କନ୍ଧମାଳ, ୧୧ ନଭେମ୍ବର (ହି.ସ.) ନଭେମ୍ବର ୨୦୨୬: ବାତ୍ୟା ‘ଅର୍ଣ୍ଣବ’ ଦ୍ୱାରା ପ୍ରଭାବିତ ପରିବାରଗୁଡ଼ିକୁ ତୁରନ୍ତ ସହାୟତା ଯୋଗାଇ ଦେବା ପାଇଁ ମୁଖ୍ୟମନ୍ତ୍ରୀଙ୍କ ଦ୍ୱାରା ଘୋଷିତ ପ୍ୟାକେଜ୍ କ୍ରମରେ ଓଡ଼ିଶା ସରକାର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ସାମ୍ପ୍ରତିକ ପରିସ୍ଥିତିର ସମୀକ୍ଷା ପରେ ଗଞ୍ଜାମ, ଗଜପତି ଏବଂ କନ୍ଧମାଳ ଜିଲ୍ଲାର ସମସ୍ତ ବ୍ଲକକୁ ପରିବାର ପିଛା ୫୦ କିଲୋଗ୍ରାମ ଚାଉଳ ଏବଂ ୨,୫୦୦ ଟଙ୍କାର ଜରୁରୀକାଳୀନ ରିଲିଫ୍ ସହାୟତା ସମ୍ପ୍ରସାରଣ କରିବାକୁ ସରକାର ନିଷ୍ପତ୍ତି ନେଇଛନ୍ତି। ଏ ନେଇ ସ୍ୱତନ୍ତ୍ର ରିଲିଫ୍ କମିଶନର ରାଜେଶ ପ୍ରଭାକର ପାଟିଲ (ଆଇ.ଏ.ଏସ୍) ଚିଠି ନଂ ୬୬୭୮/ଏସ୍ଆର୍ସି ମାଧ୍ୟମରେ ଗଞ୍ଜାମ, ଗଜପତି ଓ କନ୍ଧମାଳ ଜିଲ୍ଲାପାଳମାନଙ୍କୁ ଆବଶ୍ୟକୀୟ ନିର୍ଦ୍ଦେଶନାମା ଜାରି କରିଛନ୍ତି।
ରିଲିଫ୍ ବଣ୍ଟନ ଓ କାର୍ଯ୍ୟାନ୍ୱୟନ ପାଇଁ ମୁଖ୍ୟ ନିର୍ଦ୍ଦେଶାବଳୀ ମୁତାବକ,
ହିତାଧିକାରୀ ଚିହ୍ନଟ ଓ ଯାଞ୍ଚ: ସଂପୃକ୍ତ ତିନୋଟି ଜିଲ୍ଲାର ସମସ୍ତ ବ୍ଲକରେ ଯୋଗ୍ୟ ପରିବାରଗୁଡ଼ିକର ତୁରନ୍ତ ଗଣନା ଓ ଯାଞ୍ଚ ପ୍ରକ୍ରିୟା ଶେଷ କରି ସ୍ୱଚ୍ଛ, ସୁରୁଖୁରୁ ଏବଂ ସମୟାନୁବର୍ତ୍ତୀ ଭାବେ ଏହି ରିଲିଫ୍ ସହାୟତା ବଣ୍ଟନ ନିଶ୍ଚିତ କରିବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି।
ଚାଉଳ ଯୋଗାଣ ବ୍ୟବସ୍ଥା: ରିଲିଫ୍ ଚାଉଳର ଆବଶ୍ୟକୀୟ ଆକଳନ ଓ ଉଠାଣ ପାଇଁ ଜିଲ୍ଲା ବେସାମରିକ ଯୋଗାଣ ଅଧିକାରୀ ଏବଂ ଓଡ଼ିଶା ରାଜ୍ୟ ବେସାମରିକ ଯୋଗାଣ ନିଗମ ସହ ତୁରନ୍ତ ସମନ୍ୱୟ ରକ୍ଷା କରିବାକୁ କୁହାଯାଇଛି।
ଆର୍ଥିକ ସହାୟତା ପ୍ରଦାନ ପ୍ରଣାଳୀ: ପରିବାର ପିଛା ୨,୫୦୦ ଟଙ୍କାର ଆର୍ଥିକ ସହାୟତା ମୁଖ୍ୟତଃ ସିଧାସଳଖ ବ୍ୟାଙ୍କ ଆକାଉଣ୍ଟ ମାଧ୍ୟମରେ ହିତାଧିକାରୀଙ୍କ ଖାତାକୁ ପଠାଯିବ। ଯେଉଁ ଅଞ୍ଚଳରେ ବ୍ୟାଙ୍କିଙ୍ଗ୍ ସେବା ବାଧାପ୍ରାପ୍ତ ହୋଇଛି, ସେଠାରେ ଉପଯୁକ୍ତ ପ୍ରମାଣପତ୍ର ଓ ବିନିଯୋଗ ନଥିପତ୍ର ବଜାୟ ରଖି ଅନୁମୋଦିତ ବିକଳ୍ପ ମାଧ୍ୟମରେ ଅର୍ଥ ପ୍ରଦାନ କରାଯିବ।
ଦୈନିକ ଅଗ୍ରଗତି ରିପୋର୍ଟ: ଚାଉଳ ଏବଂ ନଗଦ ଅର୍ଥ ବଣ୍ଟନ ପ୍ରକ୍ରିୟା ସମ୍ପୂର୍ଣ୍ଣ ହେବା ପର୍ଯ୍ୟନ୍ତ ପ୍ରତିଦିନ ଅପରାହ୍ନ ୫:୦୦ ସୁଦ୍ଧା ବ୍ଲକ-ୱାରୀ ଦୈନିକ ଅଗ୍ରଗତି ରିପୋର୍ଟ ସ୍ୱତନ୍ତ୍ର ରିଲିଫ୍ କମିଶନରଙ୍କ କାର୍ଯ୍ୟାଳୟ (ରାଜ୍ୟ ଜରୁରୀକାଳୀନ ପରିଚାଳନା କେନ୍ଦ୍ର) ନିକଟରେ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି।
ହିନ୍ଦୁସ୍ଥାନ ସମାଚାର / ପ୍ରଶାନ୍ତ
