ଜୟପୁର, ୨୧ ନଭେମ୍ବର (ହି.ସ)- ମକା ବୋଝେଇ ଟ୍ରକ ଚୋରି ମାମଲାରେ ୨ ଅଭିଯୁକ୍ତଙ୍କୁ ଗିରଫ କରିଛି ଜୟପୁର ସଦର ପୋଲିସ । ଗିରଫ ଅଭିଯୁକ୍ତ ମାନେ ହେଲେ ରତ୍ନାକର ଗୁଡା ଗ୍ରାମର ବଳରାମ ଖୋସଲା (୩୭) ଏବଂ ବୋରିଗୁମ୍ମା ଥାନା ସୋଲାଗୁଡା ଗ୍ରାମର ରଘୁନାଥ ଜାନି (୨୬) ।
ପୋଲିସ ସୂଚନା ଅନୁଯାୟୀ, ଜୟପୁର ସଦର ଥାନା ଅନ୍ତର୍ଗତ କଳାସାହାଣ୍ଡି ଗ୍ରାମର ପ୍ରକାଶ ପୁଜାରୀ ଗତ ୧୮.୧୧.୨୪ ତାରିଖରେ ଜୟପୁର ସଦର ଥାନାରେ ଲିଖିତ ଅଭିଯୋଗ କରିଥିଲେ । ବୈପାରିଗୁଡା ଥାନା ଅନ୍ତର୍ଗତ ମୁଣ୍ଡାଗୁଡାକୁ ମକା ବୋଝେଇ ଲାଗି ଟ୍ରକ ଦେଇ ଡ୍ରାଇଭରକୁ ପଠାଇଥିଲେ । ଟ୍ରକ ଡ୍ରାଇଭର ଅର୍ଜୁନ ଭତ୍ରା ନିଜ କାର୍ଯ୍ୟରେ ବ୍ୟସ୍ତ ରହି ଅଭିଯୁକ୍ତ ବଳରାମକୁ ଟ୍ରକ ଚଲାଇବାକୁ କହିଥିଲା । ଏହାର ସୁଯୋଗ ନେଇ ବଳରାମ ମକା ବୋଝେଇ ଟ୍ରକକୁ ଧରି ଚମ୍ପଟ ମାରିଥିଲା । ବହୁ ଖୋଜା ଖୋଜି କରିବା ପରେ ମଧ୍ୟ ଟ୍ରକ ର ପତ୍ତା ମିନଥିବାରୁ ସେ ସଦର ପୋଲିସ ନିକଟରେ ଅଭିଯୋଗ କରିଥିଲେ । ଅଭିଯୋଗ ପାଇ ପୋଲିସ ତଦନ୍ତ ଆରମ୍ଭ କରିଥିଲା । ୨ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଛି । ଗିରଫ ଅଭିଯୁକ୍ତ ଠାରୁ ମକା ବୋଝେଇ ଟ୍ରକ, ବେଲେରୋ ଗାଡି, ଜବତ କରିଛି ।
ହିନ୍ଦୁସ୍ଥାନ ସମାଚାର / ପବନ
