ନୂଆଦିଲ୍ଲୀ, 11 ଜାନୁଆରି (ହି.ସ.)- ପ୍ରଧାନମନ୍ତ୍ରୀ
ନରେନ୍ଦ୍ର ମୋଦି ରବିବାର କହିଛନ୍ତି ଯେ ଭାରତର ଯୁବପିଢ଼ି ନିଜର ସାଂସ୍କୃତିକ ମୂଳକୁ ମଧ୍ୟ
ସୁଦୃଢ଼ କରୁଛନ୍ତି। ମୋଦି ଆଜି ଏକ ଭିଡିଓ ବାର୍ତ୍ତା ମାଧ୍ୟମରେ ଶ୍ରୀମଦ୍ ବିଜୟରତ୍ନ ସୁନ୍ଦର
ସୂରିଶ୍ୱରଜୀ ମହାରାଜଙ୍କ
୫୦୦ତମ ପୁସ୍ତକର ବିମୋଚନ ସମାରୋହରେ ଏହି କଥା କହିଥିଲେ। ଏହି ପୁସ୍ତକର ବିଷୟ “ପ୍ରେମନୁ ବିଶ୍ୱ, ବିଶ୍ୱନୋ ପ୍ରେମ”
ଅଟେ।
ଭିଡିଓ ବାର୍ତ୍ତାରେ ସେ କହିଛନ୍ତି,
“ଭାରତ ଆଜି ବିଶ୍ୱର ସବୁଠାରୁ ଯୁବ ଦେଶମାନଙ୍କ ମଧ୍ୟରୁ ଗୋଟିଏ,
ଯେଉଁଠାର ଯୁବମାନେ ବିକଶିତ ଭାରତର ନିର୍ମାଣ କରୁଛନ୍ତି
ଏବଂ ନିଜ ସାଂସ୍କୃତିକ ମୂଳକୁ ମଧ୍ୟ ସୁଦୃଢ଼ କରୁଛନ୍ତି। ଏହି ପରିବର୍ତ୍ତନରେ ମହାରାଜ ସାହେବଙ୍କ
ପରି ସନ୍ତମାନଙ୍କର ମାର୍ଗଦର୍ଶନ ଏବଂ ସାହିତ୍ୟ ଗୁରୁତ୍ୱପୂର୍ଣ୍ଣ ଭୂମିକା ନିଭାଉଛି।” ସେ କହିଲେ ଯେ ଏହା
କେବଳ ଗୋଟିଏ ପୁସ୍ତକ ନୁହେଁ, ବରଂ ଏକ ମନ୍ତ୍ର, ଯାହା ପ୍ରେମର
ଶକ୍ତିକୁ ପରିଚୟ କରାଏ। ବିଶେଷକରି ଆଜି, ଯେତେବେଳେ ବିଶ୍ୱ ବିଭାଜନ ଓ
ସଂଘର୍ଷରେ ଜୁଝୁଛି, ସେତେବେଳେ ଏହି
ପୁସ୍ତକର ଆବଶ୍ୟକତା ପୂର୍ବପେକ୍ଷା ଅଧିକ ଅଟେ।
ପ୍ରଧାନମନ୍ତ୍ରୀ ମୋଦି ଜୈନ
ଦର୍ଶନର ମାର୍ଗଦର୍ଶକ ସିଦ୍ଧାନ୍ତ “ପରସ୍ପରୋପଗ୍ରହୋ ଜୀବନମ୍” ଉଲ୍ଲେଖ କରି ଏହାର ଅର୍ଥ ବ୍ୟାଖ୍ୟା କରି କହିଲେ ଯେ ପ୍ରତ୍ୟେକ ଜୀବନ ଅନ୍ୟ ଜୀବନ ସହ ଜଡ଼ିତ
ଅଟେ। ଯେତେବେଳେ ଏହି ସିଦ୍ଧାନ୍ତକୁ ବୁଝାଯାଏ, ସେତେବେଳେ ଆମର ଦୃଷ୍ଟିକୋଣ ବ୍ୟକ୍ତିଗତ ସ୍ୱାର୍ଥରୁ ହଟି ସାମୂହିକ ହିତ ଦିଗକୁ ମୁହଁ ଫେରାଏ ଏବଂ ଆମେ
ବ୍ୟକ୍ତିଗତ ଆକାଂକ୍ଷାଠାରୁ ଉପରକୁ ଉଠି ସମାଜ, ରାଷ୍ଟ୍ର ଏବଂ ମାନବତାର ଲକ୍ଷ୍ୟ ବିଷୟରେ ଚିନ୍ତା କରିବାକୁ ଲାଗୁ।
ସେ କହିଛନ୍ତି ଯେ ମହାରାଜଙ୍କ
୫୦୦ଟି ରଚନା ଗୋଟିଏ ବିଶାଳ ସାଗର ସଦୃଶ, ଯାହାର ମଧ୍ୟରେ ଅଗଣିତ ଚିନ୍ତାର ରତ୍ନ ସମାବେଶିତ ଅଛି, ଯେଗୁଡ଼ିକ ମାନବତାର ସମସ୍ୟାଗୁଡ଼ିକର ସହଜ ଏବଂ ଆଧ୍ୟାତ୍ମିକ ସମାଧାନ ପ୍ରଦାନ କରେ।
ପ୍ରଧାନମନ୍ତ୍ରୀ ମୋଦି ନବକାର
ମନ୍ତ୍ର ଦିବସର ଐତିହାସିକ ଅବସରରେ ନିଆଯାଇଥିବା ନଅଟି ସଙ୍କଳ୍ପକୁ ଆଜି ପୁଣିଥରେ ଦୋହରାଇଥିଲେ,
ଯାହା ରାଷ୍ଟ୍ର ଏବଂ ସମାଜର ଉତ୍ଥାନ ପାଇଁ ଆବଶ୍ୟକ।
ଏହାର ମଧ୍ୟରେ ଜଳ ସଂରକ୍ଷଣ, “ମାଆଙ୍କ ନାମରେ
ଗୋଟିଏ ଗଛ” ରୋପଣ,
ସ୍ୱଚ୍ଛତା ଅଭିଯାନକୁ ଆଗକୁ ବଢ଼ାଇବା,
ସ୍ଥାନୀୟ ଉତ୍ପାଦକୁ ପ୍ରୋତ୍ସାହନ ଦେବା,
ଭାରତ ଦର୍ଶନକୁ ଆପଣାଇବା,
ପ୍ରାକୃତିକ କୃଷିକୁ ଗ୍ରହଣ କରିବା,
ସୁସ୍ଥ ଜୀବନଶୈଳୀ ଅନୁସରଣ କରିବା,
ଯୋଗ ଏବଂ କ୍ରୀଡ଼ାକୁ ଜୀବନର ଅଂଶ କରିବା ଏବଂ
ଗରିବମାନଙ୍କୁ ସାହାଯ୍ୟ କରିବାର ସଙ୍କଳ୍ପ ସାମିଲ ଅଛି।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
11 Jan 2026
