ଭୁବନେଶ୍ୱର, 29 ଅଗଷ୍ଟ (ହି.ସ.)ଓଡ଼ିଶାର ବିରୋଧୀ ଦଳ ନେତା ତଥା ବିଜୁ ଜନତା ଦଳ (ବିଜେଡି) ସଭାପତି ନବୀନ ପଟ୍ଟନାୟକ ରାଜ୍ୟର ସମସ୍ତ ବିଜେପି ସାଂସଦଙ୍କୁ ମାଇନ୍ସ ଆଣ୍ଡ ମିନେରାଲ୍ସ (ଡେଭଲପମେଣ୍ଟ ଆଣ୍ଡ ରେଗୁଲେସନ୍) ସଂଶୋଧନ ବିଲ୍, ୨୦୨୬କୁ ନେଇ ନିଜ ଆଭିମୁଖ୍ୟର ପୁନର୍ବିଚାର କରିବା ସହ ସଂଶୋଧନକୁ ପ୍ରତ୍ୟାହାର ପାଇଁ ଦାବି ଉଠାଇବାକୁ ଆହ୍ୱାନ ଜଣାଇଛନ୍ତି।

ଶନିବାର ଓଡ଼ିଶାର ବିଜେପି ସାଂସଦମାନଙ୍କୁ ଲେଖିଥିବା ଏକ ପତ୍ରରେ ନବୀନ ପଟ୍ଟନାୟକ ଅଗଷ୍ଟ ୧୩ରେ ଲୋକସଭାରେ ଏହି ବିଲ୍ ପାରିତ ହେବାର ଦିନକୁ ‘ଓଡ଼ିଶା ପାଇଁ କଳା ଦିବସ’ ବୋଲି ଅଭିହିତ କରିଛନ୍ତି। ବିଜେପି ସାଂସଦମାନଙ୍କ ସମର୍ଥନରେ ଏହି ବିଲ୍ ଲୋକସଭାରେ ପାରିତ ହୋଇଥିବା ବେଳେ ଏହାର ବ୍ୟବସ୍ଥା ଓଡ଼ିଶା ଓ ରାଜ୍ୟବାସୀଙ୍କ ଉପରେ ଦୂରଗାମୀ ପ୍ରଭାବ ପକାଇପାରେ ବୋଲି ସେ ଚିନ୍ତା ପ୍ରକାଶ କରିଛନ୍ତି।

ପଟ୍ଟନାୟକ କହିଛନ୍ତି ଯେ, ସଂସଦ ହେଉଛି ଭାରତୀୟ ଗଣତନ୍ତ୍ରର ସର୍ବୋଚ୍ଚ ମନ୍ଦିର। ସାଂସଦ ଭାବେ ଓଡ଼ିଶାର ଜନପ୍ରତିନିଧିମାନଙ୍କ ଦାୟିତ୍ୱ ହେଉଛି ସଂସଦରେ ରାଜ୍ୟବାସୀଙ୍କ ସ୍ୱାର୍ଥର ସ୍ୱର ଉତ୍ତୋଳନ କରିବା। ଜନସାଧାରଣ ସେମାନଙ୍କ ଉପରେ ଭରସା କରି ସାଂସଦ ଭାବେ ନିର୍ବାଚିତ କରିଥିବାରୁ ବିଲ୍ ସପକ୍ଷରେ ସେମାନଙ୍କ ଭୋଟ୍କୁ ନେଇ ସେ ଉଦ୍ବେଗ ପ୍ରକାଶ କରିଛନ୍ତି।

ବିଜେଡି ସଭାପତି ବିଲ୍ଟି ଲୋକସଭାରେ ପାରିତ ହେବାର ପ୍ରକ୍ରିୟାକୁ ନେଇ ମଧ୍ୟ ପ୍ରଶ୍ନ ଉଠାଇଛନ୍ତି। ଦୂରଗାମୀ ପ୍ରଭାବ ରଖୁଥିବା ବ୍ୟବସ୍ଥା ଥିବା ସତ୍ତ୍ୱେ ଲୋକସଭାରେ ଏହି ବିଲ୍ ଉପରେ ୧୦ ମିନିଟ୍ରୁ କମ୍ ସମୟ ଆଲୋଚନା ହୋଇଥିଲା ବୋଲି ସେ କହିଛନ୍ତି।

ପଟ୍ଟନାୟକ କହିଛନ୍ତି ଯେ, ଏହି ଆଇନ ଯୋଗୁଁ ଓଡ଼ିଶା ସବୁଠାରୁ ଅଧିକ ପ୍ରଭାବିତ ରାଜ୍ୟ ମଧ୍ୟରେ ରହିବ। ଦେଶର ମୋଟ ଖଣିଜ ସମ୍ପଦରେ ଓଡ଼ିଶାର ଅଂଶ ପ୍ରାୟ ୪୪ ପ୍ରତିଶତ ବୋଲି ଉଲ୍ଲେଖ କରି ସେ କହିଛନ୍ତି ଯେ, ଦଶନ୍ଧି ଧରି ଓଡ଼ିଶା ନିଜର ଖଣିଜ ସମ୍ପଦ ମାଧ୍ୟମରେ ଦେଶର ଇସ୍ପାତ, ବିଦ୍ୟୁତ, ଖଣି ଓ ଭିତ୍ତିଭୂମି କ୍ଷେତ୍ରର ବିକାଶରେ ଗୁରୁତ୍ୱପୂର୍ଣ୍ଣ ଅବଦାନ ଦେଇଆସିଛି।

