ଭୁବନେଶ୍ୱର, ୧୧ ଅଗଷ୍ଟ (ହି.ସ.) - କଟକ ରେଳ ଷ୍ଟେସନର ପ୍ଲାଟଫର୍ମ ନମ୍ବର ୨ରେ ଚାଲୁରହିଥିବା ଆଧୁନିକୀକରଣ କାର୍ଯ୍ୟକୁ ଦୃଷ୍ଟିରେ ରଖି, ପୂର୍ବତଟ ରେଳପଥ ଟ୍ରେନ ପରିଚାଳନାରେ ଅସ୍ଥାୟୀ ପରିବର୍ତନ ଘୋଷଣା କରିଛି । ୧୧ ଅଗଷ୍ଟରୁ ୧ ସେପ୍ଟେମ୍ବର ପର୍ଯ୍ୟନ୍ତ,ତିନୋଟି ଟ୍ରେନକୁ କଟକ ଷ୍ଟେସନ ପରିବର୍ତେ ସାମୟିକ ମାର୍ଗ ପରିବର୍ତନ କରାଯାଇ ବାରଙ୍ଗ-ନରାଜ ମାର୍ଥାପୁର-ମାଛପୁର-ସାଳଗାଁ-କପିଳାସ ରୋଡ ଦେଇ ଚଳାଚଳ କରାଯିବ। ଏହି ଟ୍ରେନ ଗୁଡିକ ହେଲା ୧୨୫୧୫ କୋଏମ୍ବାଟୁର-ସିଲଚର ସୁପରଫାଷ୍ଟ ଏକ୍ସପ୍ରେସ୍
,୨୨୬୪୩ ଏର୍ଣ୍ଣାକୁଲମ୍-ପାଟନା ଦ୍ୱି-ସାପ୍ତାହିକ ଏକ୍ସପ୍ରେସ୍ ଏବଂ ୧୨୫୦୯ ବେଙ୍ଗାଲୁରୁ-ଗୌହାଟି ତ୍ରି-ସାପ୍ତାହିକ ଏକ୍ସପ୍ରେସ୍। ଏହି ଟ୍ରେନଗୁଡ଼ିକ ଉପରୋକ୍ତ ଅବଧି ମଧ୍ୟରେ ନରାଜ ମାର୍ଥାପୁର ରେଳ ଷ୍ଟେସନରେ ଅସ୍ଥାୟୀ ରହଣି ପ୍ରଦାନ କରିବେ ।
ଯାତ୍ରୀମାନଙ୍କ ସୁଗମ ସଂଯୋଗ ସୁନିଶ୍ଚିତ କରିବା ପାଇଁ, ମାର୍ଗ ପରିବର୍ତନ କରାଯାଇଥିବା ଟ୍ରେନଗୁଡ଼ିକର ଯାତ୍ରୀମାନଙ୍କ ସୁବିଧାକୁ ଦୃଷ୍ଟିରେ ରଖି ଉଭୟ ପାର୍ଶ୍ୱରୁ କଟକ ଏବଂ ନରାଜ ମାର୍ଥାପୁର ରେଳ ଷ୍ଟେସନ ମଧ୍ୟରେ ଖୋର୍ଦ୍ଧା ରୋଡ଼ ରେଳମଣ୍ଡଳ ପକ୍ଷରୁ ମାଗଣା ବସ୍ ସେବା ଉପଲବ୍ଧ କରାଯାଉଛି । ପରିବର୍ତନ କରାଯାଇଥିବା ଟ୍ରେନ୍ ଗୁଡ଼ିକରେ କଟକ ଆସିବା ପାଇଁ ଟିକେଟ୍ ବୁକ୍ କରିଥିବା ଯାତ୍ରୀମାନଙ୍କୁ ନରାଜ ମାର୍ଥାପୁର ଷ୍ଟେସନ୍ ରେ ଓହ୍ଲାଇ ଦିଆଯିବ। ସେଠାରୁ ସେମାନଙ୍କୁ କଟକ ରେଳ ଷ୍ଟେସନ୍ କୁ ନେବା ପାଇଁ ମାଗଣା ବସ୍ ସେବା ଯୋଗାଇ ଦିଆଯିବ। ସେହିପରି, ଉପରୋକ୍ତ ପରିବର୍ତନ କରାଯାଇଥିବା ଟ୍ରେନ୍ ଗୁଡ଼ିକରେ କଟକରୁ ଟିକେଟ୍ ବୁକ୍ କରିଥିବା ଯାତ୍ରୀମାନଙ୍କୁ ନିର୍ଦ୍ଧାରିତ ପ୍ରସ୍ଥାନ ସମୟର ବହୁ ପୂର୍ବରୁ କଟକ ରେଳ ଷ୍ଟେସନ୍ ରେ ପହଂଚିବାକୁ ଅନୁରୋଧ କରାଯାଇଛି । ସେମାନଙ୍କୁ ମାଗଣା ବସ୍ ସେବା ଦ୍ୱାରା ନରାଜ ମାର୍ଥାପୁର ଷ୍ଟେସନ୍ କୁ ସେମାନଙ୍କ ସମ୍ପୃକ୍ତ ଟ୍ରେନ୍ ରେ ଚଢ଼ିବା ପାଇଁ ପରିବହନ କରାଯିବ।
କଟକ ଷ୍ଟେସନରେ ନୂତନ ଏୟାର କନକୋର୍ସ ନିର୍ମାଣ, ଗ୍ରାନାଇଟ୍ ବିଛାଇବା କାର୍ଯ୍ୟ ଏବଂ ପ୍ଲାଟଫର୍ମ ନମ୍ବର ୨ ରେ ଗ୍ରୀଡ୍ ଏବଂ ପାଇଲ୍ ୱାର୍କସ୍ ସମେତ ପ୍ରମୁଖ ଭିତ୍ତିଭୂମି ଉନ୍ନତିକରଣକୁ ସୁବିଧାଜନକ କରିବା ପାଇଁ ଏହି ଅସ୍ଥାୟୀ ବ୍ୟବସ୍ଥା କରାଯାଇଛି ।ବସ୍ ସେବାର ଲାଭ ଉଠାଇବା ଏବଂ ଯେକୌଣସି ଅସୁବିଧାକୁ ଏଡାଇବା ପାଇଁ ଯାତ୍ରୀମାନଙ୍କୁ ଉପରୋକ୍ତ ଟ୍ରେନଗୁଡ଼ିକର ନିର୍ଦ୍ଧାରିତ ପ୍ରସ୍ଥାନ ସମୟର ବହୁ ପୂର୍ବରୁ କଟକ ଷ୍ଟେସନରେ ପହଞ୍ଚିବାକୁ ରେଳବାଇ ପକ୍ଷରୁ ପରାମର୍ଶ ଦିଆଯାଇଛି ।
---------------
ହିନ୍ଦୁସ୍ଥାନ ସମାଚାର / ବନ୍ଦନା
