- ଦିଲ୍ଲୀ, ମହାରାଷ୍ଟ୍ର, ବିହାର, କେରଳ, ମଧ୍ୟପ୍ରଦେଶ ଏବଂ ଉତରପ୍ରଦେଶର ମୁଖ୍ୟ ସଚିବମାନଙ୍କୁ ନୋଟିସ

ନୂଆଦିଲ୍ଲୀ, ୨୮ ଜୁଲାଇ (ହି.ସ.)- ସର୍ବୋଚ୍ଚ ନ୍ୟାୟାଳୟ ସମସ୍ତ ରାଜ୍ୟରେ ପ୍ରଦର୍ଶନକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଉପରେ ରୋକ ଲଗାଇଛନ୍ତି। ମୁଖ୍ୟ ନ୍ୟାୟାଧୀଶ ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଗଠିତ ବେଂଚ ସମସ୍ତ ରାଜ୍ୟକୁ ନିର୍ଦ୍ଦେଶ ଦେଇଛନ୍ତି ଯେ, ନାବାଳକମାନଙ୍କୁ ତୁରନ୍ତ ମୁକ୍ତ କରାଯାଉ। ତେବେ କୋର୍ଟ କହିଛନ୍ତି ଯେ, ଯେଉଁମାନଙ୍କର ଆପରାଧିକ ରେକର୍ଡ ରହିଛି, ସେମାନଙ୍କୁ ଏହି ସୁରକ୍ଷା ମିଳିବ ନାହିଁ। କୋର୍ଟ ଦିଲ୍ଲୀ, ମହାରାଷ୍ଟ୍ର, ବିହାର, କେରଳ, ମଧ୍ୟପ୍ରଦେଶ ଏବଂ ଉତରପ୍ରଦେଶର ମୁଖ୍ୟ ସଚିବମାନଙ୍କୁ ନୋଟିସ ଜାରି କରିଛନ୍ତି।

କୋର୍ଟ ସମସ୍ତ ରାଜ୍ୟକୁ ନିର୍ଦ୍ଦେଶ ଦେଇଛନ୍ତି ଯେ, ପ୍ରଦର୍ଶନ ସମ୍ବନ୍ଧୀୟ ସମସ୍ତ ସିସିଟିଭି ଫୁଟେଜ୍, ଡ୍ରୋନ୍, ବଡି କ୍ୟାମେରା, ୱାୟାରଲେସ୍ ଯୋଗାଯୋଗ ରେକର୍ଡ ଏବଂ ପିସିଆର କଲ୍ଗୁଡ଼ିକୁ ସଂରକ୍ଷିତ ରଖାଯାଉ। କୋର୍ଟ ସମସ୍ତ ରାଜ୍ୟର ପୁଲିସକୁ ମଧ୍ୟ ନିର୍ଦ୍ଦେଶ ଦେଇଛନ୍ତି ଯେ, ପ୍ରଦର୍ଶନ ସମୟରେ ପ୍ରଦର୍ଶନକାରୀଙ୍କ ଡିଜିଟାଲ ତଥ୍ୟକୁ ସଂରକ୍ଷିତ କରାଯାଉ ଏବଂ ତାହାକୁ ସାର୍ବଜନୀନ କରାଯିବ ନାହିଁ। କୋର୍ଟ ଏହା ମଧ୍ୟ ଆଦେଶ ଦେଇଛନ୍ତି ଯେ, ପ୍ରଦର୍ଶନକାରୀଙ୍କ କୌଣସି ବ୍ୟକ୍ତିଗତ ସୂଚନା କିମ୍ବା ତଥ୍ୟ ପ୍ରକାଶ କରାଯିବ ନାହିଁ। ଏହା ସହିତ ପ୍ରଦର୍ଶନକାରୀ ଛାତ୍ରଛାତ୍ରୀଙ୍କ ବିରୋଧରେ କୌଣସି ପ୍ରତିରୋଧାତ୍ମକ କାର୍ଯ୍ୟାନୁଷ୍ଠାନ ମଧ୍ୟ କରାଯିବ ନାହିଁ। କୋର୍ଟ କହିଛନ୍ତି ଯେ, ପ୍ରଦର୍ଶନ ସମୟରେ ଗିରଫ ହୋଇଥିବା ୧୮ ବର୍ଷରୁ କମ୍ ନାବାଳକମାନଙ୍କୁ ତୁରନ୍ତ ମୁକ୍ତ କରାଯାଉ।

ଶୁଣାଣି ସମୟରେ କୋର୍ଟ ଏହି କଥାକୁ ନେଇ ଚିନ୍ତା ପ୍ରକାଶ କରିଥିଲେ ଯେ, ନିଟ୍ ପ୍ରଶ୍ନପତ୍ର ଲିକ୍ ବିରୋଧରେ ପ୍ରଦର୍ଶନକାରୀଙ୍କୁ ମୁକାବିଲା କରିବା ପାଇଁ ଲାଠିଚାର୍ଜ, ପେଲେଟ୍ ଗନ୍ ଏବଂ ଲୁହବୁହା ଗ୍ୟାସର ବ୍ୟବହାର କରାଯାଇଥିଲା। ପ୍ରଦର୍ଶନକାରୀଙ୍କୁ ଛିନ୍ନଭିନ୍ନ କରିବା ପାଇଁ ରବର ଗୁଳି ଏବଂ ଇଲେକ୍ଟ୍ରିକ୍ ବ୍ୟାଟନର ବ୍ୟବହାର କରାଯାଇଥିଲା। କୋର୍ଟ କହିଛନ୍ତି ଯେ, ସଲିସିଟର ଜେନେରାଲ ତୁଷାର ମେହେତା ଏହି ମାମଲାରେ ସ୍ୱାଧୀନ ତଦନ୍ତକୁ ବିରୋଧ କରୁନାହାନ୍ତି। ମେହେତା କହିଥିଲେ ଯେ, ଏହି ପ୍ରଦର୍ଶନ ସମୟରେ ଅନେକ ଅପରାଧୀ ମଧ୍ୟ ଉପସ୍ଥିତ ଥିଲେ, ଯେଉଁମାନେ ପ୍ରାୟ ଦୁଇଶହ ପୁଲିସ କର୍ମଚାରୀଙ୍କୁ ଆହତ କରିଥିଲେ। ଏପରି ସ୍ଥିତିରେ ଏହି ମାମଲାର ନିଷ୍ପକ୍ଷ ତଦନ୍ତ ଆବଶ୍ୟକ। ଏହି ତଦନ୍ତରେ ପୁଲିସ କର୍ମଚାରୀଙ୍କ ପରିବାରବର୍ଗଙ୍କ ଚିନ୍ତାକୁ ମଧ୍ୟ ବିଚାର କରାଯିବ। କମିଟି ଗଠନ ପୂର୍ବରୁ କେନ୍ଦ୍ର ସରକାର ନିଜର ଜବାବ ଦାଖଲ କରନ୍ତୁ।

--------------------------------

---------------

ହିନ୍ଦୁସ୍ଥାନ ସମାଚାର / ଗଗନ