ଜୟପୁର, ୨୧ ନଭେମ୍ବର (ହି.ସ.)- ଆଜି ପ୍ରାତଃ ଭ୍ରମଣ କରିବା ବୋରିଗୁମ୍ମା ଥାନାର ପୋଲିସ କନଷ୍ଟେବଳଙ୍କ ପାଇଁ ହେଲା କାଳ। ବୋରିଗୁମ୍ମା-କୋରାପୁଟ ୪୮ ନମ୍ବର ରାଜ୍ୟ ରାଜପଥ ଦୁଲାଗୁଡା ନିକଟରେ ଅଜଣା ଗାଡି ଦେଲା ଧକ୍କା। ଫଳରେ ଘଟଣାସ୍ଥଳରେ ହିଁ କନଷ୍ଟେବଳଙ୍କ ମୃତ୍ୟୁ ହୋଇଛି। ମୃତ ପୋଲିସ କର୍ମଚାରୀ ହେଲେ ପିତାମ୍ବର ପୂଜାରୀ। ସେ ପ୍ରତିଦିନ ପରି ଆଜି ମଧ୍ୟ ସକାଳ ୫ଟା ୩୦ ମିନିଟ ସମୟରେ ଦୁଲାଗୁଡା ରାସ୍ତାରେ ଚାଲି ଯାଉଥିଲେ। ହଠାତ ପଛପଟୁ ଏକ ଗାଡି ତାଙ୍କ ଉପରେ ମଡାଈ ଚାଲି ଯାଇଛି। ମୃତ ପୋଲିସ କର୍ମଚାରୀ ଜଣକ କୋଟପାଡ଼ ବ୍ଲକ ଗିର୍ଲା ଗ୍ରାମର । ସେ ୬ ମାସ ହେବ ବୋରିଗୁମ୍ମା ଥାନାରେ କନଷ୍ଟେବଳ ଭାବେ କାର୍ଯ୍ୟରତ ଥିଲେ। ଆଉ ୬ ମାସ ପରେ ସେ ଅବସର ନେଇଥାନ୍ତେ । ଅବସର ପୂର୍ବରୁ ତାଙ୍କର ଦୁର୍ଘଟଣାରେ ମୃତ୍ୟୁ ଘଟିଛି। ସେପଟେ ତାଙ୍କ ଶବକୁ ବୋରିଗୁମ୍ମା ମେଡିକାଲରେ ରଖି ଘଟଣାର ତଦନ୍ତ ଆରମ୍ଭ କରିଥିଲେ ବି ଦୁର୍ଘଟଣା ଘଟାଇଥିବା ଗାଡିକୁ ଚିହ୍ନଟ କରି ପାରିନି ବୋରିଗୁମ୍ମା ପୋଲିସ । ଖବର ପାଇ ମୃତ ପୋଲିସ କର୍ମଚାରୀଙ୍କ ପରିବାର ଲୋକେ ବୋରିଗୁମ୍ମା ମେଡିକାଲରେ ପହଞ୍ଚିଛନ୍ତି ।
ହିନ୍ଦୁସ୍ଥାନ ସମାଚାର / ପବନ
