ସମ୍ବଲପୁର, ୦୮ ନଭେମ୍ବର (ହି.ସ.) ସମ୍ବଲପୁର ସହରର ସମନ୍ୱିତ ବିକାଶ ପାଇଁ ଯୋଜନା ପ୍ରଣୟନ ଉପରେ କେନ୍ଦ୍ର ସରକାର ଯୋର ଦେଇଛନ୍ତି। ପ୍ରଧାନମନ୍ତ୍ରୀଙ୍କ ପରାମର୍ଶଦାତା ତରୁଣ କପୁର ଗତ ଅଗଷ୍ଟ ମାସରେ ସମ୍ବଲପୁର ଗସ୍ତରେ ଆସି ବିଭିନ୍ନ ସ୍ଥାନ ପରିଦର୍ଶନ କରିଥିଲେ । ଶ୍ରୀ କପୁରଙ୍କ ରିପୋର୍ଟ ଏବଂ ପରାମର୍ଶକ୍ରମେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମଓ) ପକ୍ଷରୁ ଓଡ଼ିଶା ରାଜ୍ୟ ସରକାରଙ୍କୁ ସମ୍ବଲପୁର ନଗରୀର ବିକାଶ ଓ ଜ୍ୱଳନ୍ତ ସମସ୍ୟା ର ନିରାକରଣ ନିମନ୍ତେ ସମନ୍ଵିତ ବିକାଶ ଯୋଜନା ପ୍ରଣୟନ ପାଇଁ କୁହାଯାଇଛି। ଏହି ଯୋଜନାରେ ସ୍ଥାନୀୟ ଶିଳ୍ପ ସଂସ୍ଥା ଗୁଡିକୁ ସାମିଲ କରିବା ଉପରେ ଗୁରୁତ୍ବ ଦିଆଯାଇଛି । ଶିଳ୍ପ ଓ ଶିକ୍ଷା କେନ୍ଦ୍ର ହେବା ସହିତ କଳା ଓ ସଂସ୍କୃତି କ୍ଷେତ୍ରରେ ଉନ୍ନୀତ ଅଞ୍ଚଳ ହୋଇଥିଲେ ମଧ୍ୟ ଭିତ୍ତିଭୂମି ର ଅଭାବରେ ସମ୍ବଲପୁର ଅଞ୍ଚଳ ଗୁରୁତର ପ୍ରଦୂଷଣ, ଟ୍ରାଫିକ ଓ ଅନ୍ୟ ସମସ୍ୟା ଦ୍ବାରା ପ୍ରଭାବିତ । ଏହି ସମସ୍ୟା ର ନିରାକରଣ ଦିଗରେ ଅଗ୍ରାଧିକାର ଭିତ୍ତିରେ କାର୍ଯ୍ୟ କରିବାକୁ ଯୋଜନା ପ୍ରଣୟନ ସକାଶେ କୁହାଯାଇଛି । ସମ୍ବଲପୁର ଆଧୁନିକ ନଗରୀୟ ସୁବିଧା ଓ ଭିତ୍ତିଭୂମି ରୁ ବଞ୍ଚିତ ହୋଇ ରହିଥିବା ବିଷୟକୁ ପିଏମଓ ଗୁରୁତ୍ବର ସହିତ ଉଲ୍ଲେଖ କରିଛି । ସେହିପରି ଡେବ୍ରିଗଡକୁ ଆଧାର କରି ବିଶେଷ ଯୋଜନା, ସମ୍ବଲପୁର - ରାୟପୁର ଓ ସମ୍ବଲପୁର - ରାଞ୍ଚି ମାର୍ଗରେ ବନ୍ଦେ ଭାରତ ଏକ୍ସପ୍ରେସ ଟ୍ରେନ ର ପ୍ରବର୍ତ୍ତନ ଆଦି ପାଇଁ ପ୍ରସ୍ତାବ ଦିଆଯାଇଛି। ଗୁରୁତର ଭାବରେ ପୀଡ଼ିତ ରୋଗୀଙ୍କୁ ଆବଶ୍ୟକ ବେଳେ ହେଲିକପ୍ଟର ରେ ନିଆଯାଇ ପାରିବା ଭଳି ହେଲିପ୍ୟାଡ ନିର୍ମାଣ ପାଇଁ କୁହାଯାଇଛି। ଏକ ଉଚ୍ଚସ୍ତରୀୟ ଯୋଜନା ପ୍ରଣୟନକାରୀ କମିଟି ଗଠନ କରାଯିବାକୁ ଓ କମିଟି ସଦସ୍ୟ ବିଭିନ୍ନ ସ୍ଥାନ ପରିଭ୍ରମଣ କରି ପ୍ରତ୍ୟକ୍ଷ ଜ୍ଞାନ ହାସଲ କରି ସମ୍ବଲପୁର ପାଇଁ ଆବଶ୍ୟକ ଯୋଜନା ପ୍ରଣୟନ କରିବାକୁ ମଧ୍ୟ କୁହାଯାଇଛି । ସମନ୍ଵିତ ଯୋଜନା ରେ ବୃହତ୍ତର ସମ୍ବଲପୁର ଅର୍ଥାତ୍ ଝାରସୁଗୁଡ଼ା କୁ ମଧ୍ୟ ଅନ୍ତର୍ଭୁକ୍ତ କରିବାକୁ ପ୍ରସ୍ତାବ ଦିଆଯାଇଥିବା ଜଣାପଡିଛି। ସୂଚନା ଯୋଗ୍ୟ ଯେ, ପ୍ରାୟ ୨ହଜାର ବର୍ଷ ର ସଭ୍ୟତା ବିଜଡିତ ବର୍ତ୍ତମାନ ର ସମ୍ବଲପୁର ସହର ୧୫ଶହ ସତାବ୍ଦୀ ରେ ଉତ୍ପତ୍ତି ଲାଭ କରିଥିଲା। ତିନୋଟି ନଦୀ, ଅନେକ ପାହାଡ଼ ଓ ଜଙ୍ଗଲ ପରିବେଷ୍ଟିତ ମନୋରମ ପ୍ରାକୃତିକ ଶୋଭାରାଜୀ ପାଇଁ ସମ୍ବଲପୁର ଏକଦା ଶୈଳ ନିବାସ ଭାବରେ ପରିଚୟ ସୃଷ୍ଟି କରିଥିଲା।
---------------
ହିନ୍ଦୁସ୍ଥାନ ସମାଚାର / ଶୈଳେଶ
