ସମ୍ବଲପୁର, ୨୬, ଜୁନ୍ (ହି.ସ.)ସମ୍ବଲପୁର ଜିଲ୍ଲା ଜମନକିରା ବ୍ଲକ ବଡ଼ମାଳ ପଞ୍ଚାୟତରେ ଲଗାତାର ବିଦ୍ୟୁତ ବିଭ୍ରାଟ, ବିନା ସୁଚନାରେ ବିଦ୍ଯୁତ କାଟ୍ ଓ ଲାଇନମେନଙ୍କ ଖାମଖିଆଲି ନୀତିକୁ ନେଇ ତୀବ୍ର ଜନ ଅସନ୍ତୋଷ ପ୍ରକାଶ ପାଇଛି । ଦୀର୍ଘ ଦିନ ଧରି ଲାଇନମେନଙ୍କ ଆଚରଣରେ ଅତିଷ୍ଠ ପଞ୍ଚାୟତର ବିଭିନ୍ନ ଗ୍ରାମର ଲୋକେ ଜମନକିରା ବିଦ୍ୟୁତ ବିଭାଗ ଅଧିକାରୀଙ୍କୁ ନପାଇ ଭୋଜପୁର ଗ୍ରୀଡ଼ ଲାଇନମେନ ଅସିତ ପଟେଲଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି l

ପଞ୍ଚାୟତ ବାସୀଙ୍କ ଅଭିଯୋଗ ଅନୁସାରେ ଟାଟା ପାୱାର ବିଦ୍ୟୁତ୍ ଦାୟିତ୍ୱ ନେବା ପରଠାରୁ ବିଭିନ୍ନ ସମୟରେ ଅଘୋଷିତ ବିଦ୍ୟୁତ କାଟ୍ ଓ ବିଦ୍ୟୁତ୍ ବିଭ୍ରାଟ ପଞ୍ଚାୟତ ବାସୀଙ୍କୁ ଅତିଷ୍ଠ କରାଇଛି । ଏହା ସ୍ଵତ୍ବେ ବିଦ୍ୟୁତ ଉପଭୋକ୍ତା ମାନେ ନିୟମିତ ଭାବେ ନିଜର ବିଦ୍ୟୁତ୍ ଦେୟ ପଇଠ କରି ଆସୁଛନ୍ତି । ନିୟମିତ ବିଦ୍ୟୁତ୍ ଦେୟ ଦିଆ ଯାଉଥିଲେ ମଧ୍ୟ ଉପଭୋକ୍ତାଙ୍କୁ ଟାଟା ପାୱାର ଉପଯୁକ୍ତ ବିଦ୍ୟୁତ ସେବା ଯୋଗାଇବାରେ ବିଫଳ ରହିଆସୁଛି । ପ୍ରତି ମାସରେ ୨ ରୁ ୩ ଥର ମେଣ୍ଟେନେନ୍ସ ଆଳରେ ଦିନ ତମାମ ବିଦ୍ୟୁତ୍ ସରାବରହ ଠପ୍ ରହୁଥିବା ବେଳେ, ପ୍ରତ୍ୟେକ ଦିନ ସକାଳେ ଓ ସନ୍ଧ୍ୟାରେ ୨ ଘଣ୍ଟା ଲେଖାଏଁ ଅଘୋଷିତ ବିଦ୍ୟୁତ କାଟ୍ ଅଞ୍ଚଳବାସୀଙ୍କ ପାଇଁ ଅତ୍ୟନ୍ତ ଯନ୍ତ୍ରଣା ଦାୟକ ହୋଇ ଉଠିଛି । ଏପରିକି କୌଣସି ସରକାରୀ ବେସରକାରୀ କାର୍ଯ୍ୟକ୍ରମ ସମ୍ପର୍କରେ ବିଦ୍ୟୁତ୍ ବିଭାଗ କାର୍ଯ୍ୟାଳୟରେ ପୂର୍ବ ସୂଚନା ଦେଲେ ମଧ୍ଯ ଏହି ଅଘୋଷିତ ବିଦ୍ୟୁତ୍ କାଟ୍ ବନ୍ଦ୍ ହେବାର ନାଁ ନେଉନାହିଁ ।

