ହାଇଦ୍ରାବାଦ, ୧୭ ଅକ୍ଟୋବର (ହି.ସ.)- ଭାରତୀୟ ପୋଲିସ ସେବା (ଆଇପିଏସ୍)ର ୭୮ତମ ବ୍ୟାଚ୍ର ପରୀକ୍ଷାଧୀନ ଅଧିକାରୀମାନଙ୍କ ପାସିଂ-ଆଉଟ୍ ପରେଡ୍ ଶନିବାର ହାଇଦ୍ରାବାଦସ୍ଥିତ ସର୍ଦ୍ଦାର ବଲ୍ଲଭଭାଇ ପଟେଲ ଜାତୀୟ ପୋଲିସ ଏକାଡେମୀରେ ଆୟୋଜିତ ହୋଇଥିଲା। ଏହା ସହିତ ସେମାନଙ୍କର ମୌଳିକ ପ୍ରଶିକ୍ଷଣର ପ୍ରଥମ ପର୍ଯ୍ୟାୟ ସମାପ୍ତ ହୋଇଥିଲା।
କେନ୍ଦ୍ରୀୟ ଗୃହ ସଚିବ ଗୋବିନ୍ଦ ମୋହନ ସମାପନ ପରେଡ୍ର ମୁଖ୍ୟ ଅତିଥି ଥିଲେ ଏବଂ ସେ ପରେଡ୍ର ନିରୀକ୍ଷଣ କରିଥିଲେ। ଏକାଡେମୀରେ ମୋଟ ୧୫୧ ଜଣ ଅଧିକାରୀ ପ୍ରଶିକ୍ଷାର୍ଥୀ ସେମାନଙ୍କ ପ୍ରଶିକ୍ଷଣର ପ୍ରଥମ ପର୍ଯ୍ୟାୟ ସମାପ୍ତ କରିଥିଲେ, ଯେଉଁଥିରେ ୧୩୫ ଜଣ ଆଇପିଏସ୍ ପ୍ରୋବେସନର ଏବଂ ନେପାଳ, ଭୁଟାନ ଓ ମାଲଦ୍ୱୀପର ୧୬ ଜଣ ବିଦେଶୀ ଅଧିକାରୀ ପ୍ରଶିକ୍ଷାର୍ଥୀ ସାମିଲ ଅଛନ୍ତି।
ପରୀକ୍ଷାଧୀନ ଅଧିକାରୀମାନେ ପୋଲିସିଂ, ଅପରାଧିକ ତଦନ୍ତ, ଫୋରେନସିକ୍ ବିଜ୍ଞାନ, ଆଭ୍ୟନ୍ତରୀଣ ସୁରକ୍ଷା, ସାର୍ବଜନୀନ ଶୃଙ୍ଖଳା, ଅପରାଧ ବିଜ୍ଞାନ, ପୋଲିସ ପରିଚାଳନା, ମାନବାଧିକାର ଏବଂ ନୂତନ ଅପରାଧିକ ଆଇନଗୁଡ଼ିକର କାର୍ଯ୍ୟକାରିତା କ୍ଷେତ୍ରରେ ଗଭୀର ପ୍ରଶିକ୍ଷଣ ଗ୍ରହଣ କରିଥିଲେ।
ପ୍ରଶିକ୍ଷଣ କାର୍ଯ୍ୟକ୍ରମରେ ଆଇନ ପ୍ରବର୍ତନ କ୍ଷେତ୍ର ସମ୍ମୁଖୀନ ହେଉଥିବା ନୂତନ ଆହ୍ୱାନଗୁଡ଼ିକ ଉପରେ ମଧ୍ୟ ଧ୍ୟାନ ଦିଆଯାଇଥିଲା, ଯେଉଁଥିରେ ସାଇବର ଅପରାଧ, କ୍ରିପ୍େଟଟାକରେନ୍ସି ସମ୍ବନ୍ଧୀୟ ଠକେଇ ମାମଲା, ଡାର୍କନେଟ୍ କାର୍ଯ୍ୟକଳାପ, ଆର୍ôଥକ ଅପରାଧ, ନିଶାଦ୍ରବ୍ୟ ଚୋରା ଚାଲାଣ, କୃତ୍ରିମ ବୁଦ୍ଧିମତା ଏବଂ ଡ୍ରୋନ୍ ସମ୍ବନ୍ଧୀୟ ବିପଦ ସାମିଲ ଅଛି।
ପ୍ରଶିକ୍ଷାର୍ଥୀମାନଙ୍କୁ ତେଲେଙ୍ଗାନାର ଗ୍ରେହାଉଣ୍ଡସ୍, ଭାରତ-ତିବ୍ୱତ ସୀମା ପୋଲିସ (ଆଇଟିବିପି) ଏବଂ ସୀମା ସୁରକ୍ଷା ବଳ (ବିଏସ୍ଏଫ୍) ସମେତ ସ୍ୱତନ୍ତ୍ର ପୋଲିସ ଓ ସୁରକ୍ଷା ସଂଗଠନଗୁଡ଼ିକ ସହିତ ସଂଯୁକ୍ତ କରାଯାଇ ବ୍ୟବହାରିକ ଅଭିଜ୍ଞତା ପ୍ରଦାନ କରାଯାଇଥିଲା। ସେମାନେ ଭିଡ଼ ପରିଚାଳନା, ନିର୍ବାଚନୀ ଡ୍ୟୁଟି ଏବଂ ପ୍ରମୁଖ ସାର୍ବଜନୀନ କାର୍ଯ୍ୟକ୍ରମ ସମୟରେ ସୁରକ୍ଷା ବ୍ୟବସ୍ଥା ସହ ଜଡ଼ିତ କ୍ଷେତ୍ରୀୟ ଅଭ୍ୟାସରେ ମଧ୍ୟ ଅଂଶଗ୍ରହଣ କରିଥିଲେ।
---------------
--------
ହିନ୍ଦୁସ୍ଥାନ ସମାଚାର / ଗଗନ
17 Oct 2026
