ଭୁବନେଶ୍ୱର, 28 ଅଗଷ୍ଟ (ହି.ସ.) କେନ୍ଦୁଝର ଜିଲ୍ଲା ପାଟଣା ତହସିଲ କାର୍ଯ୍ୟାଳୟରେ କାର୍ଯ୍ୟରତ ଜଣେ ଜୁନିୟର ରେଭେନ୍ୟୁ ଆସିଷ୍ଟାଣ୍ଟ )ଙ୍କୁ ଜମି ମ୍ୟୁଟେସନ ମାମଲାରେ ₹୬,୦୦୦ ଲାଞ୍ଚ ନେଉଥିବା ବେଳେ ଶୁକ୍ରବାର ଓଡ଼ିଶା ଭିଜିଲାନ୍ସ ଅଧିକାରୀମାନେ ଧରିଛନ୍ତି।
ଧରାପଡ଼ିଥିବା ଅଭିଯୁକ୍ତ ହେଲେ ପାଟଣା ତହସିଲଦାରଙ୍କ କାର୍ଯ୍ୟାଳୟରେ କାର୍ଯ୍ୟରତ ଜୁନିୟର ରେଭେନ୍ୟୁ ଆସିଷ୍ଟାଣ୍ଟ ବି.ଏଚ୍. ଉମାଶଙ୍କର।
ଓଡ଼ିଶା ଭିଜିଲାନ୍ସ ପକ୍ଷରୁ ମିଳିଥିବା ସୂଚନା ଅନୁସାରେ, ଅଭିଯୋଗକାରୀ ଜଣକ ୩ ଜୁନ୍ ୨୦୨୬ରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ନିୟମ ଅନୁଯାୟୀ ଜମି ମ୍ୟୁଟେସନ ପାଇଁ ଅନଲାଇନ୍ ଆବେଦନ କରିଥିଲେ। ପରେ ଆବେଦନର ସ୍ଥିତି ସମ୍ପର୍କରେ ଜାଣିବାକୁ ଯାଇଥିବା ବେଳେ ଅଭିଯୁକ୍ତ ମ୍ୟୁଟେସନ ଫାଇଲ୍ ଆଗକୁ ବଢ଼ାଇବା ସହ ଅଭିଯୋଗକାରୀ ଏବଂ ଅନ୍ୟ ସହ-ଅଂଶୀଦାରଙ୍କ ନାମରେ ରେକର୍ଡ ଅଫ୍ ରାଇଟ୍ସ ଜାରି କରାଇବା ପାଇଁ ₹୬,୦୦୦ ଲାଞ୍ଚ ଦାବି କରିଥିବା ଅଭିଯୋଗ ହୋଇଥିଲା।
ଏହି ଲାଞ୍ଚ ଦାବିରେ ଅସନ୍ତୁଷ୍ଟ ହୋଇ ଅଭିଯୋଗକାରୀ ଭିଜିଲାନ୍ସ ଅଧିକାରୀଙ୍କୁ ଏନେଇ ଅବଗତ କରିଥିଲେ। ଅଭିଯୋଗ ପାଇବା ପରେ ଓଡ଼ିଶା ଭିଜିଲାନ୍ସ ଟିମ୍ ଶୁକ୍ରବାର ଏକ ଟ୍ରାପ୍ ଅପରେସନ୍ ଯୋଜନା କରିଥିଲା।
ପରେ ତହସିଲ କାର୍ଯ୍ୟାଳୟ ପରିସରର ଗ୍ୟାରେଜ୍ ନିକଟରେ ଅଭିଯୁକ୍ତ ଉମାଶଙ୍କର ଅଭିଯୋଗକାରୀଙ୍କଠାରୁ ₹୬,୦୦୦ ଲାଞ୍ଚ ଗ୍ରହଣ କରୁଥିବା ବେଳେ ଭିଜିଲାନ୍ସ ଟିମ୍ ତାଙ୍କୁ ଧରିଥିଲା। ତାଙ୍କ ନିକଟରୁ ସମ୍ପୂର୍ଣ୍ଣ ଲାଞ୍ଚ ଟଙ୍କା ଜବତ କରାଯାଇଛି।
ଟ୍ରାପ୍ ଅପରେସନ୍ ପରେ ଓଡ଼ିଶା ଭିଜିଲାନ୍ସ ପକ୍ଷରୁ ଅଭିଯୁକ୍ତ ଉମାଶଙ୍କରଙ୍କ ସହ ସମ୍ପର୍କିତ ଦୁଇଟି ସ୍ଥାନରେ ଏକକାଳୀନ ତଲାସୀ ଚାଲିଛି। ଜ୍ଞାତ ଆୟ ଉତ୍ସ ତୁଳନାରେ ଅଧିକ ସମ୍ପତ୍ତି ରହିଛି କି ନାହିଁ, ସେହି ଦିଗରୁ ମଧ୍ୟ ଯାଞ୍ଚ କରାଯାଉଛି।
ଏହି ଘଟଣାକୁ ନେଇ ବାଲେଶ୍ୱର ଭିଜିଲାନ୍ସ ଥାନାରେ କେସ୍ ନମ୍ବର ୧୭/୨୦୨୬ ରୁଜୁ କରାଯାଇଛି। ଭ୍ରଷ୍ଟାଚାର ନିବାରଣ (ସଂଶୋଧନ) ଆଇନ, ୨୦୧୮ର ଧାରା ୭ ଅନୁଯାୟୀ ମାମଲା ରୁଜୁ ହୋଇଛି।ଅଭିଯୁକ୍ତ ଉମାଶଙ୍କରଙ୍କ ବିରୋଧରେ ଭିଜିଲାନ୍ସ ପକ୍ଷରୁ ଅଧିକ ତଦନ୍ତ ଜାରି ରହିଛି।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