ଏହିଭଳି ଅସୁବିଧାକୁ ନେଇ ଆଜି ବଡ଼ମାଳ ପଞ୍ଚାୟତର ବିଭିନ୍ନ ଗ୍ରାମର ଲୋକେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । କୃଷ୍ଣଚନ୍ଦ୍ର ବାଘ ନାମକ ଜନୈକ ଯୁବକ କୁହନ୍ତି ଆମ ପଞ୍ଚାୟତର କେତେକ ଗ୍ରାମରେ ଲଗାତାର ତିନି ଦିନ ଧରି ବିଦ୍ୟୁତ ସରବରାହ ଠପ୍ ହୋଇଯାଇଛି । ସମସ୍ଯା କେବଳ ଏତିକିରେ ଶେଷ ହେଉନି, ସାମାନ୍ୟ ବର୍ଷା ବା ଘଡଘଡି ମାରିବା ମାତ୍ରେ ବିଦ୍ୟୁତ୍ କାଟ୍ ଏକ ପ୍ରହସନରେ ପରିଣତ ହୋଇଛି । ଏହିପରି ଅବ୍ଯବସ୍ଥା ଥରେ ଅଧେ ନୁହେଁ ଅବାରିତ ଭାବେ ଲାଗି ରହୁଥିବା ବେଳେ

ଲାଇନମେନ ରୋହନ ପଟେଲଙ୍କୁ ଜଣାଇଲେ ମଧ୍ୟ ସେ କୌଣସି ପଦକ୍ଷେପ ନେଉନାହାନ୍ତି । ଏପରିକି ବିଦ୍ୟୁତ ସମସ୍ୟା ନେଇ କାର୍ଯ୍ୟାଳୟକୁ ଫୋନ୍ କଲେ କେହି ନଉଠାଇବା, ଉଠାଇଲେ ବାବୁ ନାହାଁନ୍ତି ଓ କେହି କର୍ମଚାରୀ ନାହାଁନ୍ତି କହି ଫୋନ୍ କାଟିଦେବା ଘଟଣା ଲୋକଙ୍କ ସହିବାର ଧୈର୍ଯ୍ୟ ଶକ୍ତିକୁ ଧ୍ବସ୍ତବିଧ୍ବସ୍ତ କରିଦେଇଛି ।

ସେହିପରି ମୁକ୍ତେଶ୍ଵର ମାଝୀ କୁହନ୍ତି ଆମେ ଅଭିଯୋଗ କରିବା ପାଇଁ ସମସ୍ତ ଗ୍ରାମବାସୀ ୨ ଘଣ୍ଟା ଧରି ଅପେକ୍ଷା କରିଥିଲେ ଏଠାରେ କୌଣସି ଅଧିକାରୀ ବା କର୍ମଚାରୀ ଆମ ଦାବିପତ୍ର ନେବାପାଇଁ ଆଗ୍ରହ ପ୍ରକାଶ ନକରିବା ଅତ୍ୟନ୍ତ ଦୁର୍ଭାଗ୍ୟଜନକ । କୁଚିଣ୍ଡା ବିଦ୍ୟୁତ୍ ବିଭାଗ ଏସଡିଓଙ୍କୁ ଫୋନ୍ କଲେ ସେ ଫୋନ୍ ଉଠାଉ ନାହାଁନ୍ତି , ଜମନକିରା ବିଦ୍ୟୁତ ବିଭାଗ ଅଧିକାରୀଙ୍କୁ ଫୋନ୍ କଲେ 'ଆଜି ଛୁଟି ମୁଁ ଯିବି ନାହିଁ'ର ଚିରାଚରିତ ଢଙ୍ଗରେ ସଫେଇ ଦେବା ଏବେ ସମଗ୍ର ଅଞ୍ଚଳରେ ଉତ୍ତେଜନା ସୃଷ୍ଟି କରାଇଛି । ସଠିକ୍ ସମୟରେ ବିଦ୍ୟୁତ୍ ଦେୟ ଦେଉଥିଲେ ମଧ୍ୟ ଏଭଳି ଦାୟିତ୍ବହୀନ ବିଦ୍ୟୁତ୍ ସେବାକୁ ନେଇ ଲୋକେ ନିଜର ଧୈର୍ଯ୍ୟ ହରାଇବା ସ୍ଥିତିରେ ପହଞ୍ଚିଲେଣି । ତେଣୁ ତୁରନ୍ତ ଲୋକଙ୍କ ସମସ୍ୟାର ସମାଧାନ ନହେଲେ ଆଗାମୀ ଦିନରେ ବଡ଼ ଧରଣର ଆନ୍ଦୋଳନ ମୁଣ୍ଡ ଟେକିପାରେ ବୋଲି ଆଶଙ୍କା ପ୍ରକାଶ ପାଇଛି ।

---------------

ହିନ୍ଦୁସ୍ଥାନ ସମାଚାର / ଶୈଳେଶ