ଭୁବନେଶ୍ୱର, ୩୦ ମଇ (ହି.ସ.) -ଓଡିଶା ସରକାରଙ୍କ ମହିଳା ଏବଂ ଶିଶୁ ବିକାଶ ବିଭାଗ, ଭାରତ ସରକାରଙ୍କ ମହିଳା ଏବଂ ଶିଶୁ ବିକାଶ ମନ୍ତ୍ରଣାଳୟର ସହଯୋଗରେ, ଶୁକ୍ରବାର ପୁରୀରେ ଦି ଦିନିଆ ପୋଷ୍ୟ ସନ୍ତାନ ଗ୍ରହଣ ସମ୍ମିଳନୀ ୨୦୨୫ର ଉଦଘାଟନ ସମାରୋହ ଅନୁଷ୍ଠିତ ହୋଇଯାଇଛି। ଏହି ଦୁଇଦିନିଆ ଜାତୀୟସ୍ତରୀୟ କାର୍ଯ୍ୟକ୍ରମରେ ଶିଶୁ ସୁରକ୍ଷା ସଂସ୍କାରକୁ ଆଗକୁ ବଢାଇବା ଏବଂ ପରିବାର-ଭିତିକ ଯତ୍ନର ଏକ ମୂଳ ସ୍ତମ୍ଭ ଭାବରେ ପୋଷ୍ୟ ସନ୍ତାନ ଗ୍ରହଣ ବ୍ୟବସ୍ଥାକୁ ସୁଦୃଢ଼ କରିବା ପାଇଁ ନୀତି ନିର୍ଦ୍ଧାରକ, ଆଇନ ବିଶେଷଜ୍ଞ, ଜିଲ୍ଲା ଅଧିକାରୀ ଏବଂ ବିକାଶ ଅଂଶୀଦାରମାନେ ଏକାଠି ହୋଇଥିଲେ ।

ଏହି ଅବସରରେ ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡା ମୁଖ୍ୟ ଅତିଥି ଭାବେ ଯୋଗ ଦେଇ ପ୍ରତ୍ୟେକ ଶିଶୁର ଅଭିବୃଦ୍ଧି ପାଇଁ ଏକ ପ୍ରେମପୂର୍ଣ୍ଣ, ସୁରକ୍ଷିତ ଏବଂ ପୋଷଣକାରୀ ପାରିବାରିକ ପରିବେଶର ଆବଶ୍ୟକତା ରହିଛି ବୋଲି କହିଥିଲେ। ପ୍ରତିଟି ଶିଶୁର ଏକ ସୁନ୍ଦର ଭବିଷ୍ୟତ ପାଇଁ ପିତାମାତାଙ୍କ ସ୍ନେହ ଅତ୍ୟନ୍ତ ଜରୁରୀ। ପୋଷ୍ୟ ସନ୍ତାନ ଗ୍ରହଣ ଦ୍ୱାରା ପିଲାଟିକୁ ଏକ ପରିବାର ମିଳିବା ସହ ଗ୍ରହଣକାରୀଙ୍କୁ ମଧ୍ୟ ପିତାମାତା ର ସୌଭାଗ୍ୟ ପ୍ରାପ୍ତି ର ସୁଯୋଗ ମିଳିଥାଏ। ପ୍ରତ୍ୟେକ ଶିଶୁ ମଧ୍ୟରେ ପ୍ରତିଭା ରହିଛି ଓ ଏହାର ଊନ୍ମେଷ ସମାଜକୁ ସମୃଦ୍ଧ ଓ ଶୃଙ୍ଖଳିତ କରିପାରିବ ବୋଲି ଶ୍ରୀମତୀ ପରିଡା ମତବ୍ୟକ୍ତ କରିଥିଲେ । ଚିନ୍ତା, ଚେତନା, ଶିକ୍ଷା ଏବଂ ପ୍ରତିବଦ୍ଧତାକୁ ପୁନଃନିର୍ମାଣ କରିବା ପାଇଁ ଏଭଳି ଏକ ମଞ୍ଚ ଆୟୋଜନ କରିଥିବାରୁ ବିଭାଗକୁ ସେ ଅଭିନନ୍ଦନ ଜଣାଇଥିଲେ। ଗତ କିଛି ବର୍ଷ ମଧ୍ୟରେ ଓଡିଶା ପୋଷ୍ୟ ସନ୍ତାନ ଗ୍ରହଣ ବ୍ୟବସ୍ଥାକୁ ସୁଗମ କରିବାରେ ଉଲ୍ଲେଖନୀୟ ଅଗ୍ରଗତି କରିଛି ବୋଲି ଉପ ମୁଖ୍ୟମନ୍ତ୍ରୀ ସୂଚନା ଦେଇଥିଲେ।

ଶ୍ରୀମତୀ ଶୁଭା ଶର୍ମା ପ୍ରମୁଖ ଶାସନ ସଚିବ, ମହିଳା ଏବଂ ଶିଶୁ ବିକାଶ ବିଭାଗ, ଶ୍ରୀମତୀ ଭାବନା ସକ୍ସେନା, ମୁଖ୍ୟ ନିର୍ବାହୀ ଅଧିକାରୀ, କେନ୍ଦ୍ର ପୋଷ୍ୟ ସନ୍ତାନ ସମ୍ବଳ ସଂସ୍ଥା ; ଏବଂ ଶ୍ରୀମତୀ ମୋନିଷା ବାନାର୍ଜୀ ନିର୍ଦ୍ଦେଶକ, ଆଇ.ସି.ଡି.ଏସ. ଏବଂ ସମାଜ କଲ୍ୟାଣ ବିଭାଗ ଉପସ୍ଥିତ ରହି ପୋଷ୍ୟ ସନ୍ତାନ ଗ୍ରହଣ ସମ୍ମିଳନୀ ର ଆବଶ୍ୟକତା, ବ୍ୟବହାରଗତ ପରିବର୍ତ୍ତନ ଓ ସାମାଜିକ ପ୍ରତିବଦ୍ଧତା ସମ୍ପର୍କରେ ଆଲୋଚନା କରିଥିଲେ।

