ନୂଆଦିଲ୍ଲୀ, ୨୧ ଜୁଲାଇ (ହି.ସ.)- ପ୍ରଧାନମନ୍ତ୍ରୀ ଆବାସ ନିକଟରେ ନୀଟ୍ ପ୍ରଶ୍ନପତ୍ର ଲିକ୍ ମାମଲାରେ ଛାତ୍ରମାନଙ୍କ ଉପରେ ପୋଲିସ କାର୍ଯ୍ୟାନୁଷ୍ଠାନର ବିରୋଧରେ ରାହୁଲ ଗାନ୍ଧୀଙ୍କ ନେତୃତ୍ୱରେ ପ୍ରଦର୍ଶନ କରୁଥିବା କଂଗ୍ରେସ ନେତାମାନଙ୍କୁ ଦିଲ୍ଲୀ ପୋଲିସ ଅଟକ ରଖିଛି। ପ୍ରଦର୍ଶନରେ ରାହୁଲ ଗାନ୍ଧୀଙ୍କ ସହ ପ୍ରିୟଙ୍କା ୱାଡ୍ରାଙ୍କ ସମେତ ଅନେକ କଂଗ୍ରେସ ସାଂସଦ, କେରଳର ମୁଖ୍ୟମନ୍ତ୍ରୀ ଭିଡି ସତୀଶନ ଏବଂ କର୍ଣ୍ଣାଟକର ମୁଖ୍ୟମନ୍ତ୍ରୀ ଡିକେ ଶିବକୁମାର ସାମିଲ ଥିଲେ। ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ମଧ୍ୟ ପରେ ପ୍ରଦର୍ଶନ ସ୍ଥଳରେ ପହଂଚିଥିଲେ।
କଂଗ୍ରେସ ନେତାମାନେ ଛାତ୍ରମାନଙ୍କ ବିରୋଧରେ ପୋଲିସ ବଳ ପ୍ରୟୋଗର ବିରୋଧରେ ପ୍ରଧାନମନ୍ତ୍ରୀ ଆବାସ ଦିଗକୁ ମାର୍ଚ୍ଚ କରୁଥିଲେ। ଏହି ସମୟରେ ପୋଲିସ ପ୍ରଦର୍ଶନକାରୀମାନଙ୍କୁ ପ୍ରଧାନମନ୍ତ୍ରୀ ଆବାସରୁ କିଛି ଦୂର ପୂର୍ବରୁ ଅଟକାଇ ଦେଇଥିଲା। ଏହା ପରେ କଂଗ୍ରେସ ନେତାମାନେ ଧାରଣାରେ ବସିଥିଲେ। ସେଠାରେ ପୋଲିସ ଏହି ନେତାମାନଙ୍କୁ ହାଜତକୁ ନେଇଥିଲା। ପୋଲିସ ବସରେ ବସାଇ ଏହି ନେତାମାନଙ୍କୁ ଥାନାକୁ ନିଆଯାଇଥିଲା।
ଏହା ପୂର୍ବରୁ ରାହୁଲ ଗାନ୍ଧୀ ଲୋକମାନଙ୍କୁ ପ୍ରଧାନମନ୍ତ୍ରୀ ଆବାସରେ ଧାରଣାରେ ସାମିଲ ହେବାକୁ ଅନୁରୋଧ କରି ଏକ୍ସରେ ଲେଖିଥିଲେ ଯେ ଛାତ୍ରମାନଙ୍କ ଉପରେ ଆକ୍ରମଣ ପ୍ରତ୍ୟେକ ଭାରତୀୟ ପରିବାର ଉପରେ ଆକ୍ରମଣ ଏବଂ ପ୍ରଧାନମନ୍ତ୍ରୀ ମୋଦୀଙ୍କୁ ଉତର ଦେବାକୁ ପଡିବ।
ଧାରଣା ସମୟରେ କେନ୍ଦ୍ରୀୟ ମନ୍ତ୍ରୀ ଡଃ ଜିତେନ୍ଦ୍ର ସିଂହ ଏବଂ କେନ୍ଦ୍ରୀୟ ଗୃହ ସଚିବ ଗୋବିନ୍ଦ ମୋହନ ପ୍ରଦର୍ଶନ ସ୍ଥଳକୁ ପହଂଚି ରାହୁଲ ଗାନ୍ଧୀଙ୍କ ସହ କଥାବାର୍ତା କରିଥିଲେ। କଂଗ୍ରେସ ନେତାମାନେ ପ୍ରଧାନମନ୍ତ୍ରୀ, ଗୃହ ମନ୍ତ୍ରୀ ଏବଂ ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରିଥିଲେ। ପ୍ରଦର୍ଶନ ସମୟରେ ପୋଲିସ ଅନେକ କଂଗ୍ରେସ କର୍ମୀଙ୍କୁ ମଧ୍ୟ ହିରାସତରେ ନେଇଥିଲା।
---------------
---------------
ହିନ୍ଦୁସ୍ଥାନ ସମାଚାର / ଗଗନ