ଭୁବନେଶ୍ୱର, ୩୦ ଅକ୍ଟୋବର (ହି.ସ)- ଆସନ୍ତାକାଲି ଲୌହମାନବ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ୧୫୦ତମ ଜନ୍ମବାର୍ଷିକୀ ଅବସରରେ ଆୟୋଜିତ 'ଏକତା ଦୌଡ଼'ରେ ଯୋଗ ଦେଇ 'ଏକ ଭାରତ ଶ୍ରେଷ୍ଠ ଭାରତ'ର ଭାବନାକୁ ସୁଦୃଢ଼ କରିବାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆହ୍ୱାନ ଦେଇଛନ୍ତି।

ସୋସିଆଲ ସାଇଟ୍ ଏକ୍ସରେ ମୁଖ୍ୟମନ୍ତ୍ରୀ ଲେଖିଛନ୍ତି ଭାରତର ଜାତୀୟ ଜୀବନର ମୂଳରେ ଥିବା ବିବିଧତା ହିଁ ଏ ଦେଶର ପ୍ରକୃତ ଆତ୍ମା। ଭାଷା, ସଂସ୍କୃତି, ଧର୍ମ ଓ ପରମ୍ପରାର ଏହି ବିଶାଳ ସମାହାରକୁ ଏକ ଅଖଣ୍ଡ ସୂତ୍ରରେ ବାନ୍ଧିବାର ଅସାଧାରଣ କାର୍ଯ୍ୟ କରିଥିଲେ ଲୌହମାନବ ସର୍ଦ୍ଦାର ବଲ୍ଲଭଭାଇ ପଟେଲ। ସ୍ୱାଧୀନତା ପରେ ଅର୍ଦ୍ଧସହସ୍ରାଧିକ ରାଜ୍ୟ ବା ପ୍ରଦେଶକୁ ଏକତ୍ରିତ କରି ଆଧୁନିକ ଭାରତର ନିର୍ମାଣ କରିବା ତାଙ୍କର ଦୂରଦର୍ଶୀ ନେତୃତ୍ୱର ପରିଚୟ ।

ଆଜି, ଯଶସ୍ୱୀ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ସେହି ଏକତାର ଦୃଷ୍ଟିକୋଣକୁ ସକ୍ରିୟ ଭାବରେ ଆଗକୁ ବଢ଼ାଉଛନ୍ତି। ଆସନ୍ତାକାଲି ରାଷ୍ଟ୍ରୀୟ ଏକତା ଦିବସ ଅବସରରେ, ସର୍ଦ୍ଦାର ପଟେଲଙ୍କ ୧୫୦ତମ ଜୟନ୍ତୀ ପାଳନ କରିବା କେବଳ ଏକ କାର୍ଯ୍ୟକ୍ରମ ମାତ୍ର ନୁହେଁ, ବରଂ ଏହା ଜାତୀୟ ସଂକଳ୍ପର ଏକ ପୁନରାବୃତ୍ତି।

ଏହି ଅବସରରେ, 'ଏକତା ଦୌଡ଼' (ରନ୍ ଫର ୟୁନିଟି) ଭଳି କାର୍ଯ୍ୟକ୍ରମଗୁଡ଼ିକ ସମଗ୍ର ଦେଶର ଜନସାଧାରଣଙ୍କୁ ଏକାଠି କରିଥାଏ, ଯାହା ଦେଶର ଅଖଣ୍ଡତା ପ୍ରତି ଜନସାଧାରଣଙ୍କ ପ୍ରତିଶ୍ରୁତିକୁ ପ୍ରଦର୍ଶନ କରେ। ଆସନ୍ତୁ ସର୍ଦ୍ଦାର ପଟେଲଙ୍କ ୧୫୦ତମ ଜନ୍ମବାର୍ଷିକୀ ଅବସରରେ 'ଏକତା ଦୌଡ଼'ରେ ଯୋଗ ଦେଇ 'ଏକ ଭାରତ ଶ୍ରେଷ୍ଠ ଭାରତ'ର ଭାବନାକୁ ସୁଦୃଢ଼ କରିବା।

---------------

ହିନ୍ଦୁସ୍ଥାନ ସମାଚାର / ବନ୍ଦନା