ସମ୍ବଲପୁର, ୧୪ ଜୁଲାଇ (ହି.ସ.)

ସମ୍ବଲପୁର ସହରର ଅଗ୍ରଣୀ ସ୍ୱେଚ୍ଛାସେବୀ ଅନୁଷ୍ଠାନ ‘ଉତ୍ସର୍ଗ’ ପକ୍ଷରୁ ଚଳିତ ଶିକ୍ଷା ବର୍ଷରୁ ମେଧାବୀ ତଥା ଅସହାୟ ଛାତ୍ରଛାତ୍ରୀଙ୍କ ପାଇଁ ଏକ ପ୍ରକଳ୍ପ ଆରମ୍ଭ କରାଯାଇଛି । ଏଥିରେ ସରକାରୀ କଲେଜରେ ଅଧ୍ୟୟନରତ ମେଧାବୀ ଛାତ୍ରଛାତ୍ରୀମାନଙ୍କୁ ବୃତ୍ତି ଏବଂ ଉଚ୍ଚଶିକ୍ଷା ପାଇଁ ଅସ୍ୱଚ୍ଛଳ ବର୍ଗର ବିଦ୍ୟାର୍ଥୀମାନଙ୍କୁ ଆର୍ଥିକ ସହଯୋଗ କରାଯିବ । ଆଜି ଉତ୍ସର୍ଗ କାର୍ଯ୍ୟାଳୟ ଠାରେ ଏ ସଂପର୍କରେ ସୂଚନା ଦିଆଯାଇଛି । ପ୍ରକଳ୍ପ ଅଧ୍ୟକ୍ଷ ପ୍ରିୟରଞ୍ଜନ ସାହୁ ସୂଚନା ଦେଇ କହିଛନ୍ତି ଯେ, ସମ୍ବଲପୁର ସରକାରୀ ମହିଳା କଲେଜରେ ଯୁକ୍ତ ତିନିରେ ପଢ଼ୁଥିବା ବରଗଡ଼ର ଏବଂ ପିଜି ଅଧ୍ୟୟନ କରୁଥିବା ଦୁଇ ଜଣ ଛାତ୍ରୀ ଉଚ୍ଚଶିକ୍ଷା ପାଇଁ ଅସମର୍ଥତା ପ୍ରକାଶ କରିଥିବା ଜଣାପଡ଼ିଥିଲା । ତନ୍ମଧ୍ୟରୁ ଜଣେ ଛାତ୍ରୀ ଟି.ସି. ନେବା ପାଇଁ ଆବେଦନ କରୁଥିବା ବେଳେ କଲେଜ କର୍ତ୍ତୃପକ୍ଷଙ୍କ ଠାରୁ ସୂଚନା ପାଇ ଉତ୍ସର୍ଗର କର୍ମକର୍ତ୍ତାମାନେ ବୃତ୍ତିର ସୁବିଧା କରିଥିଲେ । ଏଥିପାଇଁ ଏମାନଙ୍କୁ ପ୍ରଥମ ପର୍ଯ୍ୟାୟରେ ସେମାନଙ୍କ ହଷ୍ଟେଲ ବା ମେସ୍‌, ୟୁନିଫର୍ମ ପ୍ରଭୃତି ପାଇଁ ୨୬ ହଜାର ଟଙ୍କା ଲେଖାଏଁ ପ୍ରଦାନ କରାଯାଇଛି । ସେହିଭଳି ଜିଲ୍ଲାର ଦଶମ ଶ୍ରେଣୀ ବୋର୍ଡ ପରୀକ୍ଷାରେ ୩୧ଟି ସରକାରୀ ହାଇସ୍କୁଲର ମେଧାବୀ ଛାତ୍ରଛାତ୍ରୀମାନଙ୍କ ପାଇଁ ବୃତ୍ତିର ବ୍ୟବସ୍ଥା କରାଯାଇଛି । ଏ-୧ ଗ୍ରେଡ଼୍ ପାଇଥିବା ୫ଜଣଙ୍କୁ ୩ ହଜାର ଟଙ୍କା ଏବଂ ଏ-୨ ଗ୍ରେଡ଼୍ ପାଇଥିବା ୬୩ ଜଣ ବିଦ୍ୟାର୍ଥୀଙ୍କୁ ମେଧା ବୃତ୍ତି ସ୍ୱରୂପ ପ୍ରୋତ୍ସାହନ ରାଶି ଅନ୍‌ଲାଇନ୍‌ରେ ପ୍ରଦାନ କରାଯାଉଛି ।

