ସହାରନପୁର, ୨୨ ସେପ୍ଟେମ୍ବର (ହି.ସ.)। ଭାରତୀୟ ଜନତା ପାର୍ଟି (ବିଜେପି)ର ଜାତୀୟ ଅଧ୍ୟକ୍ଷ ନିତିନ ନବୀନ ମଙ୍ଗଳବାର ନିଜର ଦୁଇଦିନିଆ ଉତ୍ତର ପ୍ରଦେଶ ଗସ୍ତର ଦ୍ୱିତୀୟ ଦିନ ସହାରନପୁରରେ ବିଭିନ୍ନ ବୈଠକରେ ଯୋଗଦେଇଥିଲେ। ସେ ଦଳୀୟ ପଦାଧିକାରୀ ଓ କର୍ମକର୍ତ୍ତାଙ୍କୁ ନିର୍ବାଚନୀ ବିଜୟ ପାଇଁ ଦିଗ୍ଦର୍ଶନ ଦେବା ସହ ସହାରନପୁରସ୍ଥିତ ସନ୍ଥ ରବିଦାସ ମନ୍ଦିରରେ ପୂଜାର୍ଚ୍ଚନା କରିଥିଲେ।

ସହାରନପୁରରେ ଦଳୀୟ ପଦାଧିକାରୀମାନଙ୍କୁ ସମ୍ବୋଧିତ କରି ନିତିନ ନବୀନ କହିଥିଲେ ଯେ, ୨୦୨୭ରେ ଉତ୍ତର ପ୍ରଦେଶରେ ଭାରତୀୟ ଜନତା ପାର୍ଟି ପୁଣିଥରେ ପ୍ରଚଣ୍ଡ ବହୁମତରେ ସରକାର ଗଠନ କରିବ। କର୍ମକର୍ତ୍ତାଙ୍କ ମଧ୍ୟରେ ଦେଖାଯାଉଥିବା ଉତ୍ସାହ ଏବଂ ପୁଣିଥରେ ବିଜେପି ସରକାର ଗଠନ ପାଇଁ ଦୃଢ଼ ସଂକଳ୍ପ ଦେଖି ସେ ‘ମିଶନ ୨୦୨୭’ ସଫଳ ହେବ ବୋଲି ଆଶା ପ୍ରକାଶ କରିଥିଲେ।

ବିଜେପି ଅଧ୍ୟକ୍ଷ କହିଥିଲେ ଯେ, ଆଜିର ଉତ୍ତର ପ୍ରଦେଶ ବିକାଶ, ଏକ୍ସପ୍ରେସ୍ୱେ ଏବଂ ପ୍ରଗତିର ନୂଆ ମାଇଲଖୁଣ୍ଟ ପାଇଁ ପରିଚିତ ହୋଇଛି। ଏଠାରେ ବ୍ରହ୍ମୋସ୍ ଭଳି କ୍ଷେପଣାସ୍ତ୍ର ମଧ୍ୟ ନିର୍ମାଣ ହେଉଛି। ଏହା ନୂଆ ଉତ୍ତର ପ୍ରଦେଶର ପରିଚୟ ବୋଲି ସେ କହିଥିଲେ। ଉତ୍ତର ପ୍ରଦେଶକୁ ‘ଉତ୍ତମ ପ୍ରଦେଶ’ ଭାବେ ଗଢ଼ିବା ଦିଗରେ ସମସ୍ତେ ମିଳିତ ଭାବେ ଆଗକୁ ବଢ଼ୁଛନ୍ତି ବୋଲି ସେ କହିଥିଲେ।

ନିତିନ ନବୀନ କହିଥିଲେ ଯେ, ଦଳ ଆଜି ଯେଉଁ ସ୍ଥାନରେ ପହଞ୍ଚିଛି, ତାହା ପୁରୁଣା କର୍ମକର୍ତ୍ତାମାନଙ୍କ ୪୦ରୁ ୪୫ ବର୍ଷର କଠିନ ପରିଶ୍ରମର ପରିଣାମ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ୨୦୪୭ ସୁଦ୍ଧା ‘ବିକଶିତ ଭାରତ’ର ସଂକଳ୍ପ କେବଳ ଭାରତୀୟ ଜନତା ପାର୍ଟି ହିଁ ପୂରଣ କରିପାରିବ ବୋଲି ସେ କହିଥିଲେ।

