ଇସଲାମାବାଦ, ୨୧ ଅଗଷ୍ଟ (ହି.ସ.)- ସଂଘୀୟ ସରକାରଙ୍କ ସୂଚନାମନ୍ତ୍ରୀ ଅତାଉଲ୍ଲାହ ତରାର ଶୁକ୍ରବାର କହିଛନ୍ତି ଯେ ସର୍ବୋଚ୍ଚ ନ୍ୟାୟାଳୟ (ସୁପ୍ରିମ କୋର୍ଟ)ଙ୍କ ଆଦେଶ ପାଳନ କରି ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ୨୧ ଅଗଷ୍ଟ ସକାଳେ ସ୍ୱାସ୍ଥ୍ୟ ପରୀକ୍ଷା (ମେଡିକାଲ ଟେଷ୍ଟ) ପାଇଁ ହସ୍ପିଟାଲ ନିଆଯାଇଥିଲା ଏବଂ ପରେ ସେଠାରୁ ପୁଣି ରାୱଲପିଣ୍ଡି ସେଂଟ୍ରାଲ ଜେଲ (ଆଦିଆଲା ଜେଲ) ପଠାଯାଇଥିଲା।

ତରାର ଏକ୍ସରେ ଜାରି ବିବୃତିରେ କହିଛନ୍ତି ଯେ ଇମ୍ରାନଙ୍କୁ ୨୦ ଏବଂ ୨୧ ଅଗଷ୍ଟର ରାତିରେ ଉପଯୁକ୍ତ ସୁରକ୍ଷା ବ୍ୟବସ୍ଥା' ସହିତ ହସ୍ପିଟାଲ ନିଆଯାଇଥିଲା। ସେଠାରେ ଦକ୍ଷ ଡାକ୍ତରମାନଙ୍କ ଏକ ଟିମ୍ ବିସ୍ତୃତ ଯାଂଚ କରିଥିଲେ। ଟିମ୍ ଇମ୍ରାନଙ୍କୁ ମେଡିକାଲ ଯାଂଚରେ ଫିଟ୍ ଘୋଷଣା କରିଛି। ତରାର ଦାବି କରିଛନ୍ତି ଯେ ମେଡିକାଲ ଯାଂଚ ପ୍ରକ୍ରିୟା ସମୟରେ ଇମ୍ରାନଙ୍କ ଭଉଣୀ ଉଜମା ଖାନ ଉପସ୍ଥିତ ଥିଲେ। ସେ କହିଛନ୍ତି, ପ୍ରକ୍ରିୟା ସମ୍ପୂର୍ଣ୍ଣ ହେବା ପରେ ସକାଳ ପ୍ରାୟ ୫ଟାରେ ଇମ୍ରାନଙ୍କୁ ପୁଣି ଆଦିଆଲା ଜେଲ ନିଆଯାଇଥିଲା।

ତରାର ଦ୍ୱିତୀୟ ପୋଷ୍ଟରେ କହିଛନ୍ତି ଯେ ଇମ୍ରାନଙ୍କ ସ୍ୱାସ୍ଥ୍ୟର ଯାଂଚ ପାକିସ୍ତାନ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍େସସ (ପିମ୍ସ)ରେ କରାଯାଇଥିଲା। ଏହି ପ୍ରକ୍ରିୟାରେ ଶିଫା ଇଂଟରନ୍ୟାସନାଲ ହସ୍ପିଟାଲର ଡାକ୍ତରମାନେ ମଧ୍ୟ ଉପସ୍ଥିତ ଥିଲେ। ସେ କହିଛନ୍ତି ଯେ ଶିଫା ଇଂଟରନ୍ୟାସନାଲ ହସ୍ପିଟାଲ ରାସ୍ତାରେ ଏବଂ ହସ୍ପିଟାଲ ବାହାରେ ପିଟିଆଇ କର୍ମୀମାନଙ୍କ ଉପସ୍ଥିତି ଏବଂ ସୁରକ୍ଷା ପରିସ୍ଥିତି କାରଣରୁ ଇମ୍ରାନଙ୍କୁ ପିମ୍ସ ନିଆଯାଇଥିଲା।

ଦ ନ୍ୟୁଜ ଇଂଟରନ୍ୟାସନାଲର ରିପୋର୍ଟ ଅନୁଯାୟୀ, ତରାରଙ୍କ ଏହି ବିବୃତି ମିଡିଆ ରିପୋର୍ଟଗୁଡ଼ିକର କିଛି ଘଂଟା ପରେ ଆସିଛି, ଯେଉଁଥିରେ କୁହାଯାଇଥିଲା ଯେ ଶୁକ୍ରବାର ସକାଳେ ଇସଲାମାବାଦର ଶିଫା ଇଂଟରନ୍ୟାସନାଲ ହସ୍ପିଟାଲରେ ଇମ୍ରାନଙ୍କ ମେଡିକାଲ ଯାଂଚ ହୋଇଥିଲା। ଇମ୍ରାନଙ୍କୁ କଡ଼ା ସୁରକ୍ଷା ମଧ୍ୟରେ ଆଦିଆଲା ଜେଲର ଗେଟ ନମ୍ବର ୧ରୁ ଇସଲାମାବାଦର ହସ୍ପିଟାଲ ନିଆଯାଇଥିଲା।

------------------

---------------

ହିନ୍ଦୁସ୍ଥାନ ସମାଚାର / ଗଗନ