ସମ୍ବଲପୁର,୧୫ ଫେବୃଆରୀ(ହି.ସ.) – ଭାରତୀୟ ଶିଳ୍ପ ମହାସଂଘ(ସିଆଇଆଇ) ପକ୍ଷରୁ ସମ୍ବଲପୁର ଠାରେ ଆୟୋଜିତ କାର୍ଯ୍ୟକ୍ରମରେ ଏକାଧିକ ପରିବର୍ତନଶୀଳ ପଦକ୍ଷେପର ଶୁଭାରମ୍ଭ କରାଯାଇଛି ଯାହା ପଶ୍ଚିମ ଓଡ଼ିଶାରେ ଶିକ୍ଷା, ଦକ୍ଷତା, ଉଦ୍ୟୋଗିକତା ଓ ବଜାର-ପରିଚାଳିତ କୃଷି ବିକାଶକୁ ସୁଦୃଢ଼ କରିବାକୁ ଲକ୍ଷ୍ୟ ରଖିଛି। ଏହି ପଦକ୍ଷେପଗୁଡ଼ିକୁ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ହୀରାକୁଦ ସ୍ଥିତ ଇକୋ ରିଟ୍ରିଟ ରିସର୍ଟଠାରେ ଉଦ୍ଘାଟନ କରିଛନ୍ତି। କାର୍ଯ୍ୟକ୍ରମରେ ଉପସ୍ଥିତ ଶିଳ୍ପ ନେତୃବୃନ୍ଦ, ନୀତି ନିର୍ମାତା, ଉଦ୍ୟୋଗୀ ଓ ଯୁବପିଢ଼ିଙ୍କୁ ସମ୍ବୋଧିତ କରି ମନ୍ତ୍ରୀ ଶ୍ରୀ ପ୍ରଧାନ ବିକଶିତ ଓଡ଼ିଶା ଓ ବିକଶିତ ଭାରତ ଲକ୍ଷ୍ୟ ହାସଲ କରିବା କ୍ଷେତ୍ରରେ ଶିଳ୍ପ-ନେତୃତ୍ୱାଧୀନ ଦକ୍ଷତା ବିକାଶ ଓ ଉଦ୍ଭାବନର ମହତ୍ୱକୁ ଆଲୋକପାତ କରିଛନ୍ତି।
ଶ୍ରୀ ପ୍ରଧାନ ଗୁରୁତ୍ୱାରୋପ କରିଛନ୍ତି ଯେ, ଶିକ୍ଷା ଓ ସଶକ୍ତିକରଣ ମଧ୍ୟରେ ରହିଥିବା ସଂଯୋଗକୁ ସୁଦୃଢ଼ କରିବା ଦ୍ୱାରା ତାହା ପଶ୍ଚିମ ଓଡ଼ିଶାରେ ଯୁବପିଢ଼ିଙ୍କୁ ସଶକ୍ତ କରିବ ଏବଂ ଆଂଚଳିକ ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବ। “ଆମ ସରକାର ଟିୟର ୨ ଓ ଟିୟାର ୩ ସହରଗୁଡ଼ିକର ବିକାଶ ପାଇଁ ସ୍ୱତନ୍ତ୍ର ଧ୍ୟାନ ଦେଉଛନ୍ତି। ସମ୍ବଲପୁର ଏକାଧିକ ବିକାଶମୂଳକ ପଦକ୍ଷେପରୁ ବହୁମାତ୍ରାରେ ଉପକୃତ ହେବାକୁ ଯାଉଛି। ଏଥିସହିତ ସେ ରାଉରକେଲା-ରାଂଚି ରୋଡ୍ କରିଡରର ପୁନଃନିର୍ମାଣ ପ୍ରସ୍ତାବଗୁଡ଼ିକର ଘୋଷଣା କରିଥିଲେ ଏବଂ ଭବିଷ୍ୟତର ଶିଳ୍ପଗୁଡ଼ିକ ପାଇଁ ୧୦୦୦ ଏକରର ଶିଳ୍ପ ଜମି ପ୍ରସ୍ତୁତ କରିବା ପାଇଁ ଜିଲ୍ଲା ପ୍ରଶାସନ ସହ ଆଲୋଚନା