ବଲାଙ୍ଗିର, ୬ ଡିସେମ୍ବର (ହି.ସ.)- ବଲାଙ୍ଗୀରର ପ୍ରମୁଖ ସାମାଜିକ ସଂଗଠନ ସହଯୋଗ ଫାଉଣ୍ଡେସନ୍ ୦୬.୧୨.୨୫ ଠାରୁ ପୃଥ୍ୱୀରାଜ ଗୋଶାଳାରେ ସହାନୁଭୂତି ପୂର୍ଣ୍ଣ ନୂଆ ପରିକଳ୍ପନା ପଶୁଙ୍କ ପାଇଁ ଖାଦ୍ୟ ରୋଟି, କଞ୍ଚା ତରକାରୀ ଏବଂ ବିସ୍କୁଟ ବିତରଣ କାର୍ଯ୍ୟକ୍ରମ”ର ଶୁଭାରମ୍ଭ କରିଛି। ଏହି କାର୍ଯ୍ୟକ୍ରମର ଉଦ୍ଦେଶ୍ୟ ବଲାଙ୍ଗୀର ସହରର ବିଭିନ୍ନ ସ୍ଥାନରେ ଗାଇ ଏବଂ କୁକୁର ମାନଙ୍କୁ ରୋଟି, କଞ୍ଚା ତରକାରୀ ଏବଂ ବିସ୍କୁଟ ଖୁଆଇ ସୁସ୍ଥ ଓ ପୋଷଣ ଯୋଗାଇବା। ମାନବମାତ୍ରକୁ ସେବା କରିବା ସହିତ ସହିତ ନିର୍ବଳ, ନିର୍ବାକ ପଶୁମାନଙ୍କ ପ୍ରତି ଦାୟିତ୍ୱବୋଧ ପ୍ରଦର୍ଶିତ କରି ସଂସ୍ଥା ପୁଣିଥରେ ନୂଆ ଦିଗରେ ପଦକ୍ଷେପ ନେଲା। ପୃଥିରାଜ ଗୋଶାଳାରେ ଆୟୋଜିତ ଉଦ୍ଘାଟନ କାର୍ଯ୍ୟକ୍ରମରେ ସି ଏ ନରେନ୍ଦ୍ର ଜେନ୍, ବିଷ୍ନୁ ପ୍ରସାଦ କେଡିଆ, ଡଃ ସୁରେଶ ଷଡ଼ଙ୍ଗୀ , ଲାୟନ୍ ଲୋକନାଥ ମିଶ୍ର, ସୁଦୀପ୍ତ ତ୍ରିପାଠୀ ଏବଂ ପବନ ଅଗ୍ରୱାଲଙ୍କ ଉପସ୍ଥିତି ରହିଥିଲା। ତାଙ୍କର ଉପସ୍ଥିତି ଏହି ପୂଣ୍ୟ କାର୍ଯ୍ୟକୁ ଅଧିକ ପ୍ରେରଣା ପ୍ରଦାନ ସହିତ ଶକ୍ତି ଦେଇଥିଲା।

କାର୍ଯ୍ୟକ୍ରମ ସମନ୍ୱୟକାରୀ ଡଃ. ପଞ୍ଚାନନ ପ୍ରଧାନ କହିଥିଲେ ଯେ, ସହଯୋଗ ଫାଉଣ୍ଡେସନ୍ ପ୍ରତି ଶନିବାର ସକାଳେ ବଲାଙ୍ଗୀରର ବିଭିନ୍ନ ସ୍ଥାନରେ ଏହି ପଶୁ ଖାଦ୍ୟ ବିତରଣ କାର୍ଯ୍ୟକ୍ରମକୁ ନିୟମିତ ଭାବେ କରିବ। ସେ କହିଥିଲେ ଯେ, ପଶୁମାନଙ୍କ ଦେଖାରେଖା କରିବା ସମାଜର ମୌଳିକ ଦାୟିତ୍ୱ ଏବଂ ଏପରି ନିୟମିତ ପ୍ରୟାସ ସମାଜରେ କରୁଣାର ସୁଦୃଢ଼ ବାର୍ତ୍ତା ପ୍ରସାର କରେ। ସଂସ୍ଥାର ସାଧାରଣ ସମ୍ପାଦିକା ଶ୍ରୀମତୀ ପିଙ୍କି ମୋଦୀ କହିଛନ୍ତି ଯେ, ସହଯୋଗ ଫାଉଣ୍ଡେସନ୍ ବିଗତ ତିନି ବର୍ଷ ଧରି ଜିଲ୍ଲା ମୁଖ୍ୟ ହସ୍ପିଟାଲରେ ମାଗଣାରେ ଖାଦ୍ୟ ବିତରଣ କାର୍ଯ୍ୟକ୍ରମ ସଫଳତାର ସହ ଜାରି ରଖିଛି ଏବଂ ହଜାର ହଜାର ଜଣଙ୍କୁ ସେବା ଦେଇ ଆସୁଅଛି। ସେ କହିଛନ୍ତି ଯେ, ମାନବମାନଙ୍କ ପରି ପଶୁମାନେ ମଧ୍ୟ ସ୍ନେହ, ସୁରକ୍ଷା ଏବଂ ପୋଷଣର ଆବଶ୍ୟକ ରଖନ୍ତି। ଏହି ନୂତନ ପଦକ୍ଷେପର ମାଧ୍ୟମରେ ସଂସ୍ଥା ମାନବ ସେବା ସହିତ ପଶୁ ସେବାକୁ ମଧ୍ୟ ସମାନଭାବେ ପ୍ରାଧାନ୍ୟ ଦେବାକୁ ଚାହୁଁଛି।

ସହଯୋଗ ଫାଉଣ୍ଡେସନ୍ ସମସ୍ତ ସେବକ, ଦାତା ଓ ସମର୍ଥକ ମାନଙ୍କୁ ତାଙ୍କ ଅମୂଲ୍ୟ ସହଯୋଗ ପାଇଁ ହୃଦୟ ଗଭୀର ପ୍ରଦେଶରୁ ଧନ୍ୟବାଦ ଜଣାଇଛି। ସଂସ୍ଥାର ବିଶ୍ୱାସ, ପଶୁ ସେବା, ମାନବ ସେବାର ଏକ ପବିତ୍ର ରୂପ” ଏବଂ ଏହି ପ୍ରୟାସ ଆଉ ଅନେକଙ୍କୁ ପଶୁ କଳ୍ୟାଣରେ ସହଯୋଗୀ ହେବାକୁ ପ୍ରେରଣା ଦେବ ବୋଲି ଆଶା ରହିଛି।

ହିନ୍ଦୁସ୍ଥାନ ସମାଚାର / ଗୋପବନ୍ଧୁ