ଆଗାମୀ କାର୍ଯ୍ୟକ୍ରମର ରୂପରେଖା ସମ୍ପର୍କରେ ସେ କର୍ମକର୍ତ୍ତାମାନଙ୍କୁ ସରଳତା, ସାଧାରଣ ଜୀବନଶୈଳୀ ଏବଂ ଜନସାଧାରଣଙ୍କ ସହ ସିଧାସଳଖ ଯୋଗାଯୋଗ ଉପରେ ଗୁରୁତ୍ୱ ଦେବାକୁ କହିଥିଲେ। ବିଧାନସଭାସ୍ତରରେ ସାଂସଦ, ବିଧାୟକ ଓ ସକ୍ରିୟ ସଦସ୍ୟମାନଙ୍କୁ ନେଇ ଶକ୍ତିକେନ୍ଦ୍ରଗୁଡ଼ିକରେ ‘ପକେଟ୍ ମିଟିଂ’ ବା ଜନତା ଚୌପାଳ ଆୟୋଜନ କରାଯିବ ବୋଲି ସେ କହିଥିଲେ।

ପ୍ରତ୍ୟେକ ଗାଁ ଓ ପ୍ରତ୍ୟେକ ଘରେ ପହଞ୍ଚିବା ସହ ସାଧାରଣ ଲୋକଙ୍କ ସମସ୍ୟା ଦୂର କରିବା ଏବଂ ଯୋଗ୍ୟ ହିତାଧିକାରୀଙ୍କୁ ଡବଲ୍ ଇଞ୍ଜିନ ସରକାରର ଯୋଜନା ସହ ଯୋଡ଼ିବାକୁ ସେ କର୍ମକର୍ତ୍ତା, ଦଳୀୟ ଜନପ୍ରତିନିଧି ଓ ପଦାଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ।

ସହାରନପୁରରେ ଭବ୍ୟ ସ୍ୱାଗତ

ସହାରନପୁର ପହଞ୍ଚିବା ପରେ ମୁଜାଫରନଗର, ଦେଓବନ୍ଦ ଓ ସହାରନପୁରର ବିଭିନ୍ନ ସ୍ଥାନରେ ଦଳୀୟ କର୍ମକର୍ତ୍ତା ଓ ସ୍ଥାନୀୟ ଲୋକେ ଶଙ୍ଖନାଦ ଏବଂ ପୁଷ୍ପବର୍ଷା କରି ବିଜେପି ଅଧ୍ୟକ୍ଷଙ୍କୁ ସ୍ୱାଗତ କରିଥିଲେ।

ନିତିନ ନବୀନ ବିଭିନ୍ନ ବୈଠକରେ ବିଧାନସଭା କ୍ଷେତ୍ରୱାରୀ ଦଳୀୟ ସଂଗଠନ ଓ ଆଗାମୀ ନିର୍ବାଚନ ପାଇଁ ଦଳର ପ୍ରସ୍ତୁତି ସମ୍ପର୍କରେ ଫିଡ୍ବ୍ୟାକ୍ ନେଇଥିଲେ। ସଂଗଠନର କାର୍ଯ୍ୟକଳାପକୁ ଅଧିକ ସକ୍ରିୟ କରିବା ଏବଂ ଡବଲ୍ ଇଞ୍ଜିନ ସରକାରର ଯୋଜନାଗୁଡ଼ିକର ଲାଭ ଶତପ୍ରତିଶତ ଯୋଗ୍ୟ ହିତାଧିକାରୀଙ୍କ ନିକଟରେ ପହଞ୍ଚାଇବା ପାଇଁ ସମନ୍ୱୟ ଉପରେ ମଧ୍ୟ ସେ ଗୁରୁତ୍ୱାରୋପ କରିଥିଲେ।

