ନୂଆଦିଲ୍ଲୀ, ୨୫ ଡିସେମ୍ବର (ହିସ) - କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଗୁରୁବାର କହିଛନ୍ତି ଯେ ଓଡ଼ିଶାର କନ୍ଧମାଳ ଜିଲ୍ଲାରେ ଏକ ବଡ଼ ନକ୍ସଲ ବିରୋଧୀ ଅଭିଯାନରେ ଶୀର୍ଷ ମାଓବାଦୀ ନେତା ଏବଂ କେନ୍ଦ୍ରୀୟ କମିଟି ସଦସ୍ୟ ଗଣେଶ ଉଇକେଙ୍କ ସମେତ ଛଅ ଜଣ ନକ୍ସଲବାଦୀଙ୍କ ହତ୍ୟା ନକ୍ସଲମୁକ୍ତ ଭାରତ ହାସଲ କରିବା ଦିଗରେ ଏକ ମାଇଲଖୁଂଟ। ସେ ବିଶ୍ୱାସ ପ୍ରକାଶ କରିଛନ୍ତି ଯେ ଏହି ବଡ଼ ସଫଳତା ସହିତ, ଓଡ଼ିଶା ସମ୍ପୂର୍ଣ୍ଣ ନକ୍ସଲବାଦ ମୁକ୍ତ ହେବା ଦ୍ୱାରରେ ପହଂଚିଛି।
ଗୃହମନ୍ତ୍ରୀଙ୍କ କାର୍ଯ୍ୟାଳୟର ସରକାରୀ ଏକ୍ସ ହ୍ୟାଣ୍ଡେଲ ପୋଷ୍ଟ କରିଛି, ନକ୍ସଲମୁକ୍ତ ଭାରତ ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଓଡ଼ିଶାର କନ୍ଧମାଳରେ ଏକ ବଡ଼ ଅଭିଯାନରେ ଏପର୍ଯ୍ୟନ୍ତ କେନ୍ଦ୍ରୀୟ କମିଟି ସଦସ୍ୟ ଗଣେଶ ଉଇକେଙ୍କ ସମେତ ଛଅ ଜଣ ନକ୍ସଲବାଦୀଙ୍କୁ ନିପାତ କରାଯାଇଛି। ଏହି ବଡ଼ ସଫଳତା ସହିତ, ଓଡ଼ିଶା ନକ୍ସଲବାଦ ମୁକ୍ତ ହେବା ଦ୍ୱାରରେ। ଆମେ ମାର୍ଚ୍ଚ ୩୧, ୨୦୨୬ ପୂର୍ବରୁ ନକ୍ସଲବାଦକୁ ନିପାତ କରିବାକୁ ସଂକଳ୍ପବଦ୍ଧ।
ପୋଲିସ ସୂତ୍ର ଅନୁଯାୟୀ, ନିହତ ନକ୍ସଲଙ୍କ ମଧ୍ୟରେ ଗଣେଶ ଉଇକେ ମଧ୍ୟ ସାମିଲ ଥିଲେ, ଯିଏକି ଜଣେ ଶୀର୍ଷ ମାଓ କମାଣ୍ଡର ଥିଲେ ଯାହାଙ୍କ ଉପରେ ୧ କୋଟି ୧୦ ଲକ୍ଷ ପୁରସ୍କାର ରାଶି ଥିଲା। ତାଙ୍କୁ ଓଡ଼ିଶା ଏବଂ ଆଖପାଖ ରାଜ୍ୟଗୁଡ଼ିକରେ ମାଓ କାର୍ଯ୍ୟକଳାପ ପାଇଁ ଜଣେ ପ୍ରମୁଖ ରଣନୀତିକାର ଭାବରେ ବିବେଚନା କରାଯାଉଥିଲା।
ଓଡିଶାର ପୋଲିସ ମହାନିର୍ଦ୍ଦେଶକ ଯୋଗେଶ ବାହାଦୁର ଖୁରାନିଆ କହିଛନ୍ତି ଯେ ଗୁପ୍ତ ସୂଚନା ଆଧାରରେ କନ୍ଧମାଳ-ଗଞ୍ଜାମ ସୀମାନ୍ତ ଅଂଚଳରେ ମିଳିତ ସୁରକ୍ଷା ବାହିନୀ ଦ୍ୱାରା ଏହି ଅପରେସନ କରାଯାଇଥିଲା। ଏନକାଉଂଟର ସମୟରେ ଛଅ ଜଣ ନକ୍ସଲ ନିହତ ହୋଇଥିଲେ।
ସୁରକ୍ଷା ବାହିନୀ ଅଂଚଳରେ ସନ୍ଧାନ ଜାରି ରଖିଛନ୍ତି, ଏବଂ ଅଧିକାରୀମାନେ କହିଛନ୍ତି ଯେ ଏହି ଅପରେସନ ଓଡ଼ିଶାରେ ନକ୍ସଲ ସମସ୍ୟା ଦୂର କରିବାରେ ନିର୍ଣ୍ଣାୟକ ପ୍ରମାଣିତ ହେବ।
-----------------------
---------------
ହିନ୍ଦୁସ୍ଥାନ ସମାଚାର / ଗଗନ