କୋଲକାତା, ଜାନୁଆରୀ ୦୯ (ହି.ସ.)- କୋଲକାତାର ଆର.ଜି. କର ମେଡିକାଲ କଲେଜର ଜଣେ ୩୧ ବର୍ଷୀୟା ମହିଳା ଡାକ୍ତରଙ୍କ ବଳାତ୍କାର ଏବଂ ହତ୍ୟା ମାମଲାର ଶୁଣାଣି ସିଆଲଦହ କୋର୍ଟ ସମାପ୍ତ କରିଛି। ଏହି ମାମଲାର ରାୟ ଜାନୁଆରୀ ୧୮ ତାରିଖରେ ପ୍ରକାଶ ପାଇବ।

କଲିକତା ହାଇକୋର୍ଟଙ୍କ ନିର୍ଦ୍ଦେଶ ପରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ମାମଲାର ତଦନ୍ତ କରିଥିଲା। ସିବିଆଇ ତାର ଚାର୍ଜସିଟରେ ସଞ୍ଜୟ ରାୟଙ୍କୁ ମୁଖ୍ୟ ଅଭିଯୁକ୍ତ କରିଥିଲା। ସିବିଆଇ କୋର୍ଟରେ ତାଙ୍କ ପାଇଁ ସର୍ବାଧିକ ଦଣ୍ଡ ଅର୍ଥାତ୍ ମୃତ୍ୟୁଦଣ୍ଡ ଦାବି କରିଛି।

ଏହି ଘଟଣା ସାରା ଦେଶରେ ଉତେଜନା ସୃଷ୍ଟି କରିଥିଲା, ଯାହା ଫଳରେ ଡାକ୍ତର ଏବଂ ମହିଳା ଗୋଷ୍ଠୀମାନେ ପ୍ରବଳ ପ୍ରତିବାଦ କରିଥିଲେ। ସୁରକ୍ଷା ବ୍ୟବସ୍ଥାର ଦାବି ଏବଂ ନ୍ୟାୟ ପାଇଁ ଚିତ୍କାର ସହିତ ଏହି ମାମଲା ଜାତୀୟ ସ୍ତରରେ ଆଲୋଚନାର ବିଷୟ ପାଲଟିଥିଲା। ଏହି ଘଟଣା ପରେ, ସାରା ଦେଶରେ ଡାକ୍ତରଙ୍କ ଧର୍ମଘଟ ହୋଇଥିଲା ଏବଂ ମହିଳା ଡାକ୍ତର ସୁରକ୍ଷା ପାଇଁ ସଚେତନତା ଅଭିଯାନ ବୃଦ୍ଧି ପାଇଥିଲା। ସୁପ୍ରିମକୋର୍ଟ ମଧ୍ୟ ଏହି ମାମଲାର ବିଚାର କରିଥିଲେ ଏବଂ ଚିକିତ୍ସା କର୍ମଚାରୀଙ୍କ ସୁରକ୍ଷା ପାଇଁ ଏକ ଜାତୀୟ ଟାସ୍କ ଫୋର୍ସ ଗଠନ କରିବାକୁ ନିର୍ଦ୍ଦେଶ ଦେଇଥିଲେ। ଏହି ଘଟଣା ପରଠାରୁ କୋଲକାତାର ଡାକ୍ତରୀ ସମ୍ପ୍ରଦାୟ ନିରନ୍ତର ଆନ୍ଦୋଳନ କରିଆସୁଛନ୍ତି, ଯାହା ଏବେ ବି କୌଣସି ନା କୌଣସି ରୂପରେ ଜାରି ରହିଛି।

୯ ଅଗଷ୍ଟ ୨୦୨୪ରେ କୋଲକାତାର ଆର.ଜି.କର ହସ୍ପିଟାଲର ସେମିନାର ହଲରେ ଜଣେ ୩୧ ବର୍ଷୀୟ ପୋଷ୍ଟ ଗ୍ରାଜୁଏଟ୍ ଟ୍ରେନି ଡାକ୍ତରଙ୍କ ମୃତଦେହ ମିଳିଥିଲା। ମହିଳା ଡାକ୍ତରଙ୍କୁ ବଳାତ୍କାର କରାଯିବା ପରେ ହତ୍ୟା କରାଯାଇଥିଲା। ଏହି ମାମଲାରେ, ସିବିଆଇ ସ୍ୱେଚ୍ଛାସେବୀ ସଞ୍ଜୟ ରାୟଙ୍କୁ ଗିରଫ କରିଥିଲା ଏବଂ ତାଙ୍କୁ ଏକମାତ୍ର ଅଭିଯୁକ୍ତ ଭାବରେ ନାମିତ କରି ଏକ ଚାର୍ଜସିଟ୍ ଦାଖଲ କରିଥିଲା। ୧୧ ନଭେମ୍ବର ୨୦୨୪ରୁ ସିଆଲଦହ କୋର୍ଟରେ ଶୁଣାଣି ଆରମ୍ଭ ହୋଇଥିଲା। ଗୁରୁବାର ଶୁଣାଣି ସମାପ୍ତ ହୋଇଛି। ଏବେ ମାମଲାର ନିଷ୍ପତି ଜାନୁଆରୀ ୧୮ ରେ ନିଆଯିବ।

-------------

---------------

ହିନ୍ଦୁସ୍ଥାନ ସମାଚାର / ଗଗନ