ପାଟନା, ୨୫ ଜୁଲାଇ (ହି.ସ.)- ଜାତୀୟ ଯୋଗ୍ୟତା ତଥା ପ୍ରବେଶିକା ପରୀକ୍ଷା (ଏନ୍. ଇ. ଇ. ଟି.) ର ପ୍ରଶ୍ନପତ୍ର ଲିକ୍ ଏବଂ ପ୍ରତିବାଦକାରୀ ଛାତ୍ରଛାତ୍ରୀଙ୍କ ଉପରେ ନିକଟରେ ହୋଇଥିବା ଲାଠିଚାର୍ଜକୁ ବିରୋଧ କରି ଶନିବାର ଦିନ ଅଖିଳ ଭାରତୀୟ ଛାତ୍ର ସଂଘ (ଆଇସା) ଏବଂ ଜାତୀୟ ଯୁବ ଆନ୍ଦୋଳନ ଦ୍ୱାରା ଡକାଯାଇଥିବା 'ବିହାର ବନ୍ଦ' ରାଜ୍ୟର ବିଭିନ୍ନ ଭାଗରେ ଆଂଶିକ ପ୍ରଭାବ ପକାଇଥିଲା । ମୁଖ୍ୟ ବିରୋଧୀ ଦଳ ରାଷ୍ଟ୍ରୀୟ ଜନତା ଦଳ (ଆର. ଜେ. ଡି.) ଏବଂ କଂଗ୍ରେସ ଦ୍ୱାରା ସମର୍ଥିତ ଏହି ବନ୍ଦ ରେ ଅନେକ ଜିଲ୍ଲାରେ ଛାତ୍ର ସଂଗଠନ ଏବଂ ବିରୋଧୀ ଦଳର କାର୍ଯ୍ୟକର୍ତାମାନେ ସକାଳଠାରୁ ରାଜରାସ୍ତାକୁ ଓହ୍ଲାଇଥିବାର ଦେଖିବାକୁ ମିଳିଥିଲା । ଅନେକ ସ୍ଥାନରେ ସଡ଼କ ଓ ରେଳ ଚଳାଚଳ ବାଧାପ୍ରାପ୍ତ କରିବାକୁ ଉଦ୍ୟମ କରାଯାଇଥିବା ବେଳେ ପ୍ରଶାସନ ଆଇନ ଶୃଙ୍ଖଳା ବଜାୟ ରଖିବା ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା କରିଥିଲା ।

ବନ୍ଦକୁ ଦୃଷ୍ଟିରେ ରଖି ବିହାରରେ ୭୦ ହଜାରରୁ ଅଧିକ ପୋଲିସ କର୍ମଚାରୀ ନିୟୋଜିତ ହୋଇଛନ୍ତି । ସମ୍ବେଦନଶୀଳ ଜିଲ୍ଲାଗୁଡ଼ିକରେ ଅତିରିକ୍ତ ସୁରକ୍ଷା ବାହିନୀ ନିୟୋଜିତ ହୋଇଥିବା ବେଳେ ଅନେକ ସ୍ଥାନରେ ସତର୍କତାମୂଳକ ପଦକ୍ଷେପ ସ୍ୱରୂପ ମୋବାଇଲ୍ ଇଂଟରନେଟ୍ ସେବାକୁ ଦୁଇ ଦିନ ପାଇଁ ସ୍ଥଗିତ ରଖାଯାଇଛି । କୌଣସି ଅପ୍ରିତିକର ଘଟଣାକୁ ଏଡାଇବା ପାଇଁ କେତେକ ଜିଲ୍ଲାରେ ସ୍କୁଲ ଓ କଲେଜ ମଧ୍ୟ ବନ୍ଦ କରିଦିଆଯାଇଛି । ରାଜ୍ୟ ସରକାର ଏବଂ ଜିଲ୍ଲା ପ୍ରଶାସନ ସ୍ଥିତି ଉପରେ ନିରନ୍ତର ନଜର ରଖିଛନ୍ତି ।

ରାଜଧାନୀ ପାଟନାରେ, ବନ୍ଦ ସମୟରେ ସର୍ବାଧିକ ଗତିବିଧି ଡାକ ବଙ୍ଗଳା ଛକ ଏବଂ ଆଖପାଖ ଅଂଚଳରେ ଦେଖିବାକୁ ମିଳିଥିଲା । ବହୁ ସଂଖ୍ୟକ ଛାତ୍ର ଏବଂ ଯୁବ ବିକ୍ଷୋଭକାରୀ ଏଠାରେ ଏକାଠି ହୋଇଥିଲେ, ରାସ୍ତା ଅବରୋଧ କରିଥିଲେ ଏବଂ ସରକାର ବିରୋଧରେ ସ୍ଲୋଗାନ ଦେଇଥିଲେ । ଏନ୍. ଇ. ଇ. ଟି. ପରୀକ୍ଷାରେ ହୋଇଥିବା ଅନିୟମିତତା ଏବଂ ଛାତ୍ରଛାତ୍ରୀଙ୍କ ଉପରେ ପୋଲିସ କାର୍ଯ୍ୟାନୁଷ୍ଠାନ ବିରୋଧରେ ବିକ୍ଷୋଭକାରୀମାନେ ବିକ୍ଷୋଭ ପ୍ରଦର୍ଶନ କରିଥିଲେ, ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଏବଂ ପରୀକ୍ଷା ବ୍ୟବସ୍ଥାରେ ସ୍ୱଚ୍ଛତା ସୁନିଶ୍ଚିତ କରିବାକୁ ଦାବି କରିଥିଲେ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