ନୂଆଦିଲ୍ଲୀ, ୧୬ ଡିସେମ୍ବର (ହି.ସ.)- ଦିଲ୍ଲୀର ଏକ କୋର୍ଟ ନ୍ୟାସନାଲ ହେରାଲ୍ଡ ମନି ଲଣ୍ଡରିଂ ମାମଲାରେ ପ୍ରବର୍ତନ ନିର୍ଦ୍ଦେଶାଳୟର ଅଭିଯୋଗର ବିଚାର କରିବାକୁ ମନା କରିବା ପରେ, କଂଗ୍ରେସ ଦଳ ଏହାକୁ ରାଜନୈତିକ ପ୍ରତିଶୋଧର ରାଜନୀତି ପାଇଁ ଏକ ବଡ଼ ଆଘାତ ବୋଲି କହିଛି । କଂଗ୍ରେସ ମହାସଚିବ କେ.ସି. ଭେନୁଗୋପାଳ କହିଛନ୍ତି ଯେ ଏହି ନିଷ୍ପତି ପ୍ରମାଣିତ କରେ ଯେ ସମ୍ପୂର୍ଣ୍ଣ ମାମଲା ବିନା ଅଧିକାର କ୍ଷେତ୍ର, ବିନା ଏଫଆଇଆର ଏବଂ କେବଳ କଂଗ୍ରେସ ନେତୃତ୍ୱକୁ ବଦନାମ କରିବା ପାଇଁ କୌଣସି ଆଇନଗତ ଆଧାର ବିନା ଆରମ୍ଭ କରାଯାଇଥିଲା ।
କେସି ଭେନୁଗୋପାଳ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ କହିଛନ୍ତି ଯେ, ଇଡି ବାରମ୍ବାର କଂଗ୍ରେସ ନେତୃତ୍ୱକୁ ତଥାକଥିତ ନ୍ୟାସନାଲ ହେରାଲ୍ଡ ମାମଲାରେ ଫସାଇବାକୁ ଚେଷ୍ଟା କରିଥିଲା, କିନ୍ତୁ ଆଜିର କୋର୍ଟର ନିଷ୍ପତି ସ୍ପଷ୍ଟ କରିଛି ଯେ ଏହି ମାମଲା କେବଳ ରାଜନୈତିକ ଦ୍ୱେଷ ଦ୍ୱାରା ପ୍ରେରିତ ଥିଲା । କଂଗ୍ରେସ ମହାସଚିବ କହିଛନ୍ତି ଯେ, ଏହି ନିଷ୍ପତି ପ୍ରତିଶୋଧ ପରାୟଣ ହୋଇ କାର୍ଯ୍ୟ କରୁଥିବା ତଦନ୍ତକାରୀ ସଂସ୍ଥାଗୁଡ଼ିକୁ ମଧ୍ୟ ଏକ ସ୍ପଷ୍ଟ ବାର୍ତା ପଠାଏ । କଂଗ୍ରେସ ଏବଂ ଏହାର ନେତୃତ୍ୱ ଗଣତନ୍ତ୍ର ଏବଂ ସମ୍ବିଧାନ ଉପରେ ବର୍ତମାନର ଶାସନର ଆକ୍ରମଣକୁ ଚ୍ୟାଲେଞ୍ଜ କରିବାରେ ଆଗରେ ଅଛନ୍ତି ଏବଂ ସମସ୍ତ ପ୍ରକାର ଚ୍ୟାଲେଞ୍ଜ ପାଇଁ ପ୍ରସ୍ତୁତ ଅଛନ୍ତି ।
କଂଗ୍ରେସ ଦଳର ଅଫିସିଆଲ ଏକ୍ସ ପୋଷ୍ଟରେ କୁହାଯାଇଛି ଯେ, ସରକାରଙ୍କ ଦୂଷିତ ଏବଂ ବେଆଇନ କାର୍ଯ୍ୟ ସମ୍ପୂର୍ଣ୍ଣ ଭାବରେ ପର୍ଦ୍ଦାଫାଶ ହୋଇଛି । ପୋଷ୍ଟରେ କୁହାଯାଇଛି ଯେ, ଗତ ଦଶନ୍ଧି ଧରି ମୁଖ୍ୟ ବିରୋଧୀ ଦଳ ବିରୁଦ୍ଧରେ ପ୍ରତିଶୋଧ ପରାୟଣ କାର୍ଯ୍ୟ ଏବେ ଦେଶ ସମ୍ମୁଖରେ ପର୍ଦ୍ଦାଫାଶ ହୋଇଛି, ଏବଂ ନା ମନି ଲଣ୍ଡରିଂର କୌଣସି ମାମଲା ରହିଛି, ନା ଅପରାଧରୁ ଅର୍ଜିତ ଆୟ କିମ୍ବା ନା ସମ୍ପତିର କୌଣସି ଅବୈଧ ସ୍ଥାନାନ୍ତରଣ ମାମଲା ରହିଛି ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