ଏହି ସମ୍ମିଳନୀ କେନ୍ଦ୍ର ପୋଷ୍ୟ ସନ୍ତାନ ସମ୍ବଳ ସଂସ୍ଥା, ୟୁନିସେଫ ଏବଂ ରାଜ୍ୟ କର୍ତ୍ତୃପକ୍ଷଙ୍କ ନେତୃତ୍ୱରେ ବୈଷୟିକ ଅଧିବେଶନ ଅନୁଷ୍ଠିତ ହୋଇଥିଲା। ଏହି ଅଧିବେଶନଗୁଡ଼ିକରେ କିଶୋର ନ୍ୟାୟ ଆଇନ ଅଧୀନରେ ନୀତିଗତ ସୁରକ୍ଷା, ଆନ୍ତର୍ଜାତୀୟ ଯତ୍ନ ସଂସ୍କାର ପ୍ରୟାସ ଏବଂ ପୋଷ୍ୟ ପରିବାର ପାଇଁ ମାନସିକ ସାମାଜିକ ସହାୟତା ବ୍ୟବସ୍ଥା ଉପରେ ଅନୁସନ୍ଧାନ କରାଯାଇଥିଲା । ତାମିଲନାଡୁ, କର୍ଣ୍ଣାଟକ ଏବଂ ମହାରାଷ୍ଟ୍ରର ରାଜ୍ୟସ୍ତରୀୟ ନବସୃଜନଗୁଡ଼ିକୁ ମଧ୍ୟ ସ୍କେଲେବଲ୍ ଅଭ୍ୟାସର ମଡେଲ୍ ଭାବରେ ଅଂଶୀଦାର କରାଯାଇଥିଲା। ସଫଳ ପୋଷ୍ୟ ସନ୍ତାନ ଗ୍ରହଣକାରୀଙ୍କ କାହାଣୀକୁ ନେଇ ଷ୍ଟୋରିଜ ଅଫ ହୋପ ଆଣ୍ଡ ହିଲିଙ୍ଗ ନାମରେ ଏକ କଫି ଟେବଲ ବୁକ ମଧ୍ୟ ଉନ୍ମୋଚନ କରାଯାଇଥିଲା ।

ସମଗ୍ର ଓଡ଼ିଶାରୁ ଜିଲ୍ଲାପାଳ ଏବଂ ଉପ- ଜିଲ୍ଲାପାଳ ମାନେ ପୋଷ୍ୟ ଗ୍ରହଣକୁ ପ୍ରୋତ୍ସାହିତ କରୁଥିବା ଏବଂ ସଂସ୍ଥାଗତ ଯତ୍ନକୁ ହ୍ରାସ କରୁଥିବା ତୃଣମୂଳ ସ୍ତରରେ ପ୍ରୟାସ ଉପସ୍ଥାପନ କରିବା ପାଇଁ ଏକ ଶୈକ୍ଷିକ ବିନିମୟରେ ଅଂଶଗ୍ରହଣ କରିଥିଲେ। ଶିଶୁ କଲ୍ୟାଣ କମିଟିର ଅଧ୍ୟକ୍ଷ ଏବଂ ଜିଲ୍ଲା ଶିଶୁ ସୁରକ୍ଷା ଅଧିକାରୀମାନେ ମଧ୍ୟ ରାଜ୍ୟ ସାରା ପୋଷ୍ୟ ଗ୍ରହଣ ପ୍ରକ୍ରିୟାକୁ ସୁଦୃଢ଼ ଏବଂ ତ୍ୱରାନ୍ୱିତ କରିବା ପାଇଁ ଅଂଶଗ୍ରହଣ କରିଥିଲେ ।

ପୋଷ୍ୟ ଗ୍ରହଣ ସମ୍ମିଳନୀ ୨୦୨୫ ବିଭାଗଗୁଡ଼ିକ ମଧ୍ୟରେ ସମନ୍ୱୟକୁ ତ୍ୱରାନ୍ୱିତ କରିବା, ଜିଲ୍ଲାସ୍ତରୀୟ ପୋଷ୍ୟ ଗ୍ରହଣ ବ୍ୟବସ୍ଥାକୁ ମଜବୁତ କରିବ ଏବଂ ପ୍ରତ୍ୟେକ ଶିଶୁର ପରିବାର ପ୍ରତି ଅଧିକାର ପ୍ରତି ରାଜ୍ୟର ପ୍ରତିବଦ୍ଧତାକୁ ସୁଦୃଢ଼ କରିବ ବୋଲି ଆଶା କରାଯାଇଥିଲା । ଶିଶୁ-କୈନ୍ଦ୍ରିକ ଶାସନରେ ଓଡ଼ିଶା ଏକ ଅଗ୍ରଣୀ ରାଜ୍ୟ ଭାବରେ ଉଭା ହେବା ସହିତ, ଏହି ସମ୍ମିଳନୀ କୌଣସି ଶିଶୁ ଯେପରି ପ୍ରେମ, ପରିଚୟ, ପରିବାର ଏବଂ ନିଜତ୍ୱ ବିନା ବଢ଼ିବ ନାହିଁ ତାହା ନିଶ୍ଚିତ କରିବାର ସାମୂହିକ ସଂକଳ୍ପକୁ ପୁନଃସ୍ଥାପିତ କରିବ ।

---------------

ହିନ୍ଦୁସ୍ଥାନ ସମାଚାର / ବନ୍ଦନା