ଜୟପୁର 27 ନଭେମ୍ବର (ହି.ସ.)ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ (ସିୟୁଓ) ପକ୍ଷରୁ ଭାରତର ସମ୍ବିଧାନ ଦିବସ ପାଳନ କରାଯିବା ସହ ଭଗବାନ ବିର୍ସା ମୁଣ୍ଡାଙ୍କ ୧୫୦ତମ ଜୟନ୍ତୀ ଉତ୍ସବ ଉଦଯାପିତ ହୋଇଯାଇଛି । ଏହି କାର୍ଯ୍ୟକ୍ରମରେ ଭାରତୀୟ ସମ୍ବିଧାନକୁ ସମ୍ମାନ ଦେବା ସହ ଏହାର ନିର୍ମାତା ଡ. ବିଆର୍ ଆମ୍ବେଦକରଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା।
ବ୍ରହ୍ମପୁର ବିଶ୍ୱବିଦ୍ୟାଳୟର ଆଇନ ଅଧ୍ୟୟନ ବିଭାଗର ଡିନ୍ ତଥା ଲିଙ୍ଗରାଜ ଆଇନ ମହାବିଦ୍ୟାଳୟର ଅଧ୍ୟକ୍ଷ ପ୍ରଫେସର ଏନ୍ ସି ପଟ୍ଟନାୟକ ମୁଖ୍ୟବକ୍ତା ଭାବେ ଯୋଗ ଦେଇଥିବା ବେଳେ ସୁନାବେଡ଼ା ସରକାରୀ ମହିଳା ମହାବିଦ୍ୟାଳୟର ଅଧ୍ୟକ୍ଷା ଶ୍ରୀମତୀ ଉଷାରାଣୀ ଦାସ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଏହି କାର୍ଯ୍ୟକ୍ରମକୁ ସିୟୁଓର ଭାରପ୍ରାପ୍ତ କୁଳପତି ତଥା ଭାରପ୍ରାପ୍ତ କୁଳସଚିବ ପ୍ରଫେସର ନରସିଂହ ଚରଣ ପଣ୍ଡା ଉଦ୍ ଘାଟନ କରିବା ସହ କାର୍ଯ୍ୟକ୍ରମର ସଭାପତିତ୍ଵ କରିଥିଲେ । ଏନ୍ ଏସ୍ ଏସ୍ ସଂଯୋଜକ ଡ. ଅଞ୍ଜନେୟୁଲୁ ଥୋଟାପଲ୍ଲୀ ସ୍ୱାଗତ ଭାଷଣ ଦେଇଥିଲେ। ଏହି ଅବସରରେ ଡ. ବିଆର୍ ଆମ୍ବେଦକର ଓ ଭଗବାନ ବିର୍ସା ମୁଣ୍ଡାଙ୍କ ଦେଶ ପ୍ରତି ଅବଦାନକୁ ସମ୍ମାନ ଜଣାଇ ଶ୍ରଦ୍ଧାଞ୍ଜଳି ଅର୍ପଣ କରାଯାଇଥିଲା।
ପ୍ରଫେସର ପଣ୍ଡା ତାଙ୍କ ଅଭିଭାଷଣରେ ଭାରତୀୟ ସମ୍ବିଧାନ ନିର୍ମାଣରେ ଡ. ଆମ୍ବେଦକରଙ୍କ ଦୂରଦୃଷ୍ଟିସମ୍ପନ୍ନ ଭୂମିକା ଉପରେ ଗୁରୁତ୍ୱାରୋପ କରିଥିଲେ। ବେଦ ଓ ଉପନିଷଦ ଭଳି ପ୍ରାଚୀନ ଭାରତୀୟ ଗ୍ରନ୍ଥରେ ଏହାର ମୂଳଉପରେ ଆଲୋକପାତ କରି ସେ ସମ୍ବିଧାନକୁ ସମାନତା, ସତ୍ୟ ଏବଂ ନ୍ୟାୟକୁ ବଜାୟ ରଖୁଥିବା ଏକ ମାର୍ଗଦର୍ଶକ ଦସ୍ତାବିଜ ଭାବେ ବର୍ଣ୍ଣନା କରିଥିଲେ । ସମ୍ବିଧାନ ଅଧ୍ୟୟନ କରିବା ସହ ଜାତୀୟ ପ୍ରଗତିରେ ଯୋଗଦାନ କରିବା ପାଇଁ ଡ. ଆମ୍ବେଦକରଙ୍କ ଭଳି ମହାନ ନେତାଙ୍କ ମାର୍ଗଅନୁସରଣ କରିବାକୁ ସେ ସମସ୍ତଙ୍କୁ ଅନୁରୋଧ କରିଥିଲେ। ପ୍ରଫେସର ପଣ୍ଡା ପ୍ରସ୍ତାବନା ପଠନ କରିବାରେ ଉପସ୍ଥିତ ଲୋକଙ୍କ ନେତୃତ୍ୱ ନେଇ ଏହାର ମୂଲ୍ୟବୋଧ ପ୍ରତି ସେମାନଙ୍କର ପ୍ରତିବଦ୍ଧତାକୁ ଦୋହରାଇଥିଲେ।
ପ୍ରଫେସର ପଟ୍ଟନାୟକ 'ମୋ ସମ୍ବିଧାନ, ମୋ ଗୌରବ' ଶୀର୍ଷକ ଏକ ଚିନ୍ତନଶୀଳ ଭାଷଣ ଦେଇ ସମ୍ବିଧାନକୁ ନାଗରିକଙ୍କ ଆବଶ୍ୟକତା ଅନୁଯାୟୀ ଏକ ଜୀବନ୍ତ ଦସ୍ତାବିଜ ଭାବେ ବର୍ଣନା କରିଥିଲେ। ମୌଳିକ ଅଧିକାର, ନୀତି ଏବଂ ସ୍ୱାଧୀନତା ଓ ସାମାଜିକ ନ୍ୟାୟର ନୀତି ସମେତ ଏହାର ଗତିଶୀଳ ପ୍ରକୃତି ଏବଂ ଗୁରୁତ୍ୱପୂର୍ଣ୍ଣ ବୈଶିଷ୍ଟ୍ୟ ବିଷୟରେ ସେ ବିସ୍ତୃତ ଭାବରେ ବର୍ଣ୍ଣନା କରିଥିଲେ । ରାଜ୍ୟ ଓ ନାଗରିକଙ୍କ ମଧ୍ୟରେ ଏକ ସୁଦୃଢ଼ ବନ୍ଧନ ସୃଷ୍ଟି କରିବାରେ ସମ୍ବିଧାନର ଭୂମିକା ଉପରେ ସେ ଆଲୋକପାତ କରିଥିଲେ।
ଶ୍ରୀମତୀ ଉଷାରାଣୀ ଦାସ ଶାସନରେ ସମ୍ବିଧାନର ଗୁରୁତ୍ୱ ଉପରେ ଆଲୋକପାତ କରି କହିଥିଲେ ଯେ ବିଶ୍ୱର ସର୍ବବୃହତ ଗଣତନ୍ତ୍ର ଭାବରେ ଭାରତ ଏହାର ସୁଦୃଢ଼ ଢାଞ୍ଚା ଉପରେ ନିର୍ଭର କରେ । ସମ୍ବିଧାନର ମୂଲ୍ୟବୋଧ ଓ ବୈଶିଷ୍ଟ୍ୟକୁ ଗଭୀର ଭାବରେ ବୁଝିବା ପାଇଁ ସେ ସମସ୍ତଙ୍କୁ କହିଥିଲେ ।
ଶ୍ୱବିଦ୍ୟାଳୟର ଲୋକସମ୍ପର୍କ ଅଧିକାରୀ ଡ. ଫଗୁନାଥ ଭୋଇ ଧନ୍ୟବାଦ ଅର୍ପଣ କରି କାର୍ଯ୍ୟକ୍ରମ ଶେଷ କରିଥିଲେ। ଡ. କପିଳା ଖେମୁଣ୍ଡୁ, ଡ. ଅଶୋକ ଏରିଗାଲା, ଡ. ଶ୍ରୀନିବାସ ବି. କୋଟନାକ, ଡ. ସୁମିତ ପାଶୱାନ, ଡ. ଅଞ୍ଜନେୟୁଲୁ ଥୋଟାପଲ୍ଲୀ ଓ ଡ. ଫଗୁନାଥ ଭୋଇଙ୍କ ସମେତ ଆୟୋଜକ ସମିତି ସଦସ୍ୟମାନେ କାର୍ଯ୍ୟକ୍ରମ ପରିଚାଳନା କରିଥିଲେ। ଏହି ଅବସରରେ ଅଧ୍ୟାପକ, କର୍ମଚାରୀ ଓ ଛାତ୍ରଛାତ୍ରୀମାନେ ଉପସ୍ଥିତ ଥିଲେ।
---------------
ହିନ୍ଦୁସ୍ଥାନ ସମାଚାର / ପବନ
