ଭୁବନ, ୧୩ ଅପ୍ରେଲ (ହି.ସ.)- ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଆନୁକୂଲ୍ୟରେ ଭୁବନ ପଞ୍ଚାୟତ ସମିତି ସହଯୋଗରେ ଆମ ରୁଚି ଆମ ଖାଦ୍ୟ ମେଳା ଅନୁଷ୍ଠିତ ହୋଇଯାଇଛି । ଓଡ଼ିଆ ପକ୍ଷ ପାଳନର ତ୍ରୟୋଦଶ ଦିବସ ଅବସରରେ ମିଶନ ଶକ୍ତି ଗୃହ ପରିସରରେ ଅନୁଷ୍ଠିତ ଆମ ରୁଚି ଆମ ଖାଦ୍ୟ ମେଳାକୁ ସିଡିପିଓ ଶ୍ରୀମତୀ ଭଗବତୀ ଗୁରୁ ଆନୁଷ୍ଠାନିକ ଭାବେ ଉଦଘାଟନ କରି ପାଶ୍ଚାତ୍ୟ ସଂସ୍କୃତି ଅନୁକରଣ ଯୋଗୁ ଗାଁ ଗହଳିରେ ଦିନକୁ ଦିନ ପିଠା ପଣା ପ୍ରସ୍ତୁତି କମି ଯାଉଛି । ଆଗାମୀ ପିଢ଼ି ପାଇଁ ଏହାକୁ ବଞ୍ଚାଇ ରଖିବାକୁ ଆମ ରୁଚି ଆମ ଖାଦ୍ୟ କାର୍ଯ୍ୟକ୍ରମ ଆୟୋଜନ ହୋଇଛି ବୋଲି ମତବ୍ୟକ୍ତ କରିଥିଲେ । ଏହି ଖାଦ୍ୟମେଳାରେ ଢେ଼ଙ୍କାନାଳର ପ୍ରସିଦ୍ଧ ବିରି ବରା ସାଙ୍ଗକୁ ଦହିବରା, ଆଳୁଦମ୍, ଆରିସା, କାକରା, ଏଣ୍ଡୁରି ପିଠା, ମୁଆଁ ଇତ୍ୟାଦି ସୁସ୍ୱାଦୁ ପିଠା ଓ ମିଠା ତିଆରି ହୋଇଥିଲା । ଏହି କାର୍ଯ୍ୟକ୍ରମରେ ବି ଏଲ ଏଫ୍ ସଭାନେତ୍ରୀ ବିଦ୍ୟୁତ ପ୍ରଭା ପାଣିଗ୍ରାହୀଙ୍କ ସମେତ ସୌଦାମିନୀ ବାହାଲିଆ, ନର୍ମଦା ମହାନ୍ତି, କଳ୍ପନା ନାୟକ, ସୁପ୍ରିତି ପଟ୍ଟନାୟକ, ସରସ୍ୱତୀ ମହାପାତ୍ର, ବି ଏସ ଏ ( ଇ ସି ) ଝିଲ୍ଲୀ ସାହୁ, ଜଳସାଥି ଏଲିନା ପରିଡ଼ା, ସ୍ଵଛସାଥି ଚାରୁଲତା ମହାନ୍ତି, ସ୍ୱଚ୍ଛ ସୁପରଭାଇଜର ଲିଲି ସାହୁ ପ୍ରମୁଖ ଅଂଶଗ୍ରହଣ କରିଥିଲେ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