• କେବେ ସୁପ୍ରିମକୋର୍ଟ ତ କେବେ ପ୍ରଧାନମନ୍ତ୍ରୀଙ୍କ ଆବାସ ସମ୍ମୁଖରେ ପ୍ରଦର୍ଶନକୁ ନେଇ କଂଗ୍ରେସକୁ ଟାର୍ଗେଟ

• କହିଲେ, ବିଚିତ୍ର ଓ ବିକ୍ଷିପ୍ତ ହୋଇଗଲାଣି କଂଗ୍ରେସର ଯୁବରାଜଙ୍କ କାର୍ଯ୍ୟକଳାପ

• ସାମ୍ବିଧାନିକ ସଂସ୍ଥା ଓ ଜାତୀୟ ପ୍ରସାରଣ ସେବା ଉପରେ ପ୍ରଶ୍ନ ଉଠାଇବା ଅଭିଯୋଗ

ଭୁବନେଶ୍ୱର, 02 ନଭେମ୍ବର (ହି.ସ.) କଂଗ୍ରେସ ନେତା ରାହୁଲ ଗାନ୍ଧୀଙ୍କ ଉପରେ ତୀବ୍ର ରାଜନୈତିକ ଆକ୍ରମଣ କରିଛନ୍ତି ଭାରତୀୟ ଜନତା ପାର୍ଟିର ବରିଷ୍ଠ ନେତା ତଥା ରାଜ୍ୟସଭା ସାଂସଦ ସୁଧାଂଶୁ ତ୍ରିବେଦୀ। ସେ ରାହୁଲ ଗାନ୍ଧୀଙ୍କ ଆଚରଣକୁ ଉପଦ୍ରବକାରୀ ଓ ଆତଙ୍କବାଦୀଙ୍କ ମାନସିକତା ସହ ତୁଳନା କରି କହିଛନ୍ତି ଯେ, ତାଙ୍କର ରାଜନୈତିକ କାର୍ଯ୍ୟକଳାପ ଓ ବିରୋଧ ପ୍ରଦର୍ଶନର ଶୈଳୀ ଗଣତାନ୍ତ୍ରିକ ମର୍ଯ୍ୟାଦାର ଅନୁକୂଳ ନୁହେଁ।

ଡ. ତ୍ରିବେଦୀ କଂଗ୍ରେସ ଓ ରାହୁଲ ଗାନ୍ଧୀଙ୍କ ରାଜନୈତିକ ଆଚରଣ ଉପରେ ପ୍ରଶ୍ନ ଉଠାଇ କହିଛନ୍ତି ଯେ, ବିରୋଧୀ ଦଳର ନେତାଙ୍କଠାରୁ ଗଣତାନ୍ତ୍ରିକ ମର୍ଯ୍ୟାଦା ପାଳନ କରିବା ଆଶା କରାଯାଏ। ସେ ଅଲ୍ ଇଣ୍ଡିଆ ରେଡିଓ ପରିସରରେ ବିରୋଧୀ ନେତାଙ୍କ ପ୍ରବେଶ, ପ୍ରଧାନମନ୍ତ୍ରୀଙ୍କ ଆବାସ ସମ୍ମୁଖରେ ବିରୋଧ ପ୍ରଦର୍ଶନ ଏବଂ ସୁପ୍ରିମକୋର୍ଟ ସହ ଜଡ଼ିତ ବିରୋଧ ପ୍ରଦର୍ଶନର ଉଦାହରଣ ଦେଇଥିଲେ।

ଗଣତାନ୍ତ୍ରିକ ମର୍ଯ୍ୟାଦା ବଜାୟ ରଖିବା ଆବଶ୍ୟକ

ସେ କହିଥିଲେ ଯେ, ଗଣତନ୍ତ୍ରରେ ବିରୋଧ କରିବା ବିରୋଧୀ ଦଳର ଅଧିକାର। କିନ୍ତୁ ସାମ୍ବିଧାନିକ ସଂସ୍ଥା ଓ ସାର୍ବଜନୀନ ବ୍ୟବସ୍ଥା ପ୍ରତି ମର୍ଯ୍ୟାଦା ବଜାୟ ରଖିବା ମଧ୍ୟ ଜରୁରୀ। ସଂସଦରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ରାହୁଲ ଗାନ୍ଧୀ ଆଲିଙ୍ଗନ କରିବା ପରେ ଗୃହ ଭିତରେ କରିଥିବା ଇଙ୍ଗିତର ମଧ୍ୟ ସେ ଉଲ୍ଲେଖ କରିଥିଲେ। ଏଭଳି ଆଚରଣ ରାଜନୈତିକ ଗମ୍ଭୀରତା ଉପରେ ପ୍ରଶ୍ନ ଉଠାଉଛି ବୋଲି ସେ କହିଥିଲେ।