ସ୍ମାଇଲ ଫାଉଣ୍ଡେସନ୍ ଏଥିପାଇଁ ସହାୟତାର ହାତ ବଢ଼ାଇଛି । ପୂର୍ବରୁ ମଧ୍ୟ ଜିଲ୍ଲାର ଅନାଥାଶ୍ରମର ଛାତ୍ରଛାତ୍ରୀଙ୍କ ପାଇଁ ଟ୍ୟୁସନ୍ ଓ ଅନ୍ୟାନ୍ୟ ବିଷୟ ପାଇଁ ଆର୍ଥିକ ସହାୟତା ପ୍ରଦାନ କରାଯାଇଥିଲା ।

ଚଳିତ ବର୍ଷ କାର୍ଯ୍ୟକାରୀ ହେଉଥିବା ପ୍ରକଳ୍ପ ପ୍ରଥମେ ଦୁଇ ବର୍ଷ ପାଇଁ ବଳବତ୍ତର ରହିବ । ୧୯୮୪ରେ ସ୍ଥାପିତ ‘ଉତ୍ସର୍ଗ’ ରକ୍ତଦାନ ଏବଂ ଚିକିତ୍ସା ସେବା କ୍ଷେତ୍ରକୁ ସଂଗଠିତ ଏବଂ ବୈପ୍ଳବିକ ରୂପ ପ୍ରଦାନ କରିଥିଲା ।

ଏ ବର୍ଷ ଗତ ସେପ୍ଟେମ୍ବର ମାସରୁ ଉତ୍ସର୍ଗ ପକ୍ଷରୁ ୩୫୭ ୟୁନିଟ୍ ରକ୍ତ ସଂଗ୍ରହ କରାଯାଇ ରୋଗୀମାନଙ୍କ ପାଇଁ ରକ୍ତ ଅଭାବ ଦୂର କରିବା ପାଇଁ ସହାୟକ ହୋଇଛି । ୪୮ଟି ଚକ୍ଷୁ ସଂଗ୍ରହ କରାଯାଇ ପ୍ରତ୍ୟାରୋପଣ କରାଯାଇଛି । ଏହା ବ୍ୟତୀତ ୩ଟି ଆମ୍ବୁଲାନ୍ସ ସହିତ ଅକ୍ସିଜନ୍‌, ବାଇଟେକ୍ ମେସିନ୍‌, ରୋଗୀ ସେବାରେ ଉପଯୋଗ କରାଯାଉଛି ବୋଲି ବରିଷ୍ଠ ସଦସ୍ୟ ସୁଧୀର ପୂଜାରୀ ସୂଚନା ଦେଇଥିଲେ । ସେହିଭଳି ୩୨ଟି ସମ୍ପୂର୍ଣ୍ଣ ଶରୀର ଭୀମସାରର ଆନାଟୋମୀ ବିଭାଗକୁ ହସ୍ତାନ୍ତର କରାଯାଇଛି । ଏତଦ୍ ଭିନ୍ନ କର୍କଟ ଏବଂ ଅନ୍ୟାନ୍ୟ ଜଟିଳ ରୋଗର ନିଦାନ ପାଇଁ ଅସାୟ ରୋଗୀମାନଙ୍କୁ ଔଷଧ ମଧ୍ୟ ଦିଆଯାଉଥିବା ସେ ସୂଚନା ଦେଇଥିଲେ । ସେହିଭଳି ବିଭିନ୍ନ ସମୟରେ ସ୍ୱାସ୍ଥ୍ୟସେବା ଏବଂ ରକ୍ତଦାନ ଶିବିର ଆୟୋଜନ କରାଯାଉଛି ବୋଲି ସେ କହିଥିଲେ । ଆୟୋଜିତ ସାମ୍ବାଦିକ ସମ୍ମିଳନୀରେ ସଂଯୋଜକ ପ୍ରଶାନ୍ତ କୁମାର ପାଟ୍ଟଯୋଶୀ ଉପସ୍ଥିତ ଥିଲେ ।

---------------

ହିନ୍ଦୁସ୍ଥାନ ସମାଚାର / ଶୈଳେଶ