ଏହି ସଂଶୋଧନ ଯୋଗୁଁ ଓଡ଼ିଶାକୁ ବାର୍ଷିକ ୧୨,୦୦୦ କୋଟି ଟଙ୍କାରୁ ଅଧିକ କ୍ଷତି ହୋଇପାରେ ବୋଲି ପଟ୍ଟନାୟକ ଦାବି କରିଛନ୍ତି। ସମୟକ୍ରମେ ଏହି କ୍ଷତି ଲକ୍ଷ ଲକ୍ଷ କୋଟି ଟଙ୍କାରେ ପହଞ୍ଚିପାରେ ବୋଲି ସେ କହିଛନ୍ତି। ଏଥିସହ ରାଜ୍ୟର ନିଜସ୍ୱ ଖଣିଜ ସମ୍ପଦ ଏବଂ ଖଣିଜ ସମୃଦ୍ଧ ଜମି ଉପରେ ରାଜ୍ୟ ସରକାରଙ୍କ ନିୟନ୍ତ୍ରଣକୁ ଏହି ସଂଶୋଧନ ଦୁର୍ବଳ କରିଛି ବୋଲି ସେ ଅଭିଯୋଗ କରିଛନ୍ତି।

ଏହି ଆଇନ ଓଡ଼ିଶାର ଶିଶୁ, ଯୁବପିଢ଼ି ଓ ଭବିଷ୍ୟତ ପିଢ଼ି ଉପରେ ମଧ୍ୟ ପ୍ରଭାବ ପକାଇବ ବୋଲି ପଟ୍ଟନାୟକ କହିଛନ୍ତି। ରାଜ୍ୟର ସମ୍ପଦ ଓ ଏଥିରୁ ସୃଷ୍ଟି ହେଉଥିବା ସୁଯୋଗ ସହ ଯୁବପିଢ଼ିର ଭବିଷ୍ୟତ ଜଡ଼ିତ ଥିବା ସେ ଉଲ୍ଲେଖ କରିଛନ୍ତି। ଖଣି ଖନନ ଯୋଗୁଁ ପ୍ରଦୂଷଣ, ବିସ୍ଥାପନ, ପରିବେଶ ଅବକ୍ଷୟ ଏବଂ ବିଭିନ୍ନ ଅସୁବିଧାର ସମ୍ମୁଖୀନ ହେଉଥିବା ଲୋକଙ୍କ ସ୍ୱାର୍ଥର କଥା ମଧ୍ୟ ସେ ଉଠାଇଛନ୍ତି।

ବିଜେପି ସାଂସଦମାନେ ନିଜ ବିବେକର କଥା ଶୁଣି ଓଡ଼ିଶାର ଭବିଷ୍ୟତ ପିଢ଼ିର ସ୍ୱାର୍ଥ ବିଷୟରେ ଚିନ୍ତା କରନ୍ତୁ ବୋଲି ପଟ୍ଟନାୟକ ଆହ୍ୱାନ ଜଣାଇଛନ୍ତି। ଏମ୍ଏମ୍ଡିଆର୍ ଆଇନରେ ହୋଇଥିବା ଏଭଳି ସଂଶୋଧନକୁ ଚ୍ୟାଲେଞ୍ଜ କରିବା ସହ ଏହାର ପ୍ରତ୍ୟାହାର ପାଇଁ ଦାବି ଉଠାଇବାକୁ ସେ ସାଂସଦମାନଙ୍କୁ ଅନୁରୋଧ କରିଛନ୍ତି।

ପଟ୍ଟନାୟକ କହିଛନ୍ତି ଯେ, ଯେତେବେଳେ ନିଜ ଲୋକ ଓ ସେମାନଙ୍କ ସମ୍ପଦ ପ୍ରତି ଅନ୍ୟାୟ ହୁଏ, ସେତେବେଳେ ତାହା ବିରୋଧରେ ସ୍ୱର ଉଠାଉଥିବା ଲୋକଙ୍କୁ ଇତିହାସ ସ୍ମରଣ କରେ ଏବଂ ସମ୍ମାନ ଦିଏ। ଓଡ଼ିଶାର ସ୍ୱାର୍ଥ ପାଇଁ ନିର୍ଣ୍ଣାୟକ ସମୟରେ ସେମାନେ ଠିଆ ହୋଇଥିଲେ କି ନାହିଁ, ଇତିହାସ ସେହି ଆଧାରରେ ସେମାନଙ୍କୁ ବିଚାର କରିବ ବୋଲି ସେ କହିଛନ୍ତି।

ଏହା ଏକ ଐତିହାସିକ ସନ୍ଧିକ୍ଷଣ ଏବଂ ରାଜ୍ୟ ଓ ରାଜ୍ୟବାସୀଙ୍କ ସ୍ୱାର୍ଥ ପାଇଁ ଠିଆ ହୋଇ ଲଢ଼ିବାର ନିଷ୍ପତ୍ତି ନେବାର ସମୟ ବୋଲି ବିଜେପି ସାଂସଦମାନଙ୍କୁ ଆହ୍ୱାନ ଜଣାଇ ପଟ୍ଟନାୟକ କହିଛନ୍ତି, “ମୁଁ ଏହି ନିଷ୍ପତ୍ତି ଆପଣଙ୍କ ବିବେକ ଉପରେ ଛାଡ଼ିଦେଉଛି।”

-------------------

---------------

ହିନ୍ଦୁସ୍ଥାନ ସମାଚାର / ସମନ୍ୱୟ