭାରତକୁ ସଶକ୍ତ କରିବାରେ ଅମୂଲ୍ୟ ଯୋଗଦାନ ଦେଇଥିଲେ। ଅଗ୍ନି ଏବଂ ପୃଥ୍ୱୀ କ୍ଷେପଣାସ୍ତ୍ର କାର୍ଯ୍ୟକ୍ରମ, ଏସ୍. ଏଲ୍. ଭି.-3ର ବିକାଶ, ରୋହିଣୀ ଉପଗ୍ରହର ସଫଳ ଉତକ୍ଷେପଣ ଏବଂ ପୋଖରାନ୍-2 ଆଣବିକ ପରୀକ୍ଷଣରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକାକୁ ସ୍ମରଣ କରି ସେ କହିଥିଲେ ଯେ ତାଙ୍କ ଜୀବନ ଯୁବକମାନଙ୍କୁ ରାଷ୍ଟ୍ର ନିର୍ମାଣ ପାଇଁ ପ୍ରେରଣା ଯୋଗାଇବ।

କେନ୍ଦ୍ର କୃଷି ମନ୍ତ୍ରୀ ଶିବରାଜ ସିଂହ ଚୌହାନ ଡ. କଲାମଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରି ତାଙ୍କୁ ଜଣେ ମହାନ ବୈଜ୍ଞାନିକ ଭାବେ ବର୍ଣ୍ଣନା କରିଥିଲେ, ଯିଏକି ଭାରତକୁ ପରମାଣୁ ଅସ୍ତ୍ର ସମ୍ପନ୍ନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ସେ କହିଥିଲେ ଯେ ତାଙ୍କ ବିଚାର ଏବଂ ଆଦର୍ଶ ଜୀବନ ଯୁବପିଢ଼ିଙ୍କୁ ମାର୍ଗଦର୍ଶନ ଜାରି ରଖିବ। କେନ୍ଦ୍ର ମନ୍ତ୍ରୀ ମନୋହର ଲାଲ କହିଛନ୍ତି ଯେ ରାଷ୍ଟ୍ରର ଉନ୍ନତି ପାଇଁ ଉତ୍ସର୍ଗୀକୃତ ଡ. କଲାମଙ୍କ ଜୀବନ ଏକ ଶିକ୍ଷିତ, ସଶକ୍ତ ଏବଂ ଗୌରବମୟ ଭାରତ ଗଠନ ପାଇଁ ପ୍ରେରଣା ଯୋଗାଇବ।

ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା କହିଛନ୍ତି ଯେ ଡ. କଲାମ ତାଙ୍କର ଦୂରଦୃଷ୍ଟି, ସ୍ୱଦେଶୀ କ୍ଷେପଣାସ୍ତ୍ର ପ୍ରଯୁକ୍ତି ଏବଂ ନବସୃଜନ ଦ୍ୱାରା ଭାରତକୁ ବିଶ୍ୱସ୍ତରରେ ଏକ ନୂତନ ପରିଚୟ ପ୍ରଦାନ କରିଥିଲେ। ତାଙ୍କର ସରଳ ଜୀବନ ଏବଂ ଉଚ୍ଚ ଚିନ୍ତାଧାରା ସର୍ବଦା ରାଷ୍ଟ୍ର ସେବାକୁ ପ୍ରେରଣା ଯୋଗାଇବ। ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ମୋହନ ଯାଦବ କହିଛନ୍ତି ଯେ ଭାରତକୁ ଆଣବିକ ଶକ୍ତି ଭାବେ ପ୍ରତିଷ୍ଠିତ କରିବାରେ ଡ. କଲାମଙ୍କର ଗୁରୁତ୍ୱପୂର୍ଣ୍ଣ ଯୋଗଦାନ ରହିଛି। ବିଜ୍ଞାନ, ଶିକ୍ଷା ଏବଂ ରାଷ୍ଟ୍ର ନିର୍ମାଣ କ୍ଷେତ୍ରରେ ତାଙ୍କର ଅବଦାନ ସର୍ବଦା ସ୍ମରଣୀୟ ହୋଇ ରହିବ।

ଡ. କଲାମଙ୍କୁ ଜ୍ଞାନ, ବିଜ୍ଞାନ ଏବଂ ନବସୃଜନର ପ୍ରତୀକ ବୋଲି ବର୍ଣ୍ଣନା କରି ରାଜସ୍ଥାନର ମୁଖ୍ୟମନ୍ତ୍ରୀ ଭଜନ ଲାଲ ଶର୍ମା କହିଛନ୍ତି ଯେ କୋଟି କୋଟି ଯୁବକ ତାଙ୍କ ଆଦର୍ଶ ଏବଂ ପରିଶ୍ରମୀ ଜୀବନରୁ ପ୍ରେରଣା ପାଇବା ଜାରି ରଖିବେ। ଆମ୍ ଆଦମୀ ପାର୍ଟି (ଆପ୍) ର ରାଷ୍ଟ୍ରୀୟ ଆବାହକ ଅରବିନ୍ଦ କେଜ୍ରିୱାଲ ଡ. କଲାମଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରି କହିଛନ୍ତି ଯେ ସେ ଛାତ୍ରଛାତ୍ରୀଙ୍କ ମଧ୍ୟରେ ବିଜ୍ଞାନ ପ୍ରତି ଆଗ୍ରହ ସୃଷ୍ଟି କରିବା ଏବଂ ଶିକ୍ଷା ମାଧ୍ୟମରେ ଏକ ବିକଶିତ ଭାରତ ଗଠନ କରିବାର ସ୍ୱପ୍ନ ଦେଖିଥିଲେ। ସେ କହିଥିଲେ ଯେ ଡ. କଲାମ ସର୍ବଦା ଜଣେ ଶିକ୍ଷକ ଭାବେ ସ୍ମରଣୀୟ ହୋଇ ରହିବାକୁ ଚାହୁଁଥିଲେ ଏବଂ ତାଙ୍କ ଦ୍ୱାରା ପ୍ରଦର୍ଶିତ ମାର୍ଗ ଅନୁସରଣ ଦ୍ୱାରା ହିଁ ଭାରତ ଏକ ବିକଶିତ ରାଷ୍ଟ୍ରରେ ପରିଣତ ହୋଇପାରିବ।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା