ବଲାଙ୍ଗିର, 31 ଅଗଷ୍ଟ (ହି.ସ.)ରାଜେନ୍ଦ୍ର ବିଶବ ବିଦ୍ୟାଳୟରେ ଆଉଟସୋର୍ସିଂ କର୍ମଚାରୀ ନିଯୁକ୍ତି ଓ ହଷ୍ଟେଲ ମେସ୍ ପାଇଁ ଖାଦ୍ୟ ଯୋଗାଣ କୁ ନେଇ ଗୁରୁତର ଅନିୟମିତତା ହୋଇଥିବା ଅଭିଯୋଗ ଆଣିଛିି ବଲାଙ୍ଗିର ଜିଲ୍ଲା ଯୁବ କଂଗ୍ରେସ । ଯୁବ କଂଗ୍ରେସ ର ଅଭିଯୋଗ ଅନୁଯାୟୀ ଗତ ଏପ୍ରିଲ ୧୦ ତାରିଖ ରେ ନୂତନ ନିୟମିତ କୁଳପତି ବିଭୁତି ମଲ୍ଲିକ ଦାୟିତ୍ୱ ଗ୍ରହଣ କରିବା ପରେ ବିଶ୍ୱ ବିଦ୍ୟାଳୟର ନିୟମିତ ପ୍ରଶାସନିକ କାର୍ଯ୍ୟ ପ୍ରଭାବିତ ହୋଇଛି । ଅଣ ଶିକ୍ଷକ କର୍ମଚାରୀଙ୍କ ଅଭାବ ଥିବା ସତ୍ୱେ ପୂର୍ବରୁ ଠିକା କର୍ମଚାରୀଙ୍କ ସହାୟତାରେ କାର୍ଯ୍ୟ ସ୍ୱାଭାବିକ ଭାବେ ଚାଲୁଥିଲା ବୋଲି ସଂଗଠନ କହିଛି । ତେବେ ନୂତନ ଆଉଟସୋର୍ସିଂ ସଂସ୍ଥା ନିୟୋଜନକୁ ନେଇ ପ୍ରଶ୍ନ ଉଠାଇଛି ଯୁବ କଂଗ୍ରେସ । ସଂଗଠନର ଦାବି ଆରଏନ୍ସି ସିକ୍ୟୁରିଟି ସାର୍ଭିସ ଟେଣ୍ଡର ପ୍ରକ୍ରିୟା ବିନା ବିଶ୍ୱବିଦ୍ୟାଳୟରେ କାର୍ଯ୍ୟାଦେଶ ଦିଆଯାଇଥିବା ନେଇ ଆରଟିଆଇ ମାଧ୍ୟମରେ ମିଳିଥିବା ଦଲିଲ ରେ ତଥ୍ୟ ରହିଛି । ଏହି ନିଷ୍ପତ୍ତିରେ ସରକାରୀ ନିୟମ ପାଳନ ହୋଇଛି କି ନାହିଁ ଏବଂ ଏଥିରେ କୌଣସି ଆର୍ଥିକ ଅନିୟମିତତା ହୋଇଛି କି ନାହିଁ ତାହା ଭିଜିଲାନ୍ସ ତଦନ୍ତ ମାଧ୍ୟମରେ ସ୍ପଷ୍ଟ କରିବାକୁ ଦାବି କରାଯାଇଛି । ଅନ୍ୟ ପକ୍ଷରେ ଜୁନ ୧୬ ତାରିଖରେ ହଷ୍ଟେଲ ମେସ ପାଇଁ ୩ ମାସିଆ ଚୁକ୍ତିଭିତ୍ତିକ ଖାଦ୍ୟ ଯୋଗାଇ ସର୍ମ୍କରେ ଜାରି ନୋଟିସ କୁ ନେଇ ମଧ୍ୟ ଅଭିଯୋଗ ଉଠିଛି । ଯୁବ କଂଗ୍ରେସ ଅନୁଯାୟୀ ଜଣେ ଯୋଗାଣକାରୀ ପ୍ରତି ମିଲ ୩୦ ଟଙ୍କା ଦର ଦେଇଥିଲେ । ପରବର୍ତ୍ତୀ ସମମୟରେ ଏଲ୍୨ ପକ୍ଷରୁ ପ୍ରତି ମିଲ ୩୩ ଟଙ୍କା ଦରରେ କାର୍ଯ୍ୟାଦେଶ ଦିଆଯାଇଥିବା ଅଭିଯୋଗ ହୋଇଛି । ଏହି ପ୍ରକ୍ରିୟାରେ ଟେଣ୍ଡର ଓ ଆର୍ଥିକ ନିୟମ ପାଳନ ହୋଇଛି କି ନାହିଁ ତାହାର ତଦନ୍ତ ଦାବି କରିଛି । ଏହି ସମସ୍ତ ଅଭିଯୋଗ ର ସାତ ଦିନ ମଧ୍ୟରେ ନିରପେକ୍ଷ ଓ ଉଚ୍ଚ ସ୍ତରୀୟ ତଦନ୍ତ କରିବା ସହ ଆବଶ୍ୟକ ହେଲେ ଭିଜିଲାନ୍ସ ତଦନ୍ତ କରାଯାଉ, ଦୋଷୀ ପ୍ରମାଣିତ ହେଲେ ଆଇନାନୁସାରେ କାର୍ଯ୍ୟନୁଷ୍ଠାନ ଓ ଚାକିରି ହରାଇଥିବା ଠିକା କର୍ମଚାରୀ ଙ୍କ ସ୍ୱାର୍ଥ ର ସୁରକ୍ଷା କରାଯାଉ ବୋଲି ବଲାଙ୍ଗିର ଜିଲ୍ଲା ଯୁବ କଂଗ୍ରେସ ଦାବି କରିଛି ନଚେତ ଆଗାମୀ ଦିନରେ ଜୋରଦାର ଆନ୍ଦୋଳନ ହେବ । ଯୁବ କଂଗ୍ରେସ ସଭାପତି ଅଙ୍କିତ ସାହୁଙ୍କ ଅଧ୍ୟକ୍ଷତା ରେ ଜିଲ୍ଲା ଛାତ୍ର କଂଗ୍ରେସ ସଭାପତି ଚିନ୍ମୟ ବେହେରା, ଜିଲ୍ଲା ଯୁବ କଂଗ୍ରେସ ମୁଖପାତ୍ର ନୀତିସ ପ୍ରଧାନ, ଲଖନ ସାହୁ, ପଂଚାନନ ଷାଣ୍ଢ, ଶଶାଙ୍କ ମେହେର ପ୍ରମୁଖ ମଂଚାସିନ ଥିଲେ ।
---------------
ହିନ୍ଦୁସ୍ଥାନ ସମାଚାର / ଗୋପବନ୍ଧୁ