କରିଥିଲେ। ଏହି କାର୍ଯ୍ୟକ୍ରମରେ ଶୁଭାରମ୍ଭ ହୋଇଥିବା ପ୍ରମୁଖ ପଦକ୍ଷେପଗୁଡ଼ିକରେ ସେଂଟ୍ରାଲ ଲାଇବ୍ରେରୀରେ ସିଆଇଆଇ ଏଜୁକେଶନ ଟୁ ଏମ୍ପେ୍ଲାୟମେଂଟ(ଇ୨ଇ) କ୍ୟାରିୟର ଲାଉଞ୍ଜ, ସିଆଇଆଇ ମଡେଲ କ୍ୟାରିୟର ସେଂଟର, ସିଆଇଆଇ ନ୍ୟାଶନାଲ କୌଶଳ କେନ୍ଦ୍ର, ସମ୍ବଲପୁର, ସିଆଇଆଇ ସିଇଏଲ ଓଡ଼ିଶା ଏଂଟରପ୍ରେନ୍ୟୋରସ ଡେଭ୍ଲପମେଂଟ ଫୋରମ ଏବଂ ଓଡ଼ିଶାରେ ସିଆଇଆଇ ସିଇଏଲ ମାଇକ୍ରୋ ଆଣ୍ଡ ସ୍ମଲ ଏଂଟରପ୍ରେନ୍ୟୋରସ ପ୍ରୋଜେକ୍ଟ ଆଦି ସାମିଲ ରହିଛି।
ଉଲ୍ଲେଖଯୋଗ୍ୟ ଯେ, ଏହି ଅବସରରେ ଫସଲ, ମତ୍ସ୍ୟଚାଷ ଓ ଦୁଗ୍ଧ ଜାତୀୟ ସାମଗ୍ରୀ ଜୀବିକା ପ୍ରଣାଳୀର ବଜାର-ନେତୃତ୍ୱାଧୀନ ପରିବର୍ତନ ପାଇଁ ସମ୍ବଲପୁର ଜିଲ୍ଲାପାଳଙ୍କ କାର୍ଯ୍ୟାଳୟ, ଓଡ଼ିଶା ୟୁନିଭର୍ସିଟି ଅଫ୍ ଆଗ୍ରିକଲ୍ଚର ଆଣ୍ଡ ଟେକ୍ନୋଲୋଜି(ଓୟୁଏଟି) ଏବଂ ସିଆଇଆଇ ଫୁଡ୍ ଆଣ୍ଡ ଆଗ୍ରିକଲ୍ଚର ସେଂଟର ଅଫ୍ ଏକ୍ସିଲେନ୍ସ(ଏଫ୍ଏସିଇ) ମଧ୍ୟରେ ଏକ ଏମ୍ଓୟୁ ସ୍ୱାକ୍ଷରିତ ହୋଇଛି।
ସିଆଇଆଇର ମହାନିର୍ଦ୍ଦେଶକ ଚନ୍ଦ୍ରଜିତ ବାନର୍ଜୀ ଆଂଚଳିକ ଶିଳ୍ପ ଇକୋସିଷ୍ଟମକୁ ମଜବୁତ କରିବା ପାଇଁ ଏମ୍ଏସ୍ଏମ୍ଇଗୁଡ଼ିକ ସହିତ ବୃହତ ଶିଳ୍ପଗୁଡ଼ିକୁ ସଂଯୋଗ କରିବାର ଆବଶ୍ୟକତା ରହିଛି ବୋଲି ଗୁରୁତ୍ୱାରୋପ କରିଥିଲେ। ସେ କହିଥିଲେ, “ବିକଶିତ ଭାରତର ଲକ୍ଷ୍ୟକୁ ହାସଲ କରିବା ପାଇଁ ଶିଳ୍ପକୁ ଶିକ୍ଷା, ସ୍ୱାସ୍ଥ୍ୟସେବା ଓ ଦକ୍ଷତା ବିକାଶ କ୍ଷେତ୍ରରେ ସକ୍ରିୟ ଭାବେ ଅଂଶଗ୍ରହଣ କରିବାକୁ ପଡ଼ିବ।” ଓଡ଼ିଶା-ଜାପାନ ସହଭାଗିତାକୁ ହାଇଲାଇଟ କରି ସେ ଉଲ୍ଲେଖ କରିଛନ୍ତି ଯେ, ଓଡ଼ିଶାରୁ ପ୍ରାୟ ୧୦୦୦ ଛାତ୍ରଛାତ୍ରୀ ଜାପାନରେ ନିଯୁକ୍ତି ହାସଲ କରିଛନ୍ତି ଏବଂ ସେ ରାଜ୍ୟ ଶିକ୍ଷା ବିଭାଗ ସହ ସହଯୋଗରେ ଏଭଳି ଆନ୍ତର୍ଜାତୀୟ ସୁଯୋଗଗୁଡ଼ିକୁ ବିସ୍ତାର କରିବା ପାଇଁ ଆହ୍ୱାନ କରିଛନ୍ତି।
