ଭୁବନେଶ୍ୱର, ୧୬ ଡିସେମ୍ବର (ହି.ସ.) - ପୂର୍ବତଟ ରେଳପଥ ପାର୍ସଲ କ୍ଷେତ୍ରରେ ଅଂଶୀଦାରଙ୍କ ସହଭାଗିତାକୁ ସୁଦୃଢ଼ କରିବା ଏବଂ ବ୍ୟବସାୟ କ୍ଷେତ୍ରରେ ବୃଦ୍ଧି କରିବା ଉଦ୍ଦେଶ୍ୟରେ ଏକ ପାର୍ସଲ ବ୍ୟବସାୟ: ପ୍ରମୁଖ ଗ୍ରାହକ ବୈଠକ ଆୟୋଜନ କରିଛି।
ପୂର୍ବତଟ ରେଳପଥର ପ୍ରମୁଖ ମୁଖ୍ୟ ବାଣିଜ୍ୟିକ ପ୍ରବନ୍ଧକ (ପିସିସିଏମ୍) ଶ୍ରୀମତୀ ରୀତା ରାଜଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ମୁଖ୍ୟାଳୟ ଏବଂ ଡିଭିଜନର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ। ପ୍ରମୁଖ ପାର୍ସଲ ଗ୍ରାହକମାନେ ଆଲୋଚନା ଅଧିବେଶନରେ ଅଂଶଗ୍ରହଣ କରିଥିଲେ, ଯାହାର ଉଦ୍ଦେଶ୍ୟ ଥିଲା ବିଭିନ୍ନ ନୀତିଗତ ପଦକ୍ଷେପ ବିଷୟରେ ସୂଚନା ଦେବା ଏବଂ ପାର୍ସଲ ସେବାର ଆହୁରି ଉନ୍ନତି ପାଇଁ ମତାମତ ହାସଲ କରିବା।
ଏହି ବୈଠକରେ ଭାରତୀୟ ରେଳପଥର ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପଗୁଡ଼ିକ, ଯଥା ପାର୍ସେଲ୍ ସ୍ଥାନର ଇ-ନିଳାମ, ପାର୍ସେଲ୍ କାର୍ଗୋ ଏକ୍ସପ୍ରେସ୍ ଟ୍ରେନ୍, ଇଣ୍ଡେେଂଟଡ୍ ପାର୍ସେଲ୍ ଟ୍ରେନ୍, ଡିମ୍ଡ୍ ଭିପି ଏବଂ ପାରଦର୍ଶିତା, କ୍ଷମତା ଓ ସେବା ପ୍ରଦାନ ବୃଦ୍ଧି ପାଇଁ ଆଣାଯାଇଥିବା ବିଭିନ୍ନ ଡିଜିଟାଲ୍ ପଦକ୍ଷେପ ସମ୍ପର୍କରେ ଗ୍ରାହକମାନଙ୍କୁ ଜଣାଇ ଦିଆଯାଇଥିଲା।
ପ୍ରମୁଖ ଗ୍ରାହକମାନେ ଆଲୋଚନାରେ ସକ୍ରିୟ ଭାବରେ ଅଂଶଗ୍ରହଣ କରିଥିଲେ ଏବଂ ମୂଲ୍ୟବାନ ପ୍ରସ୍ତାବ ରଖିଥିଲେ। ପାର୍ସଲ ବ୍ୟବସାୟ ସମ୍ପର୍କିତ ବିଭିନ୍ନ କାର୍ଯ୍ୟାନୁଷ୍ଠାନମୂଳକ ସମସ୍ୟା, ଯେପରିକି ଭିପି ଲିଜିଂ ପାଇଁ
ଅନାପତ୍ତି ପ୍ରମାଣପତ୍ର , ପ୍ଲାଟଫର୍ମରେ ପାର୍ସଲ ଷ୍ଟାକିଂ, କିଛି ନିର୍ଦ୍ଦିଷ୍ଟ ଟ୍ରେନର ଅଟକିବା ସମୟସୀମା ବୃଦ୍ଧି ଏବଂ ଅନ୍ୟାନ୍ୟ ସମସ୍ୟା ଉପରେ ବିସ୍ତୃତ ଆଲୋଚନା କରାଯାଇଥିଲା।
ଅଂଶୀଦାରମାନଙ୍କୁ ଆଶ୍ୱାସନା ଦିଆଯାଇଥିଲା ଯେ ସେମାନଙ୍କ ସମସ୍ୟାର ଶୀଘ୍ର ସମାଧାନ ପାଇଁ ଆବଶ୍ୟକୀୟ ପଦକ୍ଷେପ ନିଆଯିବ। ପାର୍ସଲ ଲୋଡିଂ ସମ୍ଭାବନାକୁ ଆହୁରି ବୃଦ୍ଧି କରିବା ଏବଂ ସମୟ ମଧ୍ୟରେ ଅଂଶୀଦାରଙ୍କ ସମସ୍ୟାର ସମାଧାନ କରିବା ପାଇଁ ନିୟମିତ ବ୍ୟବଧାନରେ ଏପରି ପ୍ରମୁଖ ଗ୍ରାହକ ବୈଠକ ଆୟୋଜନ କରାଯିବ ବୋଲି ମଧ୍ୟ ସୂଚିତ କରାଯାଇଥିଲା। ପୂର୍ବତଟ ରେଳପଥ ଗ୍ରାହକ-କେନ୍ଦ୍ରିକ, ଦକ୍ଷ ଏବଂ ବ୍ୟବସାୟ-ଅନୁକୂଳ ପାର୍ସଲ ସେବା ପ୍ରଦାନ କରିବା ଏବଂ ଏକ ନିର୍ଭରଯୋଗ୍ୟ ଲଜିଷ୍ଟିକ୍ସ ଅଂଶୀଦାର ଭାବରେ ଏହାର ଭୂମିକାକୁ ସୁଦୃଢ଼ କରିବା ପାଇଁ ଏହାର ପ୍ରତିବଦ୍ଧତାକୁ ପୁନଃସ୍ଥାପିତ କରିଛି।
---------------
ହିନ୍ଦୁସ୍ଥାନ ସମାଚାର / ବନ୍ଦନା
