ନୂଆଦିଲ୍ଲୀ, ୨୪ ଜୁଲାଇ (ହି.ସ.)- ସୁପ୍ରିମ କୋର୍ଟ ୨୦ ଜୁଲାଇରେ ସଂସଦ ମାର୍ଚ୍ଚ ସମୟରେ ଘଟିଥିବା କଥିତ ପୁଲିସ ଅତ୍ୟାଚାର ବିରୋଧରେ ଦାଖଲ ହୋଇଥିବା ଆବେଦନର ଶୁଣାଣି କରିବାକୁ ସମ୍ମତ ହୋଇଛନ୍ତି। ଆଜି ସକାଳେ ମୁଖ୍ୟ ବିଚାରପତି ଏହି କଥାକୁ ଖଣ୍ଡନ କରିଥିଲେ ଯେ ସେ ଜନ୍ତର-ମନ୍ତରରେ ପ୍ରଦର୍ଶନ ସମୟରେ ପୁଲିସ ଅତ୍ୟାଚାରକୁ ନେଇ ଦାଖଲ ହୋଇଥିବା ଆବେଦନର ଶୁଣାଣି କରିବାକୁ ମନା କରିଦେଇଥିଲେ।

ଆଜି ଏହି ମାମଲାକୁ ମୁଖ୍ୟ ବିଚାରପତିଙ୍କ ଅଧ୍ୟକ୍ଷତାରେ ଗଠିତ ବେଂଚ ସମ୍ମୁଖରେ ଉଲ୍ଲେଖ କରି ବରିଷ୍ଠ ଆଇନଜୀବୀ ଗୋପାଳ ଶଙ୍କର ନାରାୟଣନ କହିଥିଲେ ଯେ ଆବେଦନ ଦାଖଲ ହୋଇସାରିଛି ଏବଂ ଏହି ମାମଲାରେ ଡାୟାରୀ ନମ୍ବର ମଧ୍ୟ ମିଳିଯାଇଛି। ତା’ପରେ କୋର୍ଟ ଏହି ମାମଲାରେ ୨୭ ଜୁଲାଇରେ ଶୁଣାଣି କରିବାକୁ ଆଦେଶ ଦେଇଥିଲେ।

ଉଲ୍ଲେଖଯୋଗ୍ୟ ଯେ କକରୋଚ ଜନତା ପାର୍ଟି ପକ୍ଷରୁ ପେପର ଲିକ୍ ମାମଲାରେ କେନ୍ଦ୍ରୀୟ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିରେ ଜନ୍ତର-ମନ୍ତରରେ ୨୦ ଜୁନ୍ରୁ ପ୍ରଦର୍ଶନ ଚାଲିଛି। ଏହି ପ୍ରଦର୍ଶନରେ ସୋନମ ୱାଙ୍ଗଚୁକ ୨୮ ଜୁନ୍ରୁ ଆମରଣ ଅନଶନ ଆରମ୍ଭ କରିଥିଲେ। ପ୍ରାୟ ୨୦ ଦିନର ଅନଶନ ପରେ ତାଙ୍କୁ ଜନ୍ତର-ମନ୍ତରରୁ ଉଠାଇ ସଫଦରଜଙ୍ଗ ହସ୍ପିଟାଲକୁ ନିଆଯାଇଥିଲା।

ପ୍ରଦର୍ଶନକାରୀମାନେ ୨୦ ଜୁଲାଇରେ ସଂସଦ ମାର୍ଚ୍ଚ କରିଥିଲେ, ଯାହା ସମୟରେ ରାଜଧାନୀ ଦିଲ୍ଲୀର ଅନେକ ସ୍ଥାନରେ ପ୍ରଦର୍ଶନକାରୀ ଓ ଦିଲ୍ଲୀ ପୁଲିସ ମଧ୍ୟରେ ହିଂସାତ୍ମକ ସଂଘର୍ଷ ଘଟିଥିଲା।

ଆବେଦନରେ କୁହାଯାଇଛି ଯେ ପ୍ରଦର୍ଶନ ସମୟରେ ପୁଲିସ ବିଭିନ୍ନ ସ୍ଥାନରେ ପ୍ରଦର୍ଶନକାରୀମାନଙ୍କ ଉପରେ ଅତ୍ୟାଚାର କରିଥିଲା। ଦିଲ୍ଲୀ ପୁଲିସ ଅନେକ ସ୍ଥାନରେ ଛାତ୍ରମାନଙ୍କ ଉପରେ ଲାଠିଚାର୍ଜ କରିଥିଲା ଏବଂ ଲୁହ ବୁହା ଗ୍ୟାସ ପ୍ରୟୋଗ କରିଥିଲା। ଏହି ମାମଲାରେ କନ୍ନାଟ ପ୍ଲେସ ଥାନା, ସଂସଦ ମାର୍ଗ ଥାନା ଏବଂ ଅନ୍ୟାନ୍ୟ ଥାନାରେ ଏଫଆଇଆର ରୁଜୁ କରାଯାଇଛି।

--------------------------

---------------

ହିନ୍ଦୁସ୍ଥାନ ସମାଚାର / ଗଗନ