କେତେବେଳେ ସୁପ୍ରିମକୋର୍ଟ ତ ଆଉ କେତେବେଳେ ପ୍ରଧାନମନ୍ତ୍ରୀଙ୍କ ଆବାସ ସମ୍ମୁଖରେ ପ୍ରଦର୍ଶନ କରିବାକୁ ଉଦ୍ୟମ କରିବା କଂଗ୍ରେସର ରାଜନୈତିକ ଚିନ୍ତାଧାରା ଓ କାର୍ଯ୍ୟଶୈଳୀ ଉପରେ ଗମ୍ଭୀର ପ୍ରଶ୍ନ ଉଠାଉଛି ବୋଲି ସେ ମତ ଦେଇଥିଲେ।

ଯୁବରାଜଙ୍କ କାର୍ଯ୍ୟକଳାପ ବିଚିତ୍ର ଓ ବିକ୍ଷିପ୍ତ ହେଉଛି

ସୋମବାର ଭୁବନେଶ୍ୱରସ୍ଥିତ ବିଜେପି ରାଜ୍ୟ କାର୍ଯ୍ୟାଳୟରେ ସାମ୍ବାଦିକମାନଙ୍କୁ ସମ୍ବୋଧିତ କରି ଶ୍ରୀ ତ୍ରିବେଦୀ କହିଥିଲେ ଯେ, କଂଗ୍ରେସର ଯୁବରାଜଙ୍କ କାର୍ଯ୍ୟକଳାପ ଏବେ ବିଚିତ୍ର ଓ ବିକ୍ଷିପ୍ତ ହେବାରେ ଲାଗିଛି। ଗଣତନ୍ତ୍ରରେ ଅସହମତି ପ୍ରକାଶ କରିବା ଓ ବିରୋଧ ଜଣାଇବାର ଏହା କ'ଣ ଉପାୟ ବୋଲି ସେ ପ୍ରଶ୍ନ କରିଥିଲେ। ସାମ୍ବିଧାନିକ ସଂସ୍ଥା ଓ ଗୁରୁତ୍ୱପୂର୍ଣ୍ଣ ଜାତୀୟ ପ୍ରତିଷ୍ଠାନ ସମ୍ମୁଖରେ ପ୍ରଦର୍ଶନ କରି ରାଜନୈତିକ ବାର୍ତ୍ତା ଦେବାକୁ ଉଦ୍ୟମ କରିବା କେଉଁ ମାନସିକତାର ପରିଚୟ ବୋଲି ସେ ପଚାରିଥିଲେ।

ବିଜେପି ନେତା କହିଥିଲେ ଯେ, କଂଗ୍ରେସ ବୁଝିବା ଉଚିତ ଯେ ଗଣତନ୍ତ୍ର କେବଳ କ୍ଷମତା ହାସଲ କରିବାର ମାଧ୍ୟମ ନୁହେଁ; ଏହା ସାମ୍ବିଧାନିକ ସଂସ୍ଥା ଓ ଗଣତାନ୍ତ୍ରିକ ପ୍ରକ୍ରିୟା ପ୍ରତି ସମ୍ମାନ ବଜାୟ ରଖିବାର ଏକ ବ୍ୟବସ୍ଥା ମଧ୍ୟ। କୌଣସି ପ୍ରକ୍ରିୟାକୁ ନେଇ ଆପତ୍ତି ଥିଲେ ତାହାର ସମାଧାନ ପାଇଁ ସାମ୍ବିଧାନିକ ଓ ଗଣତାନ୍ତ୍ରିକ ମାର୍ଗ ଉପଲବ୍ଧ ରହିଛି। ରାସ୍ତାରେ ସଂଘର୍ଷ ଏବଂ ସଂସ୍ଥାଗୁଡ଼ିକ ସମ୍ମୁଖରେ ପ୍ରଦର୍ଶନକୁ ରାଜନୈତିକ ଅସ୍ତ୍ର ଭାବେ ବ୍ୟବହାର କରିବା ଉଚିତ ନୁହେଁ।

ଏସ୍ଆଇଆର୍ ପ୍ରସଙ୍ଗକୁ କଂଗ୍ରେସ ରାଜନୈତିକ ରଙ୍ଗ ଦେଇ ଜନସାଧାରଣଙ୍କୁ ବିଭ୍ରାନ୍ତ କରିବାକୁ ଉଦ୍ୟମ କରୁଥିବା ସେ ଅଭିଯୋଗ କରିଥିଲେ। ଭୋଟର ତାଲିକାର ନିରପେକ୍ଷତା ଉପରେ ପ୍ରଶ୍ନ ଉଠାଇବା ପରିବର୍ତ୍ତେ ବିରୋଧୀ ଦଳ ଏକ ସ୍ୱଚ୍ଛ ପ୍ରକ୍ରିୟାରେ ସହଯୋଗ କରିବା ଉଚିତ ବୋଲି ସେ କହିଥିଲେ।

---------------

ହିନ୍ଦୁସ୍ଥାନ ସମାଚାର / ସମନ୍ୱୟ