ସେ ସହାରନପୁରର ସ୍ଥାନୀୟ ସାଂସଦ, ବିଧାୟକ ଓ ପ୍ରମୁଖ ପଦାଧିକାରୀଙ୍କ ସହ ଗୁରୁତ୍ୱପୂର୍ଣ୍ଣ ବୈଠକ କରିବା ସହ ତୃଣମୂଳସ୍ତରର କର୍ମକର୍ତ୍ତାଙ୍କ ସହ ଆଲୋଚନା କରି ଆଗାମୀ ରାଜନୈତିକ ରଣନୀତି ଉପରେ ଚର୍ଚ୍ଚା କରିଥିଲେ।

ଦଳିତ କର୍ମକର୍ତ୍ତାଙ୍କ ଘରେ ଭୋଜନ

ବିଜେପିର ଜାତୀୟ ଅଧ୍ୟକ୍ଷ ସହାରନପୁରର ସନ୍ଥ ଶିରୋମଣି ଗୁରୁ ରବିଦାସ ମନ୍ଦିରରେ ପୂଜାର୍ଚ୍ଚନା କରିବା ପରେ ଦଳିତ ସମାଜର ଜଣେ କର୍ମକର୍ତ୍ତାଙ୍କ ଘରେ ଭୋଜନ କରିଥିଲେ। ଦଳିତ ସମାଜର ଲୋକମାନେ ତାଙ୍କୁ ରବିଦାସ ମହାରାଜଙ୍କ ମୂର୍ତ୍ତି ଓ ପୁସ୍ତକ ଉପହାର ଦେଇଥିଲେ।

ଏହି ଅବସରରେ ଗଣମାଧ୍ୟମ ସହ ଆଲୋଚନା କରି ନିତିନ ନବୀନ କହିଥିଲେ ଯେ, ସନ୍ଥ ରବିଦାସଙ୍କ ଆଦର୍ଶ ଅନୁସରଣ କରି ସମାଜର ଶେଷ ପାହାଚରେ ଥିବା ପ୍ରତ୍ୟେକ ବ୍ୟକ୍ତିଙ୍କୁ ସମ୍ମାନ ଦେବା ଏବଂ ମୁଖ୍ୟଧାରା ସହ ଯୋଡ଼ିବାର ଯେଉଁ ସଂକଳ୍ପ ନିଆଯାଇଛି, ଡବଲ୍ ଇଞ୍ଜିନ ସରକାରରେ ତାହା ପୂରଣ କରାଯାଉଛି।

ସେ କହିଥିଲେ ଯେ, ସାରା ଦେଶରେ ସନ୍ଥ ରବିଦାସଙ୍କ ୬୫୦ତମ ଜୟନ୍ତୀ ବର୍ଷ ପାଳନ କରାଯାଉଛି। ସମସ୍ତ ସମାଜକୁ ଏକାଠି ନେଇ, ସାମାଜିକ ସମରସତାର ଭାବନା ସହ ପ୍ରତ୍ୟେକ ବ୍ୟକ୍ତି, ପ୍ରତ୍ୟେକ ସମାଜ ଓ ପ୍ରତ୍ୟେକ ଅଞ୍ଚଳର ଲୋକଙ୍କୁ ସାଙ୍ଗରେ ନେଇ ଆଗକୁ ବଢ଼ାଯାଉଛି ବୋଲି ସେ କହିଥିଲେ। ବିକଶିତ ଉତ୍ତର ପ୍ରଦେଶ ଦିଗରେ ରାଜ୍ୟ ନିରନ୍ତର ଅଗ୍ରଗତି କରୁଥିବା ବେଳେ ନିଜର ଐତିହ୍ୟକୁ ମଧ୍ୟ ଆଗକୁ ନେଉଛି ବୋଲି ସେ କହିଥିଲେ।

ହିନ୍ଦୁସ୍ଥାନ ସମାଚାର / ସମନ୍ୱୟ