କୋଲକାତା, ୨୮ ମଇ (ହି.ସ.)- ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଶୋଚନୀୟ ପରାଜୟ ପରେ, ତୃଣମୂଳ କଂଗ୍ରେସ ମଧ୍ୟରେ ମତଭେଦ ଏବେ ଖୋଲାଖୋଲି ଭାବେ ସାମ୍ନାକୁ ଆସିଛି । ଦଳର ସାଂସଦ କାକୋଳି ଘୋଷ ଦସ୍ତିଦାର ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଚିଠି ଲେଖି ତୃଣମୂଳ ସାଂସଦ କଲ୍ୟାଣ ବାନାର୍ଜୀଙ୍କ ବିରୋଧରେ ମୌଖିକ ନିର୍ଯ୍ୟାତନା ଏବଂ ମହିଳା ବିରୋଧୀ ଆଚରଣ ଅଭିଯୋଗ ଆଣିଛନ୍ତି ।

ବାରାସାତ ସାଂସଦ କାକୋଳି ଘୋଷ ଦସ୍ତିଦାର ବୁଧବାର ଦିନ ଲୋକସଭା ବାଚସ୍ପତିଙ୍କୁ ଏକ ଚିଠିରେ କଲ୍ୟାଣ ବାନାର୍ଜୀଙ୍କ ବିରୋଧରେ ଆନୁଷ୍ଠାନିକ ଅଭିଯୋଗ ଦାଖଲ କରିବାକୁ ତାଙ୍କୁ ଅନୁମତି ଦେବାକୁ ଅନୁରୋଧ କରିଛନ୍ତି । ସେ ଅଭିଯୋଗ କରିଛନ୍ତି ଯେ, କଲ୍ୟାଣ ବାନାର୍ଜୀ ଲୋକସଭା ଭିତରେ ଅନେକ ଥର ତାଙ୍କୁ ମୌଖିକ ଭାବରେ ଦୁର୍ବ୍ୟବହାର କରିଥିଲେ ଏବଂ ମହିଳା ସାଂସଦଙ୍କ ପ୍ରତି ତାଙ୍କର ମନୋଭାବ ଅପମାନଜନକ ଏବଂ ମହିଳା ବିରୋଧୀ ଥିଲା । ତେବେ ଏହି ପ୍ରସଙ୍ଗରେ ଉଭୟ କାକୋଳି ଘୋଷ ଏବଂ କଲ୍ୟାଣ ବାନାର୍ଜୀଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲା, କିନ୍ତୁ ଉଭୟଙ୍କ ତରଫରୁ କୌଣସି ଆନୁଷ୍ଠାନିକ ପ୍ରତିକ୍ରିୟା ମିଳିନଥିଲା ।

ଏହି ବିବାଦ ଏପରି ଏକ ସମୟରେ ଆସିଛି ଯେତେବେଳେ କାକୋଳି ଘୋଷ ଦସ୍ତିଦାର ନିକଟରେ ତୃଣମୂଳ କଂଗ୍ରେସର ସମସ୍ତ ସାଂଗଠନିକ ପଦବୀରୁ ଇସ୍ତଫା ଦେଇଛନ୍ତି । ପୂର୍ବରୁ ସେ ବାରାସାତ ସାଂଗଠନିକ ଜିଲ୍ଲା ସଭାପତି ପଦରୁ ମଧ୍ୟ ଇସ୍ତଫା ଦେଇଥିଲେ । ତାଙ୍କ ଇସ୍ତଫା ସମୟରେ, ସେ ନାମ ନ ନେଇ ନିର୍ବାଚନ ରଣନୀତିଜ୍ଞ ସଂସ୍ଥା ଆଇ-ପିଏସି ଉପରେ ମଧ୍ୟ ଆକ୍ରମଣ କରିଥିଲେ ଏବଂ ଦଳ ମଧ୍ୟରେ ଅସନ୍ତୋଷର ସଂକେତ ଦେଇଥିଲେ ।

ତାଙ୍କ ଇସ୍ତଫା ପତ୍ରରେ ମଧ୍ୟ କାକୋଳି ପରୋକ୍ଷରେ କଲ୍ୟାଣ ବାନାର୍ଜୀଙ୍କୁ ଟାର୍ଗେଟ୍ କରିଥିଲେ । ସେ ଲେଖିଛନ୍ତି ଯେ, ଯେଉଁ ପଦରେ ରହି ମହିଳା ସାଂସଦଙ୍କ ପ୍ରତି ଅଭଦ୍ର ବ୍ୟବହାର ବନ୍ଦ କରିବା ସମ୍ଭବ ନୁହେଁ ଏବଂ ଶୀର୍ଷ ନେତୃତ୍ୱରୁ କୌଣସି ସହଯୋଗ କିମ୍ବା ସହାନୁଭୂତି ନାହିଁ, ଏପରି ପଦବୀରେ ରହିବାର କୌଣସି ଯଥାର୍ଥତା ନାହିଁ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