ଏହାପୂର୍ବରୁ ସିଆଇଆଇ ୱେଷ୍ଟ ଓଡ଼ିଶା ଜୋନାଲ କାଉନ୍ସିଲର ଅଧ୍ୟକ୍ଷ ଏବଂ ଜେଏସ୍ଡବ୍ଲ୍ୟୁ ଷ୍ଟିଲ ଲିମିଟେଡର ଅଧ୍ୟକ୍ଷ ଓ ପୂର୍ଣ୍ଣକାଳୀନ ନିର୍ଦ୍ଦେଶକ ଅନୀଲ କୁମାର ସିଂହ କାର୍ଯ୍ୟକ୍ରମରେ ଉପସ୍ଥିତ ପ୍ରତିନିଧି ଓ ଅଂଶଗ୍ରହଣକାରୀଙ୍କୁ ସ୍ୱାଗତ କରିଥିଲେ। କାର୍ଯ୍ୟକ୍ରମ ସମୟରେ ୫୦ ଜଣ ହିତାଧିକାରୀଙ୍କୁ ନିଯୁକ୍ତିପତ୍ର ବିତରଣ କରାଯାଇଥିଲା। ସମ୍ବଲପୁର ବିଧାୟକ ଶ୍ରୀ ଜୟନାରାୟଣ ମିଶ୍ର ଏବଂ ଓଡ଼ିଶା ସରକାରଙ୍କ ପଂଚାୟତିରାଜ ଓ ପାନୀୟ ଜଳ ମନ୍ତ୍ରୀ ଶ୍ରୀ ରବି ନାରାୟଣ ନାୟକ ମଧ୍ୟ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ।
କାର୍ଯ୍ୟକ୍ରମଟି ସିଆଇଆଇର ମହାନିର୍ଦ୍ଦେଶକ ଚନ୍ଦ୍ରଜିତ ବାନର୍ଜୀଙ୍କ ଦ୍ୱାରା ପରିଚାଳିତ ଏକ ଯୋଗାଯୋଗ ଅଧିବେଶନ ସହ ଶେଷ ହୋଇଥିଲା, ଯେଉଁଠାରେ ସେ ସିଆଇଆଇ ସିଇଏଲ୍ ସମ୍ବଲପୁର ଏଂଟରପ୍ରେନ୍ୟୋରସ୍ ଡେଭ୍ଲପମେଂଟ ଫୋରମ ସହ ଜଡ଼ିତ କ୍ଷୁଦ୍ର ଉଦ୍ୟୋଗୀମାନଙ୍କ ସହ ଆଲୋଚନା କରିଥିଲେ।
ସମ୍ବଲପୁରସ୍ଥିତ ଡିଷ୍ଟ୍ରିକ୍ଟ ଏମ୍ପେ୍ଲାଏମେଂଟ ଏକ୍ସଚେଞ୍ଜ ଠାରେ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କ ଦ୍ୱାରା ସିଆଇଆଇ ମଡେଲ କ୍ୟାରିୟର ସେଂଟର, ସମ୍ବଲପୁରର ଔପଚାରିକ ଭାବେ ଶୁଭାରମ୍ଭ କରାଯାଇଥିଲା। ମୋଟ ୧୨୦ ଜଣ ପ୍ରାର୍ଥୀ ଭାରତବ୍ୟାପୀ ବିଭିନ୍ନ ନିଯୁକ୍ତି ସୁଯୋଗ ଅଧିନରେ ନିଯୁକ୍ତିପତ୍ର ଗ୍ରହଣ କରିଥିଲେ। ସେହିପରି ୧୭ ଜଣ ପ୍ରାର୍ଥୀଙ୍କୁ ଜାପାନରେ ଏବଂ ୫ ଜଣ ପ୍ରାର୍ଥୀଙ୍କୁ ଡେନ୍ମାର୍କରେ ଚାକିରି ପାଇଁ ଚୟନ କରାଯାଇଥିଲା।
.......................................
ହିନ୍ଦୁସ୍ଥାନ ସମାଚାର / ଶୈଳେଶ
